ပီႈၼွင်ႉလီႈသူႈ ၸတ်းႁဵတ်းပၢင်ပွႆးႁူမ်ႈၸူႉ ႁပ်ႉတွၼ်ႈပီႊမႂ်ႇ ပွၵ်ႈၵမ်း (4) တီႈမိူင်းပၼ်ႇ

ပီႈၼွင်ႉၸၢဝ်းၶိူဝ်းလီႈသူႈ ၸိူဝ်းယူႇသၢင်ႈၵိၼ်သဝ်း ၼႂ်းၸႄႈဝဵင်းမိူင်းပၼ်ႇ ႁူမ်ႈၵၼ် ၸတ်းႁဵတ်းပၢင်ပွႆး ႁူမ်ႈၸူႉႁပ်ႉတွၼ်ႈ ပီႊမႂ်ႇလီႈသူႈ ပွၵ်ႈၵမ်း (4) သေ မီးပီႈၼွင်ႉၸၢဝ်းၶိူဝ်းတႆး မိူၼ်ၼင်ႇ ၸၢဝ်းပဢူဝ်း၊ လႄႈ ၸၢဝ်းမၢၼ်ႈ ဢိၵ်ႇ ပီႈၼွင်ႉတႆး ၶိုၼ်ႈႁွတ်ႈတင်းၼမ်သေ မီးၽူႈယႂ်ႇၵူၼ်းလူင် ၼႂ်းမုၵ်ႉၸုမ်းၶွင်ႇသီႇဢဝ်ၶိုၼ်းၸိုင်ႈတႆး RCSS/SSA ၶိုၼ်ႈႁွတ်ႈပိုတ်ႇပၢင်ၵႂႃႇ ဝႃႈၼႆ။

တင်ႈတႄႇဝၼ်းထီႉ 27-28 January 2023 (လိူၼ်သၢမ်မႂ်ႇ 7- 8 ၶမ်ႈ ပီႊတႆး 2117 ၼီႈ) ယူႇတီႈပီႈၼွင်ႉၸၢဝ်းၶိူဝ်းလီႈသူႈ ဢၼ်ႇယူႇသဝ်းၼႂ်းၸႄႈဝဵင်းမိူင်းပၼ်ႇ လၢႆလၢႆပိုၼ်ႉတီႈ ႁူမ်ႈၵၼ်သေ ၸတ်းႁဵတ်းပၢင်ႁပ်ႉတွၼ်ႈပီႊမႂ်ႇ ၸၢဝ်းလီႈသူႈ ပွၵ်ႈၵမ်း (4) တီႈဝၢၼ်ႈသၢမ်လၵ်း ဢိူင်ႇဝူဝ်းလၢႆး ၸႄႈဝဵင်းမိူင်းပၼ်ႇသေ ၸွမ်းၼင်ႇၾိင်ႈထုင်းမီးၼၼ်ႉၵေႃႈ ပီႈၼွင်ႉလီႈသူႈၶဝ် ဢဝ်တၢင်းၵႃႈၾိင်ႈငႄႈၾိင်ႈထုင်း ၵႃႈႁူမ်ၸူမ်းမူၼ်ႈၸႂ်ပၼ် ၽူႈၶဝ်ႈႁူမ်ႈၶဝ်သေ မီးပီႈၼွင်ႉတႆးလႄႈ ပီႈၼွင်ႉၸၢဝ်းၶိူဝ်းၶဝ်ႈႁူမ်ႈၵိုၼ်းၶွၼ်ႈဝႆႉ ၼႆယဝ်ႉ။

ၽူႈၸၢႆးဢၼ်တူင်ႉၼိုင် ၼႂ်းတူင်ႇဝူင်းၸုမ်းၵူၼ်းၼုမ်ႇလီႈသူႈၵေႃႉၼိုင်ႈ လၢတ်ႈၼႄ တီႈသိုဝ်ႇၶၢဝ်ႇတႆးလွတ်ႈလႅဝ်းဝႃႈ “ပၢင်ပွႆးႁပ်ႉတွၼ်ႈပီႊမႂ်ႇလီႈသူႈႁဝ်းၶႃႈၼႆႉ တႄႇၼႂ်းဝၼ်းထီႉ 27 January 2023 ၶႃႈဢေႃႈ၊ ၼႂ်းဝၼ်းၼၼ်ႉ ႁဝ်းၶႃႈ လႆႈၽိတ်ႈမွၵ်ႇ ၽူႈယႂ်ႇၵူၼ်းလူင် ၼႂ်းမုၵ်ႉၸုမ်း RCSS/SSA မႃးပိုတ်ႇပၢင်ပၼ်ၶႃႈဢေႃႈ ယူႇတီႈႁဝ်းၶႃႈၵေႃႈ ငိၼ်းၸူမ်းပေႃးဢမ်ႇသုတ်းဢမ်ႇသဵင်ႈယဝ်ႉၶႃႈ တီႈၽူႈယႂ်ႇၵူၼ်းလူင်ႁဝ်း ဝႆႉၼမ်ႉၼၵ်းၼိူဝ်ၸၢဝ်းၶိူဝ်းႁဝ်းၶႃႈလႄႈ မႃးပိုတ်ႇပၼ်ပၢင်ပွႆးၸိူင်ႉၼင်ႇၼႆ။ လိူဝ်သေၼၼ်ႉဢမ်ႇၵႃး ယူႇတီႈၶဝ်ၸဝ်ႈပွင်ပဵၼ်လႆႈၼၼ်ႉသေ မႃးၸွႆႈထႅမ်ႁဝ်းၶႃႈၼၼ်ႉၵေႃႈ ငိၼ်းၸူမ်းတေႉတေႉ” ၼႆယဝ်ႉ။

