မိူင်းၶႄႇ လူင်းထုၼ်း ၼမ်သုတ်းပိူၼ်ႈ ၼႂ်းမိူင်းမၢၼ်ႈ

ယၢမ်းလဵဝ် မိူင်းလူင်းထုၼ်း ၼမ်သုတ်းပိူၼ်ႈ ၼႂ်းမိူင်းမၢၼ်ႈၼႆႉ ပဵၼ်မိူင်းၶႄႇၼႆ ၸုမ်းၵူၼ်း ၵႃႉလႄႈ ၸဝ်ႈၶွင် ႁူင်းငၢၼ်း မိူင်းမၢၼ်ႈ လၢတ်ႈၼႄ။

မိူဝ်ႈၵူႈပွၵ်ႈ မိူင်းၶႄႇ လႆႈလူင်းထုၼ်း ၼႂ်းမိူင်းမၢၼ်ႈ မီး6.4 ႁဵင်လၢၼ်ႉ တေႃႇလႃႇ၊ ၵူၺ်းၵႃႈ ထိုင်မႃး ၼႂ်းလိူၼ် January ပီႊၼႆႉ တိူဝ်းၶိုၼ်ႈမႃး မီး9.6 ႁဵင်လၢၼ်ႉ တေႃႇလႃႇလႄႈ လႆႈၶၢမ်ႈပူၼ်ႉ မိူင်းထႆး ဢၼ်လႆႈ လူင်းထုၼ်း ဝႆႉ9.5 ႁဵင်လၢၼ်ႉ တေႃႇလႃႇသေ ပဵၼ်မိူင်း လူင်းထုၼ်း ၼမ်သုတ်းပိူၼ်ႈ ၼႂ်းမိူင်းမၢၼ်ႈ။

မိူင်းၶႄႇ လႆႈလူင်း ထုၼ်းဝႆႉ ၼႂ်းၶူင်းၵၢၼ် 30ဢၼ် ၼႂ်းမိူင်းမၢၼ်ႈ၊ ၶူင်းၵၢၼ် ၵမ်ႈၼမ် တေၵဵဝ်ႇၵပ်း ၼမ်ႉမၼ်း မဵၼ်လႄႈ ထၢတ်ႈ ၵႅတ်ႉ သၽႃႇဝ၊ ၶူင်းၵၢၼ် ယႂ်ႇသုတ်း ပိူၼ်ႈၼႆႉ ပဵၼ်ဢၼ် မိူင်းၶႄႇ တေသိုပ်ႇ လွတ်ႇတေႃႈၵႅတ်ႉ လုၵ်ႉဝဵင်း ၵျွၵ်ႉၽိဝ်ႇ မိူင်းရၶႅင်ႇ ထိုင်ဝဵင်း ၶုၼ်းမိင် မိူင်းယူႇၼၢၼ်ႇ ၼၼ်ႉဝႃႈၼႆ။

ထိုင်လိူၼ် November ပီႊၵၢႆၼႆႉ မိူင်းထႆး ပဵၼ်မိူင်း လူင်းထုၼ်း ၼမ်သုတ်းပိူၼ်ႈ ၼႂ်းမိူင်းမၢၼ်ႈ တႃႇၶၢဝ်းတၢင်း 7ပီႊပူၼ်ႉမႃး၊ မိူဝ်ႈၼၼ်ႉ မိူင်းၶႄႇ ပဵၼ်မိူင်း ထိသွင်ၵူၺ်း၊ တင်ႈတႄႇ ပီႊ2006 မႃးၼၼ်ႉ မိူင်းထႆး လႆႈလူင်းထုၼ်း ၼႂ်းမိူင်းမၢၼ်ႈ ၼႂ်းၶူင်းၵၢၼ် ၵဵဝ်ႇၵပ်း ၼမ်ႉမၼ်း မဵၼ်လႄႈ ထၢတ်ႈၵႅတ်ႉ သၽႃႇဝ ၼႆယူႇ။

မိူင်းၸိူဝ်း လူင်းထုၼ်း ၼႂ်းမိူင်းမၢၼ်ႈ ၼမ်သုတ်းၼႆႉ ပေႃးၶပ်ႉ ယႆၵၼ် လူင်းၵႂႃႇၸိုင် ပဵၼ်မိူင်းၶႄႇ၊ မိူင်းထႆး၊ ႁွင်ႇၵွင်ႇ၊ မိူင်းၵူဝ်း ရီးယိူဝ်းၸၢၼ်း၊ မိူင်းဢမေႇ ရိၵၼ်ႇလႄႈ မိူင်းသိင်း ၵပူဝ်း ဝႃႈၼႆ။

မိူဝ်ႈႁၢင်လိူၼ် January ၼႆႉၵူၺ်း မိူင်းၶႄႇ လႆႈလူင်းထုၼ်း ၼႂ်းၽၢႆႇ ႁူင်းၾႆးၾႃႉ ၸႂ်ႉႁႅင်းၼမ်ႉ၊ ၼမ်ႉမၼ်း မဵၼ်လႄႈ ထၢတ်ႈၵႅတ်ႉ သၽႃႇဝ တႃႇငိုၼ်း 3 ႁဵင်လၢၼ်ႉ တေႃႇလႃႇ။

ဢၼ်ၼွၵ်ႈ မိူင်းၶဝ် လႆႈလူင်းထုၼ်း ၼႂ်းမိူင်း မၢၼ်ႈၼၼ်ႉ 42%ၼႆႉ လူင်းထုၼ်း ၽၢႆႇၼမ်ႉမၼ်း မဵၼ်လႄႈ ထၢတ်ႈ ၵႅတ်ႉ သၽႃႇဝ၊ 36%ၼႆႉ လူင်းထုၼ်း ၽၢႆႇႁူင်း ၾႆးၾႃႉ ၸႂ်ႉႁႅင်းၼမ်ႉ၊ 8%ၼႆႉ လူင်းထုၼ်း ၽၢႆႇၶုတ်ႈႁႄႈ ၼႆယူႇ။

ၵႃႈၶၼ် ၵႃႉၶၢႆ ၼႂ်းၵႄႈ မိူင်းမၢၼ်ႈ မိူင်းၶႄႇ ပီႊၵၢႆၼႆႉ မႅၼ်ႈငိုၼ်း 10,213 လၢၼ်ႉပျႃး ဝႃႈၼႆ။

ၶေႃႈမုၼ်း တီႈMizzima။