မူဝ်ႇတီႇ လၢတ်ႈတီႈ ပူႇတိၼ်ႇ ပၢၼ်ၼႆႉဢမ်ႇၸႂ်ႈၵၢပ်ႈပၢၼ်ပၢင်တိုၵ်းယဝ်ႉ

မိူဝ်ႈဝၼ်းထီႉ 16 September 2022 ၽူႈၼမ်း ဢိၼ်းတီးယႃး လႄႈ ရၢတ်ႉသျႃး လႆႈဢုပ်ႇဢူဝ်းၵၼ် ၼွၵ်ႈပၢင်ၵုမ်ၶိုၵ်ႉတွၼ်း SCO (Shanghai Cooperation Organization) ဢၼ်ၸတ်းႁဵတ်းၵႂႃႇတီႈမိူင်း Uzbekistan ၼၼ်ႉၼႆယူႇ။

ၸွမ်ၸိုင်ႈ ဢိၼ်းတီးယႃး ၼႃႇရဵၼ်ႇတရႃႇ မူဝ်ႇတီႇ လၢတ်ႈတီႈ ၸွမ်ၸိုင်ႈရၢတ်ႉသျႃး ဝလႃႇတီႇမီရ် ပူႇတိၼ်ႇ ဝႃႈ ၼႂ်းလုမ်ႈၾႃႉၵၢပ်ႈပၢၼ်ႈယၢမ်းၼႆႉ ဢမ်ႇၸႂ်ႈၵၢပ်ႈပၢၼ် ဢဝ်ပၢင်တိုၵ်းၵႄႈလိတ်ႈပၼ်ႁႃၵၼ်ယဝ်ႉ၊ ပၼ်ႁႃဢၼ်ယႂ်ႇလူင်ၼႂ်းလုမ်ႈၾႃႉ ယၢမ်းၼႆႉၼၼ်ႉ မၼ်းပဵၼ်လွင်ႈမၼ်ႈၼိမ်သဝ်း ၽၢႆႇၶဝ်ႈၼမ်ႉတၢင်းၵိၼ်၊ ၽုၼ်ႇထၢတ်ႈ ဢိၵ်ႇ ႁႅင်းထၢတ်ႈ ၸိူဝ်းၼႆႉလႄႈ ယင်းလၢတ်ႈပႃးထႅင်ႈဝႃႈ ပိူင်ဢုပ်ႉပိူင်ႇတီႇမူဝ်ႇၶရေႇသီႇ၊ ၵၢၼ်ၽွင်းတၢင်၊ ၵၢၼ်ဢုပ်ႇဢူဝ်းၸိူဝ်းၼႆႉ ပဵၼ်လွင်ႈဢၼ်တေႁဵတ်းႁႂ်ႈလုမ်ႈၾႃႉႁဝ်း ၸၢင်ႈယူႇသဝ်းႁူမ်ႈၵၼ်လႆႈ ၼၼ်ႉယဝ်ႉ။

ၽၢႆႇတၢင်း ၸွမ်ၸိုင်ႈ ပူႇတိၼ်ႇၵေႃႈ လၢတ်ႈဝႃႈ ပွင်ႇၸႂ်ထိုင်လွင်ႈဢၼ် ၽူႈၼမ်းဢိၼ်းတီးယႃး မႆႈၸႂ်ၼၼ်ႉယူႇ လႄႈ မၼ်းၵေႃႈ ၶႂ်ႈႁႂ်ႈၵူႈလွင်ႈယဝ်ႉတူဝ်ႈၵႂႃႇ ၼင်ႇၶၼ်ၶၼ်ၽႂ်းၽႂ်းယူႇမိူၼ်ၵၼ်၊ သိုပ်ႇသေၼၼ်ႉ ယင်းလၢတ်ႈထိုင်ပႃး လွင်ႈၸမ်ၸႂ်ၼႂ်းၵၢၼ်ၵႃႉၶၢႆ ၵႄႈၵၢင် ဢိၼ်းတီးယႃး လႄႈ ရၢတ်ႉသျႃး မီးလွင်ႈၶိုပ်ႈၼႃႈမႃးတင်းၼမ်ယူႇ ၸွမ်းလူၺ်ႈ ၽုၼ်ႇထၢတ်ႈၼႂ်းရၢတ်ႉသျႃးၼၼ်ႉ သူင်ႇၶၢႆၼႂ်းလွၵ်းၵၢတ်ႇဢိၼ်းတီးယႃး တိူဝ်းမႃးထိုင် 8 ပုၼ်ႈၼႆယဝ်ႉ။

ဢွၼ်တၢင်းၼႆႉၵေႃႈ ပူႇတိၼ်ႇ ယင်းလႆႈၶဝ်ႈႁူပ်ႉဢုပ်ႇဢူဝ်းၸွမ်း ၸွမ်ၸိုင်ႈ မိူင်းၶႄႇ သျီႇၵျိၼ်းၽိင်ႇ ၼွၵ်ႈပၢင်ၵုမ်ၶိုၵ်ႉတွၼ်း SCO ၼၼ်ႉ မိူၼ်ၵၼ် လႄႈ ယွမ်းႁပ်ႉဝႃႈ ၽူႈၼမ်းၶႄႇၼၼ်ႉၵေႃႈ ပဵၼ်ဢၼ်မႆႈၸႂ်ၸွမ်း လွင်ႈဢၼ်ရၢတ်ႉသျႃး ၶဝ်ႈတူင်ႉၼိုင်ၼႂ်းမိူင်းယူႇၶရဵၼ်းၼၼ်ႉယူႇမိူၼ်ၵၼ် လႄႈ ပူႇတိၼ်ႇၵေႃႈ လႆႈယိၼ်းၸူမ်း လွင်ႈဢၼ်ၽူႈၼမ်းၶႄႇၼၼ်ႉ ယူႇပဵၼ်ၵၢင် ၼႂ်းၵႄႈ လွင်ႈၶဵင်ႈၶႅင်ရၢတ်ႉသျႃးတင်းယူႇၶရဵၼ်းၼၼ်ႉ ၼႆယဝ်ႉ။

ၶႄႇ၊ ရၢတ်ႉသျႃး လႄႈ ဢိၼ်းတီးယႃးၼႆႉ ပဵၼ်မိူင်းဢၼ်ၶဝ်ႈႁူမ်ႈၵိုၵ်းၸွမ်း ၼႂ်းမုၵ်ႉၸုမ်း SCO  ဢၼ်ပဵၼ်မုၵ်ႉၸုမ်းႁူမ်ႈမိုဝ်းၵၼ်ၽၢႆႇလွင်ႈမၼ်ႈၼိမ်သဝ်း ၸၼ်ႉပွတ်းတွၼ်ႈ ၼႆၼၼ်ႉယဝ်ႉ။

တႆးလွတ်ႈလႅဝ်း