ပၢင်တိုၵ်းယူႇၶရဵၼ်း မီးတိုဝ်ႉတၢင်းၵိုတ်းယိုတ်းလႆႈ ၼႂ်းပီႊ 2025

မိူဝ်ႈၼႂ်းဝၼ်းထီႉ 9 October 2024 (လိူၼ်သိပ်းဢဵတ်းမႂ်ႇ 7 ၶမ်ႈ  ပီႊတႆး 2118 ၼီႈ) ၼၼ်ႉ ၸွမ်ၸိုင်ႈယူႇၶရဵၼ်း သေႇလႅၼ်ႇသၵီႇ လႆႈလၢတ်ႈဝႃႈ ငဝ်းလၢႆးပၢင် တိုၵ်းယၢမ်းလဵဝ် ႁဵတ်းႁႂ်ႈႁၼ်ထိုင်တိုဝ်ႉတၢင်းတႃႇၵိုတ်းယိုတ်းပၢင်တိုၵ်းၼႂ်းၵႄႈၵၢင် ယူႇၶရဵၼ်း တင်း ရၢတ်ႉသျႃး လႆႈ ၼႂ်းပီႊ 2025 သေ လၢတ်ႈထႅင်ႈဝႃႈ ယူႇၶရဵၼ်း မုင်ႈမွင်းပိုင်ႈဢိင်လွင်ႈၵမ်ႉၸွႆႈတီႈမိူင်းဢူၺ်းလီ ပိူင်လူင်မုင်ႈမွင်းတီႈ မိူင်းဢမေႇရိၵၢၼ်ႇ ဝႃႈၼႆ။

ၼႂ်းလိူၼ် October, November လႄႈ December ၼႆႉ ႁဝ်းမီးတိုဝ်ႉတၢင်း တႃႇလႅၵ်ႈ လၢႆႈငဝ်းလၢႆးပၢင်တိုၵ်း ႁႂ်ႈယၢင်ႇသူႇၸူး လွင်ႈငမ်းယဵၼ် လႄႈ လွင်ႈၼိမ်သဝ်းၶၢဝ်းယၢဝ်းလႆႈသေ ငဝ်းလၢႆးၼႂ်းပၢင်တိုၵ်းယၢမ်းလဵဝ်ၼႆႉၵေႃႈ သၢင်ႈပၼ် သဵၼ်ႈတၢင်းလိူၵ်ႈ “လိူၵ်ႈပုတ်းၶၢတ်ႇ တႃႇၵိုတ်းယိုတ်းပၢင်တိုၵ်းၼႂ်းပီႊ 2025” လႄႈ တေဢမ်ႇထိူင်းလိူဝ်သေၼၼ်ႉၼႆ သေႇလႅၼ်ႇသၵီႇ သိုပ်ႇလၢတ်ႈထႅင်ႈၼင်ႇၼႆ။

ၵဵဝ်ႇလူၺ်ႈလွင်ႈၼႆႉၵေႃႈ ၸွမ်ၸိုင်ႈယူႇၶရဵၼ်း သေႇလႅၼ်ႇသၵီႇ ဢမ်ႇလႆႈလၢတ်ႈပႃး ယွၼ်ႉလွင်ႈတၢင်းၸိူင်ႉႁိုဝ်သေ ႁၼ်တိုဝ်ႉတၢင်းတႃႇၵိုတ်းယိုတ်းလႆႈပၢင်တိုၵ်း ၵွပ်ႈဝႃႈတေႃႈလဵဝ် ရၢတ်ႉသျႃး ယင်းတိုၵ်ႉယိုတ်းသိမ်းဝႆႉလႅၼ်လိၼ်မိူင်းယူႇၶရဵၼ်း ၼပ်ႉပဵၼ်ႁူဝ်ပၢၵ်ႇသၢဝ်း 20% ၶွင်ၸိုင်ႈမိူင်းယူႇၶရဵၼ်း ၼႆယဝ်ႉ။

ၽၢႆႇတၢင်း သေႇလႅၼ်ႇသၵီႇၵေႃႈ ၶတ်းၸႂ်တုၵ်းယွၼ်းမိူင်းဢူၺ်းလီ ႁႂ်ႈပၼ်ၶႂၢင်ႉ ယူႇၶရဵၼ်းၸႂ်ႉတိုဝ်းၶိူင်ႈယိပ်းသႅၼ်းယိုဝ်းၵႆၶွင်မိူင်းဝၼ်းတူၵ်း ယိုဝ်းပဝ်ႉမၢႆဢၼ်ယူႇလိုၵ်ႉၶဝ်ႈၵႂႃႇၼႂ်းမိူင်းရၢတ်ႉသျႃး ၼႆယူႇ။

လွင်ႈၼႆႉ သေႇလႅၼ်ႇသၵီႇ ဢွၵ်ႇမႃးလၢတ်ႈဢွၼ်ၼႃႈ တေထိုင်ပၢင်လိူၵ်ႈတင်ႈ မိူင်းဢမေႇရိၵၢၼ်ႇ ၼႂ်းဝၼ်းထီႉ 5 November 2024 ဢၼ် တေၸၢင်ႈႁဵတ်းႁႂ်ႈ  Donald Trump ၶိုၼ်ႈပဵၼ်ၸွမ်ၸိုင်ႈလႆႈထႅင်ႈပၢၼ်ၼိုင်ႈ ဝႃႈၼႆ။

Donald Trump ယၢမ်ႈလၢတ်ႈဝႆႉဝႃႈ သင်ၸိူင်ႉမၼ်းလႆႈၶိုၼ်ႈပဵၼ်ၸွမ်ၸိုင်ႈဢမေႇရိ ၵၢၼ်ႇထႅင်ႈပေႃးၼႆၸိုင်ႈ မၼ်းတေၵိုတ်းယိုတ်းပၢင်တိုၵ်း ရၢတ်ႉသျႃး တင်း ယူႇၶ ရဵၼ်း ႁႂ်ႈဝႆးတီႈသုတ်း လွင်ႈၼႆႉၽၢႆႇၵမ်ႉထႅမ်ယူႇၶရဵၼ်းၶဝ်ၵေႃႈ ဢွၼ်ၵၼ်ၵူဝ်ဝႃႈ ယူႇၶရဵၼ်း တေၸၢင်ႈထုၵ်ႇတဵၵ်းႁႂ်ႈၸုၼ်ႉလႅၼ်လိၼ်မိူင်း တႃႇလႅၵ်ႈၵၼ်တင်း လွင်ႈငမ်းယဵၼ် ၼႆယဝ်ႉ။

တႆးလွတ်ႈလႅဝ်း