ပူဝ်ႇလႅၼ်ႇ သူင်ႇႁိူဝ်းမိၼ်ၸွႆႈယူႇၶရဵၼ်းထႅင်ႈလႄႈ ႁပ်ႉတွၼ်ႈသေႇလႅၼ်ႇသၵီႇ

ဝၢႆးသေၸွမ်ၸိုင်ႈယူႇၶရဵၼ်း ဢွၵ်ႇၶၢဝ်းတၢင်းၵႂႃႇတီႈဝဵင်းလူင်ဝေႃႈသေႃႈ (Warsaw) မိူင်းပူဝ်ႇလႅၼ်ႇလႄႈ ၽၢႆႇတၢင်းပူဝ်ႇလႅၼ်ႇၵေႃႈ လႆႈသူင်ႇႁိူဝ်းမိၼ်ၸွႆႈထႅမ်ပၼ် ယူႇၶရဵၼ်းထႅင်ႈ ဝႃႈၼႆ။

မိူဝ်ႈဝႃး ဝၼ်းထီႉ 5 April 2023 (လိူၼ်ႁႃႈလွင်ႈ 1 ၶမ်ႈ ပီႊတႆး 2117 ၼီႈ) ၸွမ်ၸိုင်ႈ ယူႇၶရဵၼ်း သေႇလႅၼ်ႇသၵီႇ လႆႈလၢတ်ႈ ဝၢႆးသေလႆႈႁပ်ႉမိၵ်ႈမၢႆဢၼ်သုင်သုတ်း လႄႈ ၵဝ်ႇၵႄႇသုတ်းၶွင်ပူဝ်ႇလႅၼ်ႇၼၼ်ႉဝႃႈ ယူႇၶရဵၼ်းတင်း ပူဝ်ႇလႅၼ်ႇ ၸုၵ်းယူႇ ႁိမ်းၶၢင်ႈၵၼ်သေ ၵမ်ႉၸွႆႈၵၼ်မႃးၼၼ်ႉ ပဵၼ်ဢၼ်ႁတ်းၸႂ်ယႂ်ႇလူင်လႄႈ ယုမ်ႇယမ်ဝႃႈ ၼႆႉပဵၼ်လွင်ႈၸမ်ၸႂ်၊ ၽွၼ်းလႆႈ၊ လွင်ႈၵႅၼ်ႇၶႅၼ် ၵိုၵ်းပိုၼ်း ဢၼ်တင်းသွင်ၸိုင်ႈမိူင်းမီးႁူမ်ႈၵၼ်ၼၼ်ႉ ဝႃႈၼႆ။

ၽၢႆႇတၢင်းၸွမ်ၸိုင်ႈပူဝ်ႇလႅၼ်ႇ လႆႈလၢတ်ႈဝႃႈ ပူဝ်ႇလႅၼ်ႇတေၽိူမ်ႉထႅမ် သိုပ်ႇႁဵတ်း သၢင်ႈ လွင်ႈယွမ်းႁပ်ႉ ၽၢႆႇလွင်ႈလွတ်ႈၽေးယူႇၶရဵၼ်း ၼႂ်းပၢင်ၵုမ်းၶိုၵ်ႉတွၼ်း NATO ဢၼ်တေၸတ်းႁဵတ်းၼႂ်းလိူၼ် July 2023 ၼႆႉဝႃႈ လွင်ႈၼႆႉ တေသၢင်ႈႁႂ်ႈတပ်ႉသိုၵ်း ယူႇၶရဵၼ်း ၵႅၼ်ႇၶႅင်ၶိုၼ်ႈမႃး ဝႃႈၼႆ။

ပူဝ်ႇလႅၼ်ႇၼႆႉ ပဵၼ်ၸိုင်ႈမိူင်းဢၼ်လွင်ႈယႂ်ႇ ၼႂ်းၵၢၼ်တိုၵ်းသူၼ်း ႁႂ်ႈမိူင်းဝၼ်းတူၵ်း ႁႃၶိူင်ႈယိပ်းၸွႆႈထႅမ်ယူႇၶရဵၼ်း တႃႇတေႃႈသူႈၸွမ်းရၢတ်ႉသျႃး မႃးတေႃႇ ထိုင်ဝၼ်း မိူဝ်ႈၼႆႉ လႄႈ ၸွမ်ၸိုင်ႈပူဝ်ႇလႅၼ်ႇၵေႃႈ ယုမ်ႇယမ်မၼ်ႈၸႂ်ဝႃႈ ယူႇၶရဵၼ်း တေပဵၼ်ၽၢႆႇလႆႈႁပ်ႉလွင်ႈဢွင်ႇပေႉ ဝႃႈၼႆ။

