ပူႇတိၼ်ႇ ပိုၼ်ၽၢဝ်ႇၵိုတ်းလိုဝ်ႈ ၶေႃႈတူၵ်းလူင်း ၵၢၼ်ၵုမ်းထိင်း ၼိဝ်းၶလီးယႃးႁူမ်ႈၵၼ်တင်း ဢမေႇရိၵၢၼ်ႇ

ပူႇတိၼ်ႇ ပိုၼ်ၽၢဝ်ႇ ၵိုတ်းလိုဝ်ႈၵၢၼ်ၶဝ်ႈႁူမ်ႈၸွမ်း လွင်ႈၵုမ်းထိင်းၼိဝ်းၶလီးယႃး ဢၼ်ႁဵတ်းလိၵ်ႈႁူမ်ႈမၢႆ ႁူမ်ႈၵၼ်တင်း ဢမေႇရိၵၢၼ်ႇၼၼ်ႉ ၼႆယဝ်ႉ။

မိူဝ်ႈဝၼ်းထီႉ 21 February 2023 (လိူၼ်သီႇမႂ်ႇ 3 ၶမ်ႈ ပီႊတႆး 2117 ၼီႈ) ၸွမ်ၸိုင်ႈရၢတ်ႉသျႃး ဝလႃႇတီႇမီရ်ႇ ပူႇတိၼ်ႇ လၢတ်ႈဝႃႈ ရၢတ်ႉသျႃးၼၼ်ႉ တေဢမ်ႇၵိုင်ႉၵၢင်ႉထွၼ်တူဝ်ဢွၵ်ႇ ၼႂ်းလိၵ်ႈႁူမ်ႈမၢႆ New START treaty  ယၢမ်းၼႆႉ ၵူၺ်းၵႃႈ ရၢတ်ႉသျႃးၼၼ်ႉၵေႃႈ ထုၵ်ႇလီႁၢင်ႈႁႅၼ်းၵၢၼ်ၸၢမ်းယိုဝ်း မၵ်ႇၼိဝ်းၶလီးယႃးၶိုၼ်းယဝ်ႉ သင်ဢမေႇရိၵၢၼ်ႇ ႁဵတ်းမိူၼ်ၵၼ် ဝႃႈၼႆ။

ၽွင်းလူင်ၽၢႆႇၼွၵ်ႈမိူင်း ဢမေႇရိၵၢၼ်ႇၵေႃႈ လႆႈလၢတ်ႈထိုင်ၶိုၼ်း လွင်ႈဢၼ်ပူႇတိၼ်ႇလၢတ်ႈမႃးၼၼ်ႉယူႇဝႃႈ လီသေလၢႆလႄႈပဵၼ်လွင်ႈႁဵတ်းသၢင်ႈ ဢၼ်ဢမ်ႇမီးၵၢၼ်ဢဝ်ပုၼ်ႈၽွၼ်းတေႉတေႉ ၸိူင်ႉႁိုဝ်ၵေႃႈလီ ဢမေႇရိၵၢၼ်ႇၵေႃႈ တေပၵ်းတႃပႂ်ႉတူၺ်းၶိုတ်းၶိုတ်းၸမ်ၸမ်ယူႇ၊ ႁပ်ႉႁွင်းဝႃႈ ဢမ်ႇဝႃႈတေပဵၼ်ၼႂ်းငဝ်းလၢႆးၸိူင်ႉႁိုဝ်မႃး တေႁဵတ်းႁႂ်ႈသၢင်ႇထုၵ်ႇယူႇ တွၼ်ႈတႃႇလွင်ႈလွတ်ႈၽေးမိူင်းႁဝ်း လႄႈ မိူင်းဢူၺ်းလီႁဝ်းၼၼ်ႉ ဝႃႈၼႆ။

ၽၢႆႇတၢင်းဢမေႇရိၵၢၼ်ႇၼၼ်ႉၵေႃႈယိုၼ်ယၼ်ဝႃႈ ၽွမ်ႉတႃႇဢုပ်ႇဢူဝ်းၸွမ်းရၢတ်ႉသျႃး လွင်ႈမၵ်းတမ်း ၶိူင်ႈၵွင်ႈၵၢင်ႇၼိဝ်းၶလီးယႃးၼႆႉမႃးယူႇတႃႇသေႇ သမ်ႉဝႃႈၽွင်းၼႆႉ မိူင်းဢူၺ်းလီမိူင်းဝၼ်းတူၵ်း ဢၼ်မီးဢမေႇရိၵၢၼ်ႇပဵၼ်ၽူႈၼမ်း ဢၼ်တိုၵ်ႉၵမ်ႉထႅမ်ပၼ် ၶိူင်ႈၵွင်ႈၵၢင်ႇယူႇၶရဵၼ်းၼၼ်ႉယူႇ ၵေႃႈယဝ်ႉ။

ဢမေႇရိၵၢၼ်ႇလႄႈရၢတ်ႉသျႃး လႆႈႁူမ်ႈၵၼ်ႁဵတ်းလိၵ်ႈႁူမ်ႈမၢႆ လွင်ႈၵၢၼ်ၵုမ်းထိင်းၼိဝ်းၶလီးယႃး ၶွင်တင်းသွင်ၸိုင်ႈမိူင်းၼၼ်ႉမႃး ၸဵမ်မိူဝ်ႈပီႊ 2010 လႄႈ လႆႈမီးၶေႃႈတူၵ်းလူင်းႁူမ်ႈၵၼ်ဝႆႉ တင်းသွင်ၸိုင်ႈမိူင်းၼၼ်ႉ တေဢမ်ႇလႆႈမီးႁူဝ်တိုၵ်းၼိဝ်းၶလီးယႃးပူၼ်ႉလိူဝ် 1,550 လုၵ်ႈ လႄႈ လိၵ်ႈႁူမ်ႈမၢႆၼႆႉ တေသုတ်းသဵင်ႈၵႂႃႇၼႂ်းပီႊ 2026 ၼႆယဝ်ႉ။

တႆးလွတ်ႈလႅဝ်း