ပလိၵ်ႈပွႆႇပၼ်တူဝ် ၽူႈၵုမ်းထတ်းလိၵ်ႈ သိုဝ်ႇၶၢဝ်ႇ VOM ယဝ်ႉ

ၽူႈၵုမ်းထတ်းလိၵ်ႈ သိုဝ်ႇၶၢဝ်ႇ Voice of Myanmar ၵူဝ်ႇၼေႇမဵဝ်းလိၼ်း ဢၼ်ထုၵ်ႇၸဝ်ႈၼႃႈတီႈ Criminal Investigation Department (CID) တီႉၺွပ်းတူဝ်ၵႂႃႇသေ ထုၵ်ႇဢဝ်ဢမူႉတၢင်းၽိတ်းၸွမ်း မၢႆမီႈ ၵၢၼ်တိုၵ်းတေႃး ၸုမ်းၵေႃႇၵၢၼ်ႁၢႆႉၼၼ်ႉ ၵုမ်းၶင်ဝႆႉၶၢဝ်းတၢင်းႁိုင် မွၵ်ႈ 10 ဝၼ်းသေ မိူဝ်ႈဝႃးဝၼ်းထီႉ 9 April 2020 (လိူၼ်ႁႃႈလွင်ႈ 2 ၶမ်ႈ ပီႊတႆး 2114 ၼီႈ) ယၢမ်းၵၢင်ၶမ်ႈ ပလိၵ်ႈဝဵင်းလိူဝ်ႇ ၶိုၼ်းပွႆႇပၼ်တူဝ်ယဝ်ႉဝႃႈၼႆ။

ၽူႈၵုမ်းထတ်းလိၵ်ႈ သိုဝ်ႇၶၢဝ်ႇ Voice of Myanmar ၵူဝ်ႇၼေႇမဵဝ်းလိၼ်း မီးလွင်ႈၵပ်းသိုပ်ႇတွင်ႈထၢမ် ၽူႈၶၢၼ်ပၢၵ်ႇ ၸုမ်းသိုၵ်းရၶႅင်ႇ AA လႄႈ လႆႈထုၵ်ႇၸဝ်ႈၼႃႈတီႈ CID တီႉၺွပ်းတူဝ်ၵႂႃႇ မိူဝ်ႈဝၼ်းထီႉ 30 March 2020 (လိူၼ်ႁႃႈမႂ်ႇ 7 ၶမ်ႈ) သေ ၵႂႃႇၵုမ်းၶင်တူဝ်ဝႆႉတီႈ ၶွၵ်ႈၶင်ဢူဝ်းၽူဝ်ႇ တီႈဝဵင်းလိူဝ်ႇ ၼႆယဝ်ႉ။

ဝၢႆးၼၼ်ႉ လႆႈထုၵ်ႇဢဝ်တင်းၽိတ်းၸွမ်းမၢႆမီႈ မတ်ႉတႃ 50 (ၵ) လႄႈ 52 (ၵ) ဢၼ်ၵဵဝ်ႇၸွမ်း မၢႆမီႈၸုမ်းၵေႃႇၵၢၼ်ႁၢႆႉ၊ ၵူၺ်းၵႃႈ မိူဝ်ႈဝႃးဝၼ်းထီႉ 9 April 2020 (လိူၼ်ႁႃႈလွင်ႈ 2 ၶမ်ႈ) ယၢမ်းတၢမ်းၶမ်ႈ ၼၼ်ႉတႄႉ ယွၼ်ႉဝႃႈ ၵူဝ်ႇၼေႇမဵဝ်းလိၼ်း ဢမ်ႇမီးတၢင်းၽိတ်းၼႆလႄႈ ၸင်ႇလႆႈပွႆႇပၼ်တူဝ်ၶိုၼ်း။ မိူဝ်ႈၽွင်းပွႆႇပၼ်တူဝ်ၼၼ်ႉၵေႃႈ လႆႈလူင်းလၢႆးမိုဝ်းႁပ်ႉႁွင်း (ဢႃႇမၶၢမ်ႇ) ဝႃႈ ပေႃးၸဝ်ႈၼႃႈတီႈၶဝ် မီးလွင်ႈၵူတ်ႇထတ်းၸႅတ်ႈထၢမ်သေလွင်ႈလွင်ႈ ဢၼ်ၵဵဝ်ႇၸွမ်း မတ်ႉတႃဢၼ်ထုၵ်ႇဢဝ်တင်းၽိတ်းဝႆႉ သွင်ၶေႃႈၼႆႉၸိုင် တေလႆႈပၼ်တၢင်းႁူမ်ႈမိုဝ်းၸဝ်ႈၼႃႈတီႈ တႃႇၵူတ်ႇထတ်းၵူႈၶၢဝ်းယၢမ်း ဝႃႈၼႆ။