ၽၢႆႇတၢင်းၸွမ်ၸိုင်ႈ ယူႇၶရဵၼ်း သေႇလႅၼ်ႇသၵီႇၵေႃႈ လႆႈဢဝ်တိုဝ်ႉတၢင်းၼႆႉသေ ၽိတ်ႈမွၵ်ႈတူဝ်တႅၼ်း ၸုမ်းၵႃႉၶၢႆပူဝ်ႇလႅၼ်ႇ ႁႂ်ႈဢွၵ်ႇၶၢဝ်းတၢင်းၵႂႃႇမိူင်းယူႇၶရဵၼ်း ဢွၼ်တၢင်းပၢင်တိုၵ်းတေသုတ်းယဝ်ႉ တႃႇႁႂ်ႈပူဝ်ႇလႅၼ်ႇၶဝ်ႈထိုင်လွၵ်းၵၢတ်ႇ ဢွၼ်တၢင်းသုတ်း ဢွၼ်တၢင်းတေတႄႇမုၼ်းလႅင်းၸိုင်ႈမိူင်း ဝၢႆးသေပၢင်တိုၵ်း သုတ်းသဵင်ႈ ဝႃႈၼႆ။

တႄႇၸဵမ်မိူဝ်ႈရၢတ်ႉသျႃးၶဝ်ႈလူမ်ႇတိုၵ်းယူႇၶရဵၼ်း မိူဝ်ႈဝၼ်းထီႉ 24 February 2022 ပူၼ်ႉမႃးၼၼ်ႉ ပူဝ်ႇလႅၼ်ႇလႆႈႁႃၶိူင်ႈယိပ်းၵွင်ႈၵၢင်ႇ ဢၼ်လွင်ႈယႂ်ႇၼႂ်းၵၢၼ် တေႃႇသူႈ ပၼ်ယူႇၶရဵၼ်း သေဢမ်ႇၵႃး ယင်းႁပ်ႉၵူၼ်းပၢႆႈၽေးသိုၵ်း ၼႂ်းမိူင်းယူႇၶရဵၼ်းလၢႆလၢၼ်ႉၵေႃႉ ယူႇၼႂ်းၵၢၼ်လုမ်းလႃးၶွင်ပူဝ်ႇလႅၼ်ႇ ဝႃႈၼႆ။

ၼႂ်းၶၢဝ်းယၢမ်းဢၼ် ၸွမ်ၸိုင်ႈသေႇလႅၼ်ႇသၵီႇ ဢွၵ်ႇၶၢဝ်းတၢင်းၵႂႃႇမိူင်းပူဝ်ႇလႅၼ်ႇ ပွၵ်ႈၵမ်းၼႆႉ ၽၢႆႇတၢင်းလူင်ပွင်ၸိုင်ႈပူဝ်ႇလႅၼ်ႇ လႆႈပိုၼ်ၽၢဝ်ႇၸွႆႈထႅမ် ႁိူဝ်းမိၼ် လိုပ်ႈလမ်းပၼ်ယူႇၶရဵၼ်းထႅင်ႈ 10 လမ်းလႄႈ ဢွၼ်တၢင်းၼႆႉၵေႃႈ လႆႈသူင်ႇၸွႆႈ ထႅမ်ၵႂႃႇယဝ်ႉ 4 လမ်း ဝႃႈၼႆ။

ၼွၵ်ႈလိူဝ်သေၼႆႉ ၽၢႆႇတၢင်းသပဵၼ်ႇ လႆႈလၢတ်ႈဝႃႈ ၵႃးၵၢပ်ႇလဵၵ်း Leppard 2 A4 တေလုၵ်ႉတီႈသပဵၼ်ႇသေ မုင်ႈၼႃႈၵႂႃႇမိူင်းယူႇၶရဵၼ်း ဝၢႆးၵၢင်လိူၼ် April 2023 ၼႆႉ လႄႈ ထိူင်းလိူဝ်သေလႆႈဝၢင်းၽႅၼ်ဝႆႉ ယွၼ်ႉသပဵၼ်ႇလႆႈၽိုၵ်းပၼ်ၵူၼ်းသိုၵ်းတႃႇ 40 ၵေႃႉ လႄႈ ၵူၼ်းမႄးၶိူင်ႈၸၢၵ်ႈ 15 ၵေႃႉ တႃႇၸႂ်ႉတိုဝ်းလႄႈ လုမ်းလႃး ၵႃးၵၢပ်ႇလဵၵ်း သေဢမ်ႇၵႃး ၵျႃႇမၼီႇ လႄႈ ပူဝ်ႇလႅၼ်ႇ ဢိၵ်ႇတင်း သပဵၼ်ႇ ယင်းမီးၵႃးၵၢပ်ႇလဵၵ်း Leppard 2 ထႅင်ႈ 48 လမ်း ဢၼ်တေသူင်ႇပၼ်ယူႇၶရဵၼ်း ဝႃႈၼႆ။

တႆးလွတ်ႈလႅဝ်း