ၸွမ်းၼင်ႇ ၶွင်ႇသီႇဢဝ်ၶိုၼ်းၸိုင်ႈတႆး ၶွတ်ႈၽွတ်ႈဝႆႉ ၵေႃႇမတီႇၽၢႆႇပၢႆးယူႇလီ ၽွင်းၸိူဝ်ႉမႅင်းတၢင်းပဵၼ် COVID-19 ၽႄႈလၢမ်းႁၢဝ်ႈႁႅင်းယူႇၼၼ်ႉသေ ၽူႈမီးပုၼ်ႈၽွၼ်း မေႃယႃ ၽၢႆႇပၢႆးယူႇလီ RCSS လႆႈလူင်းၵူတ်ႇထတ်းပၼ် ပၢႆးယူႇလီ လႄႈ ပၼ်ၵႂၢမ်းႁူႉ ၵဵဝ်ႇလူၺ်ႈ COVID-19 တီႈ ပေႃႈမႄႈၵူၼ်းမိူင်း ဢိၵ်ႇ သင်ႇၶၸဝ်ႈ ၸိူဝ်းယူႇသၢင်ႈၵိၼ်သဝ်း ၸွမ်းဝၢၼ်ႈၼွၵ်ႈၼႃးပၢင်ႇ ၼႆယဝ်ႉ။
![မေႃယႃ ၽၢႆႇပၢႆးယူႇလီ RCSS ၵူတ်ႇထတ်းပၼ်ပၢႆးယူႇလီ ပေႃႈမႄႈၵူၼ်းမိူင်း လႄႈ သင်ႇၶၸဝ်ႈ ၸွမ်းဝၢၼ်ႈၼွၵ်ႈၼႃးပၢင်ႇ](https://i0.wp.com/taifreedom.com/wp-content/uploads/2020/04/image_13-1.jpg?resize=696%2C511&ssl=1)
တင်ႈတႄႇဝၼ်းထီႉ 28 March 2020 ထိုင် ဝၼ်းထီႉ 15 April 2020 ၵေႃႇမတီႇၽၢႆႇပၢႆးယူႇလီ ၶွင်ႇသီႇဢဝ်ၶိုၼ်းၸိုင်ႈတႆး လႆႈလူင်းၵူတ်ႇထတ်းပၼ် ပၢႆးယူႇလီ ပေႃႈမႄႈပီႈၼွင်ႉၵူၼ်းမိူင်း လႄႈ သင်ႇၶၸဝ်ႈ ဢၼ်ယူႇသၢင်ႈၵိၼ်သဝ်း ၸွမ်းဝၢၼ်ႈၼွၵ်ႈၼႃးပၢင်ႇ ၼႂ်းၸႄႈဝဵင်း လၢႆးၶႃႈ ၊ ၊ ပၢင်လူင် ၊ လွႆလႅမ် ၊ မိူင်းပွၼ် ၊ လွၵ်ႉၸွၵ်ႇ ၊ ႁူဝ်ပူင်း ၊ လၢင်းၶိူဝ်း ၊ မွၵ်ႇမႆႇ ၊ သီႇပေႃႉ ၊ ၵျွၵ်းမႄး ၊ ပၢင်ႇသၢႆး ၊ ၶူဝ်လမ် ၊ ၵဵင်းတွင်း ၊ ၵုