မိူဝ်ႈၼႆႉဝၼ်းထီႉ 22 February 2023 (လိူၼ်သီႇမႂ်ႇ 4 ၶမ်ႈ ပီႊတႆး 2117 ၼီႈ) ယၢမ်းၵၢင်ဝၼ်း 11:39 မူင်း ပလိၵ်ႈမၢၼ်ႈၵေႃႉၼိုင်ႈ ၺႃးယိုဝ်းတၢႆ တီႈၽၢႆႇၼႃႈႁိူၼ်း သဵၼ်ႈတၢင်း 555 (မၢင်ၸိူဝ်းႁွင်ႉဝႃႈ သဵၼ်ႈတၢင်းၵႂႃႇၽၢႆႇလဵဝ်) ဝဵင်းမူႇၸေႊ ၸိုင်ႈတႆးပွတ်းႁွင်ႇ။
ၵူၼ်းမိူင်းၼႂ်းပိုၼ်ႉတီႈ ၵေႃႉၼိုင်ႈလၢတ်ႈၼႄဝႃႈ ၵေႃႉဢၼ်ယိုဝ်းတၢႆၼႆႉ မၼ်းပဵၼ်ပလိၵ်ႈမၢၼ်ႈ ၵႂႃႇၵိၼ်ၶဝ်ႈသွႆးသေပွၵ်ႈၶိုၼ်းႁိူၼ်း၊ လႆႈငိၼ်းမၢင်ၸိူဝ်းတႄႉဝႃႈ မၼ်းၵဵပ်းယွၼ်းငိုၼ်း ၵိၼ်ငိုၼ်းပိူၼ်ႈၼမ်ဝႆႉ လႄႈ တေႁဵတ်းႁႂ်ႈပိူၼ်ႈ ဢမ်ႇပဵင်းပေႃးၸႂ်ၼိူဝ်မၼ်း ၸင်ႇမႃးယိုဝ်းတၢႆ ၸိူင်ႉၼၼ်ၵူၺ်း၊ ပေႃးတူၺ်းၸွမ်းၼင်ႇ CCTV ထၢႆႇဝႆႉၼၼ်ႉ လႆႈႁၼ်ၵူၼ်းၸၢႆး 2 ၵေႃႉ ၶီႇလူတ်ႉၶိူင်ႈၸွမ်းၵၼ်ယဝ်ႉ ထူၵ်းၵွင်ႈယိုဝ်းသႂ်ႇၵွၵ်းႁူဝ်မၼ်း ၵမ်းသိုဝ်ႈ ၽွင်းတေၶဝ်ႈႁိူၼ်း၊ ဝႃႈၼႆ။
ၽွင်းမိူဝ်ႈၵူၼ်းၸၢႆး 2 ၵေႃႉ ဢဝ်ၵွင်ႈယိုဝ်းပလိၵ်ႈမၢၼ်ႈတၢႆၼၼ်ႉ ၵူၼ်းႁိမ်းႁွမ်း ဢွၼ်ၵၼ်တူၵ်းၸႂ်တိုၼ်ႇသၢၼ်ႈမိူၼ်ၵၼ်ယူႇ ၼႆယဝ်ႉ။
တႆးလွတ်ႈလႅဝ်း