ၵူဝ်ႇၼေႇမဵဝ်းလိၼ်း လၢတ်ႈတီႈသိုဝ်ႇၶၢဝ်ႇဝႃႈ − ဢၼ်လွတ်ႈဢွၵ်ႇမႃးၼႆႉတႄႉ မီးတၢင်းသိူဝ်းယူႇ၊ ၵူၺ်းၵႃႈ ၵဝ်ၶႃႈႁဵတ်းၸွမ်းၼင်ႇ ပိူင်သိုဝ်ႇၶၢဝ်ႇ လွင်ႈလွတ်ႈလႅဝ်းသိုဝ်ႇၶၢဝ်ႇ မီးၼၼ်ႉသေ တႅမ်ႈၶၢဝ်ႇၵူၺ်းလႄႈ ဢမ်ႇမီး တၢင်းၽိတ်းသင် သမ်ႉလႆႈထုၵ်ႇတီႉၺွပ်းလႄႈ လွင်ႈၼႆႉႁဵတ်းႁႂ်ႈတုမ်ႉတိူဝ်ႉတေႃႇပၢႆးၸႂ် ၽူႈသိုဝ်ႇၶၢဝ်ႇႁဝ်းၶႃႈ ဢၼ်မီးၵၢင်ၸႂ်ၶႂ်ႈလၢတ်ႈၼႄ တႅမ်ႈၼႄ ဢၼ်ပိူင်ပဵၼ်တႄႉမီးတႄႉၼၼ်ႉယူႇၼႆယဝ်ႉ။

လႆႈႁူႉထႅင်ႈဝႃႈ ပလိၵ်ႈဝဵင်းလိူဝ်ႇၵုမ်းၶင်တူဝ် ၵူဝ်ႇၼေႇမဵဝ်းလိၼ်းဝႆႉတီႈ ၶွၵ်ႈၶင် ၵူၼ်းဢၼ်ၺႃးတၢမ်ႇတၢႆ ၼၼ်ႉ တႃႇၶၢဝ်းတၢင်း 10 ဝၼ်းၼႆယဝ်ႉ။

ဝၢႆးသေ လူင်ပွင်ၸိုင်ႈ ပိုၼ်ၽၢဝ်ႇ ၸုမ်းသိုၵ်းရၶႅင်ႇ AA ပဵၼ်ၸုမ်းၵေႃႇၵၢၼ်ႁၢႆႉ မိူဝ်ႈဝၼ်းထီႉ 23 March 2020 ယဝ်ႉၼၼ်ႉ လူင်ပွင်ၸိုင်ႈယင်းမီးလွင်ႈပိၵ်ႉဢိုတ်းပႅတ်ႈ ဝႅပ်ႉသၢႆႉထ်သိုဝ်ႇၶၢဝ်ႇၼႂ်းမိူင်း ၼပ်ႉႁူဝ်ပၢၵ်ႇသေ တီႉၺွပ်းပႃး ၽူႈသိုဝ်ႇၶၢဝ်ႇၸၢဝ်းၶိူဝ်း ဢၼ်မီးၼႂ်းမိူင်းရၶႅင်ႇ မိူၼ်ၼင်ႇ ၽူႈၵုမ်းထတ်းလိၵ်ႈ သိုဝ်ႇၶၢဝ်ႇ Narinjara News ဢူးၶႅင်ႇမျၢတ်ႈၵျေႃႇၵေႃႈ လႆႈထုၵ်ႇတီႉၺွပ်းမိူၼ်ၵၼ်သေ တေႃႇထိုင်ယၢမ်းလဵဝ် ယင်းဢမ်ႇပႆႇႁူႉဝႃႈ ၵုမ်းၶင်တူဝ်ဝႆႉယူႇတီႈလႂ် ၼႆယဝ်ႉ။

လိူဝ်သေသိုဝ်ႇၶၢဝ်ႇၸိူဝ်းၼၼ်ႉယဝ်ႉ ဢူးၸႃႇလုၼ်ႇသွင်း ၽူႈၵုမ်းထတ်းလိၵ်ႈ သိုဝ်ႇၶၢဝ်ႇၶိတ်ႉတိတ်ႉ (ခေတ်သစ် သတင်းဌာန) ဢၼ်ပၵ်းလုမ်းဝႆႉတီႈ ဝဵင်းတႃႈၵုင်ႈၵေႃႈ ထုၵ်ႇပလိၵ်ႈတီႉၺွပ်းဝႆႉမိူၼ်ၵၼ်သေ တေႃႇထိုင်မိူဝ်ႈၼႆႉ ဢမ်ႇပႆႇပွႆႇပၼ်တူဝ်ၶိုၼ်းၼႆယဝ်ႉ။

ၵဵဝ်ႇလူၺ်ႈလွင်ႈၸိူဝ်းၼႆႉသေ ၽူႈမီးပုၼ်ႈၽွၼ်းၽၢႆႇတပ်ႉသိုၵ်းမၢၼ်ႈတႄႉ ယၢမ်ႈလၢတ်ႈဝႆႉဝႃႈ ၽူႈလႂ်ၽႂ်သေ ဢမ်ႇဝႃႈ သင်မီးလွင်ႈၵပ်းသိုပ်ႇတင်း ၸုမ်းသိုၵ်းရၶႅင်ႇ AA ၼႆၸိုင် တေထုၵ်ႇဢဝ်တၢင်းၽိတ်း ၼၵ်းၼၵ်းၼႃၼႃ ၸွမ်းၼင်ႇမၢႆမီႈၸိုင်ႈမိူင်းမီးၼၼ်ႉ ဝႃႈၼင်ႇၼႆ။

မၢႆမီႈ တိုၵ်းတေႃးၸုမ်းၵေႃႇၵၢၼ်ႁၢႆႉၸိူဝ်းၼႆႉ လူင်ပွင်ၸိုင်ႈလႆႈမၵ်းမၼ်ႈၼႂ်းသၽႃးဝႆႉ မိူဝ်ႈဝၼ်းထီႉ 4 June 2014 ဝႃႈၼႆ။

တႆးလွတ်ႈလႅဝ်း