မိူဝ်ႈပၢၼ်မိူင်းတႆးၵဝ်ႈႁၢႆးႁေႃ မိူင်းသႅၼ်ဝီ ပဵၼ်ၵဝ်ႉငဝ်ႈမိူင်းၸဝ်ႈၾႃႉမိူင်းတႆး- မိူၼ်ႁူႉၵၼ်ၼႆႉယူႇ။ ၸဝ်ႈပိုၼ်းတႆး(ၽူႈလိုဝ်းၸိုဝ်ႈ) ၸဝ်ႈယၼ်ႇၾႃႉ ၶိူဝ်းႁိူၼ်းၶုၼ်သၢင်ႇတူၼ်ႈႁုင်း မိူင်းသႅၼ်ဝီ လၢတ်ႈၼႄသဵၼ်ႈတၢင်းၵႃႉၵိူဝ် ၵူၼ်းတႆးမိူဝ်ႈၵွၼ်ႇ ဢၼ်ဢဝ်မိူင်းသႅၼ်ဝီ ပဵၼ်တီႈတင်ႈသေ လၢတ်ႈဝႆႉၼၼ်ႉမီးဝႃႈ- “ပေႃးတေလၢတ်ႈၸွမ်းသဵၼ်ႈတၢင်းပေႃႈၵႃႉဝူဝ်းတၢင်ႇ(ၵမ်ႈပႃႈၼမ်ပဵၼ်ပေႃႈၵႃႉၵိူဝ်) ၵူၼ်းတႆးႁဝ်းမိူဝ်ႈၵွၼ်ႇဝႃႈၼႆႉ မေႃႇၵိူဝ်မီးသွင်တီႈ၊ တီႈဝဵင်းသီႇပေႃႉ(မေႃႇၵိူဝ် ဢၼ်တႆးႁဝ်းသူင်ႁွင်ႉၸွမ်းပိုၼ်းမၢၼ်ႈဝႃႈ ပေႃႇၵျူဝ်ႇ ပေႃႈၵျူဝ်ႇ) လႄႈတင်းတီႈ ဝဵင်းပႃႇၵိူဝ်(ဢၼ်ၸဝ်ႈပိုၼ်းမၢၼ်ႈႁွင်ႉဝႃး ပၵူဝ်း ဢမ်ႇၼၼ် ပႄးၶူး) သွင်တီႈၼႆႉ”- ၼင်ႇၼႆ။
ၸင်ႇမီးၶၢဝ်းတၢင်းပေႃႈၵႃႉၵိူဝ်ဝႃႈ- “ၸင်ႇမီးၾိင်ႈၶၢဝ်းတၢင်းပေႃႈၵႃႉၵိူဝ်ဝႃႈ-” (လုၵ်ႉတီႈဝဵင်းသႅၼ်ဝီၵႂႃႇ-) သႅၼ်ဝီ ၼွင်မွၼ် ၼွင်ႁႆႈ ၼွင်ၵႂၢႆး တႃႈၽႃလၢႆး ၸႄႈဢႅၼ်ႇ ယဝ်ႉမေႃႇၵိူဝ်(တီႈၼႂ်းသီႇပေႃႉ)”- ၸိူင်ႉၼႆ။
ထႅင်ႈသၢႆၼိုင်ႈသမ်ႉ- “သႅၼ်ဝီ လႃႈသဵဝ်ႈ တူင်ႇလၢဝ်း မိူင်းၵိုင် ပၢင်လူင် တွင်ၵီႈ(ပၢင်သဝ်းပႃႇတွင်ၵီႈ ဢၼ်တႆးႁဝ်းႁွင်ႉတူၼ်ႈတီး- ဝဵင်းတွင်ႇၵျီး မိူဝ်ႈလဵဝ်)၊ ယဝ်ႉ ပၢင်လွင်း တွင်ႁူႇ(ထုင်ႉတွင်ႁူႇ ဢၼ်မၢၼ်ႈၶဝ်ႁွင်ႉတွင်ႇငူႇ မိူဝ်ႈလဵဝ်)၊ ယဝ်ႉၼၼ်ႉ ပဵင်းမၢၵ်ႇၼႃႉ(ဢမ်ႇၸႂ်ႈပၢင်မၢၵ်ႇၼႃႉ ဢၼ်ႁွင်ႉၸွမ်းမၢၼ်ႈဝႃႈ ပျိၼ်းမၼႃး- ၼႆၼၼ်ႉ) ယဝ်ႉၵေႃႈ ထုင်ႉပႃႇၵိူဝ်(တီႈဢွၵ်ႇၵိူဝ်ၼႃး-ပၵူဝ်း ယၢမ်းလဵဝ်) ၼႆဢိူဝ်ႈ”- ၸိူင်ႉၼႆ။
= တီႈ ၸဝ်ႈၶမ်းပၢၵ်ႈၾႃႉ မိူဝ်ႈလဵဝ်ႁူႉၸၵ်းၵၼ်ၼႂ်းၼၢမ်း ၸဝ်ႈၶမ်းႁၢၼ်ၾႃႉ မိူင်းၾၢင်၊ ၸႄႈတွၼ်ႈၵဵင်းမႆႇ ပဵၼ်လုၵ်ႈၸၢႆးၸဝ်ႈယၼ်ႇၾႃႉ သႅၼ်ဝီ၊ လႄႈပဵၼ်ပီႈဢၢႆႈၸဝ်ႈတိုၼ်းႁၢၼ် ထုင်ႉပၢင်ႇလႅင်းသႂ် ၸႄႈဝဵင်းၼမ်ႉၸၢင် လၢတ်ႈၼႄၽူႈတႅမ်ႈဝႃႈ- ဢူႈမၼ်းၸဝ်ႈ- ၸဝ်ႈယၼ်ႇၾႃႉ လႆႈလၢတ်ႈၼႄမၼ်းၸဝ်ႈၸိူင်ႉၼႆ- ၼႆယူႇ။ =