ပၢင်တိုၵ်းတီႈမိူင်းပၢႆး သွင်ၽၢႆႇမီးလွင်ႈတူၵ်းသုမ်းၼမ်

မိူဝ်ႈဝၼ်းထီႉ 2 October 2022 (လိူၼ်သိပ်းဢဵတ်းမႂ်ႇ 8 ၶမ်ႈ ပီႊတႆး 2116 ၼီႈ) ၸုမ်းၵႅတ်ႇၶႄၵူၼ်းမိူင်း PDF မိူင်းပၢႆး ပိုၼ်ၽၢဝ်ႇၵႂႃႇဝႃႈ လႆႈပဵၼ်ပၢင်တိုၵ်းၵၼ်တင်း ၸုမ်းသိုၵ်းမၢၼ်ႈ ယိုတ်းဢၢမ်းၼၢတ်ႈ တီႈဝဵင်းမိူင်းပၢႆး ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း ႁိမ်းလႅၼ်လိၼ် တႆး-ယၢင်းလႅင် ႁၢဝ်ႈႁႅင်း တင်ႈတႄႇ ဝၼ်းထီႉ 8 September 2022 ၼၼ်ႉမႃးသေ သွင်ၽၢႆႇမီးလွင်ႈတူၵ်းသုမ်းမၢတ်ႇၸဵပ်းၼမ်ဝႆႉ ဝႃႈၼႆ။

ၼႂ်းၶၢဝ်းတၢင်းပၢင်တိုၵ်း တင်ႈတႄႇဝၼ်းထီႉ 8 September 2022 တေႃႇထိုင် ဝၼ်းထီႉ 2 October 2022 ၼႆႉ ၽၢႆႇသိုၵ်းမၢၼ်ႈ တူၵ်းသုမ်းဢမ်ႇယွမ်း 80 ၵေႃႉ မၢတ်ႇၸဵပ်း တင်းၼမ်၊ ၽၢႆႇတပ်ႉႁူမ်ႈပွင်း PDF ၵေႃႈ တူၵ်းသုမ်း 9 ၵေႃႉ၊ မၢတ်ႇၸဵပ်း 104 ၵေႃႉ ၼႂ်းၼၼ်ႉ တႃႇ 10 ၵေႃႉ လီလႆႈမႆႈၸႂ်ဝႆႉ ဝႃႈၼႆ။

ၽၢႆႇတပ်ႉႁူမ်ႈပွင်း ဢၼ်လႆႈတူၵ်းသုမ်းၵႂႃႇ 9 ၵေႃႉၼၼ်ႉ ပဵၼ်ၵူၼ်းၼႂ်းၸုမ်း PDF မိူင်းပၢႆး 6 ၵေႃႉ၊ PDF ၽၢႆၶုၼ်ႇ 1 ၵေႃႉ လႄႈ ၼႂ်းၸုမ်း URF 2 ၵေႃႉ ဝႃႈၼႆ။

ၼွၵ်ႈလိူဝ်သေၼၼ်ႉ ယွၼ်ႉသိုၵ်းမၢၼ်ႈ ယိုဝ်းမၢၵ်ႇလူင် ၵႃႈပွင်ႇၵႃႈပဵၼ်သေ ႁဵတ်းႁႂ်ႈမၢၵ်ႇလူင်တိူဝ်ႉသႂ်ႇၺႃးၵူၼ်းမိူင်း လူႉသဵင်ႈတၢႆ 6 ၵေႃႉ မၢတ်ႇၸဵပ်း 13 ၵေႃႉ၊ ၼႂ်းၵူၼ်းမိူင်းဢၼ်လႆႈလူႉသဵင်ႈတၢႆၵႂႃႇၼၼ်ႉ ပႃးလုၵ်ႈဢွၼ်ႇ 10 ၶူပ်ႇလူင်းတႂ်ႈ 3 ၵေႃႉ ၼႆယဝ်ႉ။

ၼႂ်းပၢင်တိုၵ်းၼၼ်ႉ ၽၢႆႇတပ်ႉႁူမ်ႈပွင်း တိုၵ်းသိမ်းလႆႈ ၶိူင်ႈယိပ်းၵွင်ႈၵၢင်ႇ သိုၵ်းမၢၼ်ႈၵမ်ႈၽွင်ႈ ယၢမ်းၽွင်းတေႃႈလဵဝ်ၵေႃႈ တပ်ႉႁူမ်ႈပွင်း PDF လႄႈ သိုၵ်းမၢၼ်ႈ တိုၵ်ႉၶဵင်ႈၶႅင်ၵၢၼ်သိုၵ်းတေႃႇၵၼ်ယူႇ၊ ၸွမ်းၸိူဝ်းႁိမ်းႁွမ်း ဢွင်ႈတီႈပဵၼ်ပၢင်တိုၵ်းၵၼ်ၼၼ်ႉၵေႃႈ ၽၢႆႇသိုၵ်းမၢၼ်ႈ ႁၢင်ႈၵၢင်မၢၵ်ႇဝႆႉတင်းၼမ်၊ ၵွပ်ႈပိူဝ်ႈၼၼ်လႄႈ ၵူၼ်းမိူင်းဢမ်ႇပႆႇထုၵ်ႇလီလတ်းၽၢၼ်ႇၵႂႃႇမႃး ၼႆယဝ်ႉ။

တႆးလွတ်ႈလႅဝ်း