မုၵ်ႉၸုမ်းၶွင်ႇသီႇဢဝ်ၶိုၼ်းၸိုင်ႈတႆး (RCSS) လႄႈ ပီႈၼွင်ႉၸိူဝ်းၵိုတ်းပႃႈလင် လႆႈပူၼ်ႉၶၢပ်ႈတူဝ် ႁႅၼ်းသွမ်းလူႇတၢၼ်းပၼ် ၽူႈၸိူဝ်းဢၼ်လႆႈလူႉသဵင်ႈသၢႆၸႂ်ၵႂႃႇ ယွၼ်ႉၽေးသၽႃႇဝၼမ်ႉၼွင်းလူၵ်ႈထူမ်ႈ တီႈငဝ်ႈၸိုင်ႈလွႆတႆးလႅင်းၼၼ်ႉ ဝႃႈၼႆ။

မိူဝ်ႈၼႆႉဝၼ်းထီႉ 11 July 2022 (လိူၼ်ပႅတ်ႇမႂ်ႇ  14 ၶမ်ႈ ပီႊတႆး 2116 ၼီႈ) ယူႇတီႈမုၵ်ႉၸုမ်း ၶွင်ႇသီႇဢဝ်ၶိုၼ်းၸိုင်ႈတႆး (RCSS) လႄႈ ၸဝ်ႈၽူဝ်၊ လုၵ်ႈလၢင်းၼၢင်းမေး၊ ပေႃႈမႄႈပီႈၼွင်ႉ ၸိူဝ်းၵိုတ်းပႃႈၼွင်ႈပႃႈလင် ႁူမ်ႈၵၼ်သေ ၸတ်းႁဵတ်းပၼ်ပၢင်မႃႇသႃႇ ပူၼ်ႉတူဝ်  ဢၼ်ပဵၼ်မႄႈထဝ်ႈမူၺ်း ဢႃႇယု 66 ပီႊ၊ ၼၢင်းသႅၼ်ၽူၺ်း 35 ပီႊ၊ ၸၢႆးလႅင်းဝၼ်း 32 ပီႊ၊ ၸၢႆးၵွင်လႅင်း 18 ပီႊ ၸိူဝ်းဢၼ်လႆႈလူႉသဵင်ႈသၢႆၸႂ်ၵႂႃႇ ယွၼ်ႉၽေးသၽႃႇဝ ၼမ်ႉၼွင်းလူၵ်ႈထူမ်ႈ ၼႂ်းဝၼ်းထီႉ 9 July 2022 ဢိၵ်ႇပႃး ‌‌‌ပေႃႈၶ ဢႃႇယူႉ 38 ပီႊ ဢၼ်လႆႈလူႉသဵင်ႈယွၼ်ႉ တၢင်းပဵၼ်ၼၼ်ႉ ဝႃႈၼႆ။

ပၢင်မႃႇသႃႇပူၼ်ႉၶၢပ်ႈတူဝ်ၼႆႉ   ယၢမ်းၵၢင်ၼႂ် 09:30 မူင်း  ဢွၼ်ၵၼ်ႁပ်ႉထွမ်ႇလိၵ်ႈထမ်းတြႃးၸဝ်ႈသေ ထိုင်ယၢမ်း 13:00 မူင်း ၸင်ႇပူၼ်ႉတူဝ်သေ ၸုတ်ႇၽဝ်ၶၢပ်ႈတူဝ်ၵႂႃႇ တီႈပႃႇႁဵဝ်ႈ (ၵွင်းၽူႈႁတ်းႁၢၼ်) ငဝ်ႈၸိုင်ႈလွႆတႆးလႅင်းၼႆယဝ်ႉ။

ဝၼ်းထီႉ 11 July 2022 မိူဝ်ႈၼႆႉၵူၺ်းၼင်ႇၵဝ်ႇ မီးၽူႈမီးၼမ်ႉၸႂ် ၸုမ်းၸွႆႈၵူၼ်းထူပ်းၽေးလွႆၶူး  မႃးၸွႆႈထႅမ်ၶူဝ်းၶွင် မိူၼ်ၼင်ႇ ၽႃႈႁူမ်ႇၶူဝ်းၼွၼ်း၊ ၶူဝ်းၼုင်ႈတၢင်းမႆ၊ မေႃႈၶဝ်ႈဝၢၼ်ႇၽၵ်း ဢိၵ်ႇပႃး ၶိူင်ႈၶွင်ၵိၼ်ယႅမ်ႉ မိူၼ်ၼင်ႇ ၶႆႇၵႆႇ၊ ပႃဢႅပ်ႇ၊ ၶဝ်ႈသွႆႈမမ၊ ၼမ်ႉၵိၼ်၊ ၶဝ်ႈမုၼ်းၶဝ်ႈပွင်း၊ ၼမ်ႉၼူမ်း၊ မၢၵ်ႇမႆႉ လႄႈ ၶိူင်ႈၵိရိယႃႇၶဝ်ႈၽၵ်း၊ ၶူဝ်းၶွင်ၸႂ်ႉတိုဝ်းထႅင်ႈလၢႆလၢႆပိူင် တႃႇၵႃး 3 လမ်း ၼႆယဝ်ႉ။

တႆးလွတ်ႈလႅဝ်း