မိူဝ်ႈဝၼ်းထီႉ 5 July 2022 (လိူၼ်ပႅတ်ႇမႂ်ႇ 8 ၶမ်ႈ ပီႊတႆး 2116 ၼီႈ) ၵူၼ်းမိူင်းဝႅတ်ႉၼမ်း (4) ၵေႃႉ ဢၼ်လုၵ်ႉတၢင်း ဝဵင်းပၢင်သၢင်း ၼႃႈလိၼ်ၶိုၵ်းတွၼ်းမၢႆ 2 ၶဝ်ႈမႃးဝဵင်းတႃႈၶီႈလဵၵ်း ဢမ်ႇမီးဝတ်းဝႂ် ပဵၼ်တင်းၵၢၼ် ဢၢင်ႈၵႂႃႇႁဵတ်းၵၢၼ်တီႈလၢၼ်ႉ KTV တီႈၼိုင်ႈၼႆသေ ပလိၵ်ႈမၢၼ်ႈ တီႉၺွပ်းလႆႈ တီႈၼိူဝ်သဵၼ်ႈတၢင်း ဝဵင်းၵဵင်းတုင် – မိူင်းၶၢၵ်ႇ ႁိမ်းမၢႆလၵ်း 15 ပႃးတင်းၵူၼ်းၵေႃႉဢၼ်ဢွၼ်ၶဝ်မႃး ဝႃႈၼႆ။
ၵဵဝ်ႇလူၺ်ႈလွင်ႈ ၵူၼ်းမိူင်းဝႅတ်ႉၼမ်း 4 ၵေႃႉၼႆႉ တေမီးဢႃႇယု 18 ၶူပ်ႇ တေႃႇထိုင် ယႃႇယု 27 ၶူပ်ႇၼႆႉ၊ ၸိူဝ်းၶဝ်ၼႆႉ လုၵ်ႉတၢင်းမိူင်းလၢဝ်း ၶဝ်ႈမႃးဝဵင်းတႃႈၶီႈလဵၵ်းဢွၼ်တၢင်း လူၺ်ႈဢမ်ႇပဵၼ်တၢင်းၵၢၼ်လႄႈ ၵႂႃႇႁဵတ်းၵၢၼ် KTV တီႈ ၼႃႈလိၼ်ၶိုၵ်ႉတွၼ်းမၢႆ 2 ဝဵင်းပၢင်သၢင်း ႁိုင်ၶၢဝ်းတၢင်း 1 ပီႊ မိူဝ်ႈလဵဝ်သမ်ႉၶိုၼ်း တေမႃးႁဵတ်းၵၢၼ် KTV တီႈဝဵင်းတႃႈၶီႈလဵၵ်းလႄႈ ၸင်ႇထုၵ်ႇတီႉၺွပ်း တီႈၼိူဝ်သဵၼ်ႈတၢင်း ၼႆယဝ်ႉ။
မိူဝ်ႈပူၼ်ႉမႃး ဝၼ်းထီႉ 29 June 2022 ယၢမ်းၵၢင်ၶမ်ႈမွၵ်ႈ 19:00 မူင်းၼႆႉ ဝၢႆးသေ ၵိူတ်ႇၶိုၼ်ႈလွင်ႈ လူတ်ႉၽႃႇၵၼ် တီႈဝၢၼ်ႈၼႃးယွင်း ဝဵင်းတႃႈလိူဝ်ႇ ၼိူဝ်သဵၼ်ႈတၢင်း ဝဵင်းတႃႈၶီႈလဵၵ်း-ဝဵင်းၵဵင်းတုင် ၼၼ်ႉ တီႉၺွပ်းလႆႈထႅင်ႈ ၵူၼ်းမိူင်းဝႅတ်ႉၼမ်း 4 ၵေႃႉ ဢၼ်ဢမ်ႇမီးလၵ်းထၢၼ်ပဵၼ် ၵူၼ်းမိူင်းမၢၼ်ႈ ၼၼ်ႉသေ ၽၢႆႇပလိၵ်ႈမၢၼ်ႈတင်း သိုၵ်းမၢၼ်ႈၵေႃႈ ဢမ်ႇႁဵတ်းသင်ၶဝ် ယွၼ်ႉမီးတႃၵိၼ်တႃလႆႈမၼ်း ဝႃႈၼႆ။
ၼႂ်းဝဵင်းတႃႈၶီႈလဵၵ်း မိူင်းတႆးပွတ်းဢွၵ်ႇၼႆႉ မီးၵူၼ်းၼွၵ်ႈမိူင်း ဢၼ်ဢမ်ႇၶဝ်ႈတၢင်းၵၢၼ် လၵ်ႉၶဝ်ႈမိူင်း မိူၼ်ၼင်ႇ ၵူၼ်း မိူင်းၶႄႇ၊ မိူင်းထႆး၊ မိူင်းလၢဝ်း၊ ၵမ်ႇပေႃးတီးယိူဝ်း လႄႈ မိူင်းမလေးသျႃး မီးတင်းၼမ်ယူႇသေတႃႉ၊ ၵူၺ်းၵႃႈၵူၼ်းၸိူဝ်းဢၼ်ဢမ်ႇမီးလၵ်းထၢၼ်ၸိူဝ်းၼႆႉ ၽၢႆႇပလိၵ်ႈမၢၼ်ႈ တင်း ၸုမ်းၵုမ်းထိင်း ၵူၼ်းၶဝ်ႈဢွၵ်ႇမိူင်း (လဝၵ) လႆႈႁပ်ႉငိုၼ်း ၵိၼ်သူးၵိၼ်လၢပ်ႈလႄႈ ဢမ်ႇဢဝ်လိူင်ႈ သင် ပေႃးၵူၼ်းၼွၵ်ႈမိူင်း ဢၼ်ဢမ်ႇမွၼ်ငိုၼ်းၼၼ်ႉၵူၺ်း ၸင်ႇတီႉၺွပ်းဢဝ်လိူင်ႈၵႂႃႇ ၼႆယဝ်ႉ။
တႆးလွတ်ႈလႅဝ်း