မုၼ်ၸဝ်ႈထုၵ်ႇၺႃးယိုဝ်းတၢႆ ၼႂ်းၵျွင်း

ၵူၼ်းဢမ်ႇႁူႉၵေႃႉ/ၸုမ်း ပဵၼ်ၽုင်သေၶဝ်ႈၵႂႃႇယိုဝ်းတၢႆပႅတ်ႈ ၸဝ်ႈၼင်ႈၵျွင်း တီႈဝၢၼ်ႈသီႇလၵ်း ဢိူင်ႇယေႇသိၼ်ႇ တၢင်းၶဝ်ႈဝဵင်းမိူင်းၵွင်း ၸႄႈမိူင်းၶၢင် လႄႈ ၸဝ်ႈလႆႈလွၼ်ႇၼႂ်းၵျွင်းၵမ်းသိုဝ်ႈၼႆယဝ်ႉ။

မိူဝ်ႈဝၼ်းထီႉ 16 October 2022 (လိူၼ်သိပ်းဢဵတ်းလွင်ႈ 7 ၶမ်ႈ ပီႊတႆး 2116 ၼီႈ) ယၢမ်းၵၢင်ၶိုၼ်းမွၵ်ႈ 20:00 မူင်း ၽၢႆႇဢုပ်ႉပိူင်ႇ လႄႈ ၸဝ်ႈၼင်ႈၵျွင်း ပၢၼ်ႇတၢၼ်ႇတတီႇတႃႇၼၼ်တ (ဢူးတူႇရသေႃႇ) တိုၵ်ႉၼင်ႈဢုပ်ႇၵၼ်ယူႇၼၼ်ႉ မီးၵူၼ်းဢမ်ႇႁူႉၵေႃႉ/ၸုမ်း ၶဝ်ႈၵႂႃႇယိုဝ်း ၸဝ်ႈၼင်ႈၵျွင်း 6 ၵမ်း တၢႆၵမ်းလဵဝ် ဝႃႈၼႆ။

ၵူၼ်းမိူင်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈ KNG ဝႃႈ “မီးၵူၼ်းဢမ်ႇႁူႉၵေႃႉ/ၸုမ်း မွၵ်ႈ 10 ၵေႃႉၼႆႉ လုၵ်ႉတီႈလႂ်မႃးဢမ်ႇႁူႉ ပေႃးယဝ်ႉၵေႃႈၵႂႃႇဢဝ်ၵွင်ႈယိုဝ်းသႂ်ႇ ၸဝ်ႈၼင်ႈၵျွင်း တင်းၼမ် လႄႈ လႆႈလွၼ်ႇၵႂႃႇယဝ်ႉ၊ ၽၢႆႇဢုပ်ႉပိူင်ႇတႄႉ တၼ်းပၢႆႈလွတ်ႈယူႇ၊ ၸဝ်ႈၼင်ႈၵျွင်းၼႆႉ ၸမ်ၸႂ်ၵၼ်တင်း သိုၵ်းမၢၼ်ႈ လႄႈ မိူဝ်ႈပူၼ်ႉမႃးသမ်ႉ ပႃးၽၢႆႇၸုမ်းပႃႇတီႇသၢင်ႇသီႈၼႆယူႇ၊ တေႃႇထိုင်မိူဝ်ႈလဵဝ်ၵေႃႈ ဢမ်ႇပႆႇလႆႈႁူႉဝႃႈ ပဵၼ်ၸုမ်းလႂ်ၵႂႃႇယိုဝ်းလႄႈ တၢင်းၽၢႆႇၽူႈမီးပုၼ်ႈၽွၼ်းၶဝ် တိုၵ်ႉၵူတ်ႇထတ်းယူႇ ၼႆယဝ်ႉ။

ၸဝ်ႈၼင်ႈၵျွင်း ပၢၼ်ႇတၢၼ်ႇတတီႇတႃႇၼၼ်တ မီးဢႃႇယု 57 ပီႊ ဝႃႇတေႃႇၸဝ်ႈ မီး 27 လႄႈ ပဵၼ်သင်ႇၶၼႃႇယၵ ၸႄႈဝဵင်းမိူင်းၵွင်းၼႆယဝ်ႉ၊ တီႈဝၢၼ်ႈ 4 လၵ်း တၢင်းၶဝ်ႈဝဵင်းမိူင်းၵွင်းၼႆႉ ၵမ်ႉၼမ်ပဵၼ်ပီႈၼွင်ႉတႆး ႁဵတ်းၵၢၼ်ယူႇသၢင်ႈ ၵိၼ်သဝ်းဝႆႉ ၼႆယဝ်ႉ။

တႆးလွတ်ႈလႅဝ်း