မူၺ်ၶၢဝ် ၼိူဝ်လွႆႁိမဝၼ်ႇတႃႇၵူၼ်ႇလႄႈ ႁဵတ်းႁႂ်ႈမီးၵူၼ်းလူႉတၢႆတင်းၼမ်

မူၺ်ၶၢဝ် ၼိူဝ်လွႆႁိမဝၼ်ႇတႃႇ (Himalayas) ဢၼ်မီးၼႂ်းမိူင်းဢိၼ်းတီးယႃးၼၼ်ႉ လႆႈၵူၼ်ႇလူင်းလႄႈ ၽၢႆႇၽူႈမီးပုၼ်ႈၽွၼ်းၼႂ်းပိုၼ်ႉတီႈၶဝ် လၢႆးငၢၼ်းဝႃႈ မီးၵူၼ်းၶိုၼ်ႈလွႆ လူႉတၢႆ မွၵ်ႈ 10 ၵေႃႉသေ ႁၢႆလၢႆဝႆႉ 20 ၵေႃႉ ဝႃႈၼႆ။

မိူဝ်ႈဝၼ်းထီႉ 4 October 2022 လွႆမူၺ်ၵူၼ်ႇတဵင်သႂ်ႇၵူၼ်းၶိုၼ်ႈလွႆတင်းမူတ်း 41 ၵေႃႉ ၼႂ်းၼၼ်ႉ တႃႇ 34 ၵေႃႉ ပဵၼ်ၵူၼ်းႁဵၼ်းၽိုၵ်းၶိုၼ်ႈလွႆ လႄႈ ထႅင်ႈ 7 သမ်ႉပဵၼ်ၶူးၽိုၵ်းၶိုၼ်ႈလွႆ ဝႃႈၼႆ။ ၽွင်းၼၼ်ႉ ပဵၼ်ၽွင်းဢၼ်ၵူၼ်းၶိုၼ်ႈလွႆၶဝ် ဝၢႆႇပွၵ်ႈလူင်းလွႆ ဢၼ်မီးၸိုဝ်ႈဝႃႈ Draupadi ka Danda-II  မိူဝ်ႈယူႇတီႈတၢင်းသုင် 5,670 meters ၼိူဝ်လွႆႁိမဝၼ်ႇတႃႇၼၼ်ႉ လႄႈ မီးၵူၼ်းလႆႈႁပ်ႉတၢင်းၸွႆႈထႅမ် လွတ်ႇသၢႆၸႂ်ဢွၵ်ႇမႃးတင်းမူတ်း မီး 14 ၵေႃႉ ယၢမ်းၽွင်းတေႃႈလဵဝ် လႆႈယူတ်းယႃတူဝ်ယူႇတီႈႁူင်းယႃ ဝႃႈၼႆ။

မိူဝ်ႈဝႃး ဝၼ်းထီႉ 5 October 2022 ၼႆႉ လွင်ႈၵၢၼ်ၶူၼ်ႉႁႃၵူၼ်းၶိုၼ်ႈလွႆဢၼ်ႁၢႆလၢႆဝႆႉ ၼၼ်ႉ ပေႃးၼပ်ႉပဵၼ်ၶၢဝ်းယၢမ်းၼႂ်းပိုၼ်ႉၼႆၸိုင် ပဵၼ်ဝၼ်းထီႉ 3 ယဝ်ႉ ဝၢႆးသေ မူၺ်ၶၢဝ် ၼိူဝ်လွႆႁိမဝၼ်ႇတႃႇ လႆႈၵူၼ်ႇလူင်းလႄႈ ၵွင်မူၺ်ဢၼ်လႆႈၵူၼ်ႇလူင်း မႃးၼၼ်ႉ ပဵၼ်ပၼ်ႁႃလွင်ႈၶဵင်ႇတႃႉ ၼႂ်းလွင်ႈၶူၼ်ႉႁႃၵူၼ်းဢၼ်ႁၢႆဝႆႉၼၼ်ႉသေ ယိူင်းဢၢၼ်းၶွင်ၽူႈၶူၼ်ႉႁႃၶဝ်တႄႉ ၶတ်းၸႂ်ႁႃတီႈသဵင်ႈသုတ်းမူၺ်ဢၼ်လႆႈ ၵူၼ်ႇလူင်း လႄႈ လၢမ်းၶၢတ်ႈဝႃႈ တေဢမ်ႇပေႃးယူႇၵႆၵၼ်တင်း ဢွင်ႈတီႈဢၼ်ၵူၼ်ႇလူင်းၼၼ်ႉ ဝႃႈၼႆ။

ၽူႈမီးပုၼ်ႈၽွၼ်း တီႈလႅၼ်လိၼ်ဢိၼ်းတီးယႃး− တိပႅတ်ႉ (Tibet) ၼၼ်ႉ လၢတ်ႈဝႃႈ တေသိုပ်ႇၶူၼ်ႉႁႃၵူၼ်းၸိူဝ်းဢၼ်ႁၢႆလၢႆဝႆႉၼၼ်ႉ ထႅင်ႈ 2−3 ဝၼ်း ၼႆယဝ်ႉ။

မိူဝ်ႈပီႊ 2021 ပူၼ်ႉမႃးၼၼ်ႉၵေႃႈ မူၺ်ၶၢဝ် ၼိူဝ်လွႆႁိမဝၼ်ႇတႃႇ ၵူၼ်ႇလူင်း လႄႈ ႁဵတ်းႁႂ်ႈမီးၵူၼ်းလူႉတၢႆ 8 ၵေႃႉ ၼႆယဝ်ႉ။

တႆးလွတ်ႈလႅဝ်း