မၼ်းၸၢႆးသိုပ်ႇလၢတ်ႈထႅင်ႈဝႃႈ “ၵဵဝ်ႇလူၺ်ႈ လွင်ႈပီႊမႂ်ႇႁဝ်းၶႃႈၼႆႉ ဢမ်ႇပေႃးမီးၽႂ်ႁူႉပွင်ႇတေႉတေႉၶႃႈ ဝၼ်းပီႊမႂ်ႇလီႈသူႈတေႉတေႉၼၼ်ႉ မႅၼ်ႈၼႂ်းပီႊလိူၼ်ဝၼ်းတႆး လိူၼ်သၢမ်မႂ်ႇ 1 ၶမ်ႈ ၼၼ်ႉဢေႃႈ၊ ၼႆႉယဝ်ႉၶႃႈ ပဵၼ်ပီႊမႂ်ႇဝၼ်းၼိုင်ႈ ၶွင်ၸၢဝ်းလီႈသူႈႁဝ်း။ ၼႂ်းဝၼ်းပီႊမႂ်ႇၼၼ်ႉ ၸွမ်ႇၼင်ႇလွင်ႈယုမ်ႇယမ်ႁဝ်းၶႃႈသေ တေဢွၼ်ၵၼ် ၶိုၼ်ႈၸဝ်ႈမိူင်းၶႃႈဢေႃႈ၊ ဝၼ်းၼၼ်ႉတႄႉႁပ်ႉပီႊမႂ်ႇ ႁိူၼ်းၽႂ်ႁိူၼ်းမၼ်း၊ ၼႂ်းဝၼ်းလိူၼ်သၢမ်မႂ်ႇ 2 ၶမ်ႈသမ်ႉ ႁိူၼ်းၽႂ်မၼ်း တေဢွၼ်ၵၼ်ၵၼ်ႇတေႃးၶိုၼ်း ပေႃႈမႄႈၸဝ်ႈၵဝ်ႇ ႁဵတ်းၼႆၶႃႈဢေႃႈ၊ ဢၼ်မႃးၸတ်းႁဵတ်းပွႆး ၼႂ်းဝၼ်းလိူၼ်သၢမ်ႇမႂ်ႇ 7-8 ၶမ်ႈၼႆႉတႄႉ ယူႇတီႈၸၢဝ်းလီႈသူႈႁဝ်း ၵူႈတီႈတီႈ ႁႂ်ႈလႆႈၸူႉတုမ်ၵၼ်သေ ႁပ်ႉပီႊမႂ်ႇတီႈလဵဝ်ၵၼ် ၼႆဢေႃႈ၊ ယွၼ်ႉၼၼ်လႆႈတႅမ်ႈဝႆႉတီႈ ပႅၵ်ႉၵလွင်းဝႃႈ ႁူမ်ႈၸူႉႁပ်ႉတွၼ်ႈပီႊမႂ်ႇ ၼႆယဝ်ႉၶႃႈ၊ ၼင်ႇႁိုဝ်ပၢၼ်ၵဝ်ႇတေဢမ်ႇႁၢႆ လၢႆးမႂ်ႇတေၶိုတ်းၵၢပ်ႈၼၼ်ႉ တီႈႁဝ်းၶႃႈမႃးၸူႉတုမ် ႁဵတ်းပွႆးတီႈလဵဝ်ၼႆႉ တေဢဝ်တၢင်းၵႃႈတၢင်းဝႅၼ်ၵူႈပိူင် မႃးမူၼ်ႈၸႂ်ၵၼ်ၶႃႈဢေႃႈ” လၢတ်ႈၼႄၼင်ႇၼႆ။

တႃႇတေပဵၼ်မႃးပွႆးမီႊမႂ်ႇလီႈသူႈ ပွၵ်ႈၵမ်း (4) ၼႆႉ မိူဝ်ႈပူၼ်ႉမႃးၼႂ်းဝၼ်းထီႉ 25 January 2023 ၼၼ်ႉ ယူႇတီႈပီႈၼွင်ႉလီႈသူႈၶဝ် ဢွၼ်ၵၼ်ႁႃၵၼ်ႇတေႃး တူၵ်းသူးတီႈထဝ်ႈဝၢၼ်ႈထဝ်ႈၼႃး ၸွမ်းဝၢၼ်ႈၸွမ်းဝဵင်း ဢိၵ်ႇပႃးၽူႈယူႇၵူၼ်းလူင်ၼႂ်းမုၵ်ႉၸုမ်း RCSS/SSA ဢၼ်မီးၼႂ်းၼႃႈတီႈဢုပ်ႉပိူင်ႇ ၸႄႈဝဵင်းမိူင်းပၼ် ၼႆယဝ်ႉ။

တႆးလွတ်ႈလႅဝ်း