ပလိၵ်ႈထႆး တီႉၺွပ်းလႆႈ ၵူၼ်းမိူင်းႁူမ်ႈတုမ်လၵ်ႉၶဝ်ႈမိူင်းထႅင်ႈၸမ်ပၢၵ်ႇၵေႃႉ

ၵူၼ်းမိူင်းႁူမ်ႈတုမ် ဢၢၼ်းၸႂ်ႉမိူင်းထႆး ပဵၼ်သဵၼ်ႈတၢင်းၽၢၼ်ႇ တႃႇၵႂႃႇႁႃႁဵတ်းၵၢၼ်ထႅင်ႈ တၢင်ႇမိူင်းၼၼ်ႉ ထုၵ်ႇပလိၵ်ႈထႆး တီႉၺွပ်းလႆႈၸမ်ပၢၵ်ႇၵေႃႉ ၼႆယဝ်ႉ။

မိူဝ်ႈဝၼ်းထီႉ 23 July 2024 (လိူၼ်ပႅတ်ႇလွင်ႈ 3 ၶမ်ႈ ပီႊတႆး 2118 ၼီႈ) ၼၼ်ႉ ၽၢႆႇတၢင်းပလိၵ်ႈထႆး ႁူမ်ႈပႃးၽူႈမီးပုၼ်ႈၽွၼ်းထႅင်ႈလၢႆလၢႆၽၢႆႇ လႆႈၶဝ်ႈၵႂႃႇတီႉ ၺွပ်း ၵူၼ်းမိူင်းႁူမ်ႈတုမ် ဢၼ်လၵ်ႉလွမ်ၶဝ်ႈမိူင်းထႆး လူၺ်ႈၽိတ်းမၢႆမီႈသေ ၵႂႃႇသိုင်ႇမူၵ်းတူဝ်ဝႆႉယူႇတီႈၼႂ်းထိူၼ်ႇ ၽၢႆႇလင်ႁိူၼ်း မၢႆ 223 ပွၵ်ႉ 2 ဢိူင်ႇၶဝ်ၵရႃႇပုၵ်ႇ ၸႄႈဝဵင်းထႃႉယၢင်း ၸႄႈတွၼ်ႈၽဵတ်းပူးရီး ဢၼ်ဢၢၼ်းတေၵႂႃႇႁႃႁဵတ်းၵၢၼ်တီႈ မိူင်းမလေးသျႃးၼၼ်ႉတင်းမူတ်း 85 ၵေႃႉ၊ ပဵၼ်ၸၢႆး 73 ၵေႃႉ၊ ယိင်း 9 ၵေႃႉ လႄႈ လုၵ်ႈဢွၼ်ႇၸၢႆး 1 ၵေႃႉ၊ လုၵ်ႈဢွၼ်ႇယိင်း 2 ၵေႃႉ ဝႃႈၼႆ။

ၸွမ်းၼင်ႇပလိၵ်ႈထႆး လႆႈၸႅတ်ႈထၢမ်တီႈ ဢႃရီ ဢႃႇယု 22 ပီႊ လႆႈလၢတ်ႈဝႃႈ မီးၵူၼ်းဢမ်ႇႁူႉၸၵ်းၸိုဝ်ႈ ၵပ်းသိုပ်ႇမႃးႁႃးမၼ်းသေ ယွၼ်းၽၢၵ်ႇလုၵ်ႈဢွၼ်ႇဝႆႉ ၵမ်းၼိုင်ႈၵူၺ်း ဝၢႆးၼၼ်ႉ ၶိုၼ်းႁႂ်ႈမၼ်းၵႂႃႇသူင်ႇလုၵ်ႈဢွၼ်ႇၸိူဝ်းၼၼ်ႉ တီႈၼႂ်းထိူၼ်ႇ ၽၢႆႇလင်ႁိူၼ်း မၢႆ 223 ပွၵ်ႉ 2 ဢိူင်ႇၶဝ်ၵရႃႇပုၵ်ႇ ၸႄႈဝဵင်းထႃႉယၢင်းသေ လႆႈၵႃႈၸၢင်ႈ 3,000 ဝၢတ်ႇ ဢွၼ်တၢင်းတေထုၵ်ႇတီႉၺွပ်း ဝႃႈၼႆ။

လွင်ႈၵူၼ်းမိူင်းႁူမ်ႈတုမ် လၵ်ႉလွမ်ၶဝ်ႈမိူင်း ဢၼ်ထုၵ်ႇတီႉၺွပ်းပွၵ်ႈၵမ်းၼႆႉ မီးၵူၼ်းထႆး ၼႂ်းပိုၼ်ႉတီႈ 3 ၵေႃႉ ႁူႉႁၼ်ၸွမ်း လႄႈ ဢၼ်ပဵၼ်ၵူၼ်းမိူင်းႁူမ်ႈတုမ် ၼၼ်ႉၵေႃႈ လႆႈသဵင်ႈငိုၼ်းၵႃႈၸႂ်ႉၸၢႆႇပၼ် တီႈၼၢႆးၼႃႈဢၼ်ပဵၼ်ၵူၼ်းမိူင်းႁူမ်ႈ တုမ်ၼင်ႇၵၼ် ပေႃးပဵၼ်ၵူၼ်းလူင်ၼိုင်ႈၵေႃႉလႂ် 60,000 ဝၢတ်ႇ၊ လုၵ်ႈဢွၼ်ႇဢႃႇယု ဢမ်ႇထိုင် 18 ပီႊသမ်ႉ ၼိုင်ႈၵေႃႉလႂ် 30,000 ဝၢတ်ႇ ဝႃႈၼႆ။

ၸိူင်ႉႁိုဝ်ၵေႃႈလီ ၵူၼ်းမိူင်းႁူမ်ႈတုမ် ဢၼ်ထုၵ်ႇတီႉၺွပ်းပွၵ်ႈၵမ်းၼႆႉ ၽၢႆႇတၢင်း ၽူႈမီးပုၼ်ႈၽွၼ်းထႆးၶဝ် တေႁဵတ်းသၢင်ႈပၼ်တၢမ်ႇတၢင်းၽိတ်းၵႂႃႇ ၸွမ်းၼင်ႇ မၢႆမီႈၸိုင်ႈမိူင်းမီးယဝ်ႉသေ ၶိုၼ်းတေသူင်ႇပွၵ်ႈမိူဝ်းၶိုၼ်းၼႂ်းမိူင်းႁူမ်ႈတုမ် ၼႆယဝ်ႉ။

တႆးလွတ်ႈလႅဝ်း