ပၢင်ဢုပ်ႇဢူဝ်း RCSS တင်း SAC ယဝ်ႉတူဝ်ႈလီငၢမ်း

မိူဝ်ႈၼႆႉဝၼ်းထီႉ 26 January 2023 (လိူၼ်သၢမ်မႂ်ႇ 6 ၶမ်ႈ ပီႊတႆး 2117 ၼီႈ) ပၢင်ဢုပ်ႇဢူဝ်းၵႄႈၵၢင် ၶွင်ႇသီႇဢဝ်ၶိုၼ်းၸိုင်ႈတႆး လႄႈ ၶွင်ႇသီႇသိုၵ်းမၢၼ်ႈ ဢၼ်ၸတ်းႁဵတ်းမႃး ၶၢဝ်းတၢင်း 3 ဝၼ်း 24-26 January 2023 တီႈၼေႇပျီႇတေႃႇၼၼ်ႉ ပဵၼ်ဢၼ်ယဝ်ႉတူဝ်ႈလီငၢမ်းသေ ၽူႈဢွၼ်ႁူဝ်သွင်ၽၢႆႇသွင်ပႃႈလႅၵ်ႈပိၼ်ႇၶွင်ၾၢၵ်ႇတွၼ်ႈၵၼ်ဝၢႆးပၢင်ဢုပ်ႇဢူဝ်းယဝ်ႉတူဝ်ႈလီငၢမ်းၵႂႃႇ။

ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး ၸွမ်သိုၵ်းလူင် ယွတ်ႈသိုၵ်း မွၵ်ႇလၢတ်ႈၶေႃႈၵႂၢမ်း ပိၵ်ႉပၢင်ဢုပ်ႇဢူဝ်းၵႂႃႇဝႃႈ− ၵၢၼ်ၵေႃႇသၢင်ႈလွင်ႈငမ်းယဵၼ် တႃႇႁႂ်ႈဝၢၼ်ႈမိူင်းၵတ်းယဵၼ်ၼိမ်မၼ်ႈၼၼ်ႉ လူဝ်ႇဢဝ်လၢႆးဢုပ်ႇဢူဝ်းၵၼ်သေ ၵေႃႇသၢင်ႈလွင်ႈယုမ်ႇယမ်ၵၼ်။ ၵၢၼ်သၢင်ႈလွင်ႈယုမ်ႇယမ်ၵၼ်ဢၼ်ဝႃႈၼႆႉ ပေႃးဢုပ်ႇဢူဝ်းၵၼ် တူၵ်းလူင်းၵၼ်ယဝ်ႉ လူဝ်ႇႁဵတ်းၸွမ်းၼၼ်ႉၵွၼ်ႇ ၸင်ႇမီးတၢင်းယုမ်ႇယမ်ၵၼ်မႃး။ ပေႃးမီးလွင်ႈယုမ်ႇယမ်ၵၼ်ၵေႃႈ ၵေႃႇသၢင်ႈလွင်ႈ ငမ်းယဵၼ်လႆႈယဝ်ႉ။ မိူင်းႁူမ်ႈတုမ်ၼႆႉ ယွၼ်ႉဢမ်ႇႁဵတ်းၸွမ်းၶေႃႈလႆႈၸႂ် လိၵ်ႈႁူမ်ႈမၢႆပၢင်လူင် မိူဝ်ႈ 1947 ၼၼ်ႉမႃးလႄႈ လႆႈလွတ်ႈလႅဝ်းၵွၼ်းၶေႃမႃး သေတႃႉ ဝၢၼ်ႈမိူင်းဢမ်ႇၼိမ်သဝ်း ဢမ်ႇၵတ်းယဵၼ် ပဵၼ်ပၢင်တိုၵ်းသိုၵ်းသိူဝ် ၼႂ်းမိူင်း ႁၢၼ်ႉတေႃႇဝၼ်းမိူဝ်ႈၼႆႉယဝ်ႉ။

ၵႂၢမ်းထုင်းမိူဝ်ႈၵွၼ်ႇမီးဝႆႉဝႃႈ ၵူၼ်းၼႂ်းႁိူၼ်းၽိတ်းမေႃးၵၼ် ႁိူၼ်းႁိမ်းၶၢင်ႈ ၸၢင်ႈႁဵတ်းဢဝ်ၼမ်ႉတွၼ်း၊ ၸိူဝ်ႉၶိူဝ်းလဵဝ်ၽိတ်းၵၼ် တၢင်ႇၶိူဝ်းၸၢင်ႈဢဝ် ၼမ်ႉတွၼ်းၼႂ်းၵႄႈမၼ်း၊ ၵူၼ်းမိူင်းလဵဝ်ၵၼ်ၽိတ်းၵၼ် တၢင်ႇမိူင်းၸၢင်ႈၶဝ်ႈၸိမ် ဢဝ်ၼမ်ႉတွၼ်းမၼ်း ၼၼ်ႉယဝ်ႉ။ ၵွပ်ႈၼႆလႄႈ မိူင်းႁူမ်ႈတုမ်ႁဝ်းဝၼ်းမိူဝ်ႈၼႆႉ လႆႈလွတ်ႈလႅဝ်းၵွၼ်းၶေႃမႃး ၶၢဝ်းတၢင်း 75 ပီႊယဝ်ႉသေတႃႉ ႁဝ်းဢမ်ႇသၢင်ႈလွင်ႈ ယုမ်ႇယမ်ၵၼ်၊ ဢမ်ႇပၼ်သုၼ်ႇလႆႈၽဵင်ႇပဵင်းၵၼ်လႆႈပေႃးၼႆၸိုင် ႁဵတ်းႁႂ်ႈဝၢၼ်ႈမိူင်းလူႉလႅဝ်ၵႂႃႇၼၼ်ႉယဝ်ႉ။ ယွၼ်ႉၼၼ် ၼင်ႇႁိုဝ်မိူင်းႁူမ်ႈတုမ်လူင် ႁဝ်း ဢမ်ႇလႆႈလူႉလႅဝ်တႅၵ်ႇယၢႆႈၵႂႃႇၼၼ်ႉ ၶႂ်ႈယွၼ်းတိုၵ်းသူၼ်းၵူႈၽၢႆႇၽၢႆႇ ယႃႇဢဝ် လေႃးၽ တေႃးသ မႃႇၼသေ ၶႂ်ႈလႆႈၵေႃႉလဵဝ် ၵိၼ်ၵေႃႉလဵဝ် ၶိူဝ်းလဵဝ်ၵူၺ်း ၼႆယူႇ။

ၼင်ႁိုဝ်ဝၢၼ်ႈမိူင်းတေၵတ်းယဵၼ်ၼိမ်သဝ်းၵႂႃႇၼၼ်ႉ တူၺ်းလွင်ႈၽဵင်ႇပဵင်းသေ ႁတ်းၸႅၵ်ႇၽႄဢႃႇၼႃႇၵၢၼ်ၽွင်းငမ်းၼႆၸိုင် မိူင်းႁူမ်ႈတုမ်လူင်ႁဝ်း တေၶိုၼ်ႈယႂ်ႇ မႂ်ႇသုင်ၵတ်းယဵၼ်ဢမ်ႇႁၢင်ႉ။ ၽွင်းၵေႃႇသၢင်ႈလွင်ႈငမ်းယဵၼ်ၼႆႉ ၶၢဝ်းယၢမ်းၵေႃႈ ၵႃႈၶၼ်ယႂ်ႇလႄႈ ႁႂ်ႈၼပ်ႉယမ်ၶၢဝ်းယၢမ်းသေ ႁဵတ်းသၢင်ႈတႅပ်းတတ်း ၵၢၼ်ငမ်းယဵၼ်ၼႆႉၵေႃႈ ပဵၼ်ၶၢဝ်းယၢမ်းလမ်ႇလွင်ႈတေႉတေႉၼၼ်ႉၶႃႈယဝ်ႉ ၼႆ မွၵ်ႇလၢတ်ႈၶေႃႈၵႂၢမ်း ပိၵ်ႉပၢင်ဢုပ်ႇဢူဝ်းၵႂႃႇၼင်ႇၼႆ။

ၶၢဝ်းတၢင်းၼေႇပျီႇတေႃႇပွၵ်ႈၵမ်းၼႆႉ ၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈလူင် RCSS ဢွၼ်ႁူဝ် ၸုမ်းတၢင်တူဝ် ဢၼ်ပႃး ၸဝ်ႈသိုၵ်းလူင် သႅဝ်းႁၢၼ် ၽူႈၶဝ်ႈၵေႃၵမ်ၵၢၼ် ပွင်ၵၢၼ်လူင် (CEC)၊ ၸဝ်ႈသိုၵ်း ဢုမ်ႈၶိူဝ်း ၽူႈၶဝ်ႈၵေႃၵမ်ၵၢၼ်ပွင်ၵၢၼ်လူင် (CEC)၊ ၽူႈၶဝ်ႈ ၵေႃၵမ်ၵၢၼ်ဢွၼ်ႁူဝ်(CLC) ၸဝ်ႈႁၢၼ် ၼၢင်းမူဝ်းမူဝ်းၸေႃး၊ ၸဝ်ႈႁၢၼ် ၼၢင်းၸၢမ်ၽွင်း လႄႈ ၸုမ်းၵမ်ႉၸွႆႈလၢႆလၢႆၵေႃႉ ၼႆယူႇယဝ်ႉ။

တႆးလွတ်ႈလႅဝ်း