ပၢင်သွၼ်လိၵ်ႈတႆးၶၢဝ်းမႆႈ တီႈၵွင်းမုင်ႈမိူင်း ယဝ်ႉတူဝ်ႈလီငၢမ်း

ပၢင်သွၼ်လိၵ်ႈတႆးၶၢဝ်းမႆႈ ဢၼ်ႁူင်းႁဵၼ်းၸိူဝ်ႉၸၢတ်ႈ ၵွင်းမုင်ႈမိူင်း လႆႈပိုတ်ႇသွၼ် ပၼ်ၶၢဝ်းတၢင်း 1 လိူၼ်ၼၼ်ႉ ပဵၼ်ဢၼ်ယဝ်ႉတူဝ်ႈလီငၢမ်း ၼႆယဝ်ႉ။

မိူဝ်ႈဝႃးဝၼ်းထီႉ 26 May 2024 (လိူၼ်ႁူၵ်းလွင်ႈ 4 ၶမ်ႈ ပီႊတႆး 2118 ၼီႈ) ၼၼ်ႉ ယူႇတီႈႁူင်းႁဵၼ်းၸိူဝ်ႉၸၢတ်ႈ ၵွင်းမုင်ႈမိူင်း လႆႈၸတ်းႁဵတ်းပၢင်လူင်းၵၢၼ်သွၼ် လိၵ်ႈတႆးၶၢဝ်းမႆႈ ဢၼ်လႆႈပိုတ်ႇသွၼ်မႃးၶၢဝ်းတၢင်း 1 လိူၼ်ၼၼ်ႉလႄႈ မီးသင်ႇၶ ၸဝ်ႈ၊ ပေႃႈမႄႈၵူၼ်းမိူင်း ဢိၵ်ႇ လုၵ်ႈႁဵၼ်းၶဝ်ႈႁူမ်ႈတင်းၼမ်သေ ၸင်ႇလႆႈယိုၼ်ႈ မွပ်ႈပၼ်သူးလုၵ်ႈႁဵၼ်း ၸိူဝ်းဢၼ်တွပ်ႇလႆႈဝၢၵ်ႈလီ ၼိုင်ႈၸၼ်ႉလႂ် 2 ၵေႃႉ ၼႆယဝ်ႉ။

ပၢင်သွၼ်လိၵ်ႈတႆးၶၢဝ်းမႆႈ ဢၼ်ႁူင်းႁဵၼ်းၸိူဝ်ႉၸၢတ်ႈ ၵွင်းမုင်ႈမိူင်း လႆႈပိုတ်ႇသွၼ် ပၼ်ၼၼ်ႉ လႆႈတႄႇမိူဝ်ႈဝၼ်းထီႉ 27 April 2024 ထိုင် မိူဝ်ႈဝၼ်းထီႉ 26 May 2024 သေ လႆႈတႄႇသွၼ်ပၼ်လုၵ်ႉတီႈ ၸၼ်ႉဢွၼ်ႇ တေႃႇပေႃးထိုင် ၸၼ်ႉ 2 လႄႈ မီးလုၵ်ႈတင်းမူတ်း 108 ၵေႃႉ၊ ၶူးသွၼ် 7 ၵေႃႉ ဝႃႈၼႆ။

ယိူင်းဢၢၼ်းဢၼ်လႆႈပိုတ်ႇသွၼ်လိၵ်ႈတႆးၶၢဝ်းမႆႈၼႆႉ တႃႇႁႂ်ႈလုၵ်ႈလၢၼ်တႆး ၸိူဝ်း ဢမ်ႇလႆႈၶိုၼ်ႈႁူင်းႁဵၼ်းတႆးၼၼ်ႉ ပေႃးတေႁူႉမေႃလိၵ်ႈတႆး၊ ၾိင်ႈငႄႈၾိင်ႈထုင်း လႄႈ ၵုင်ႇမုၼ်ပေႃႈမႄႈၸဝ်ႈၵေးၸူး ၼႆယူႇယဝ်ႉ။

တႆးလွတ်ႈလႅဝ်း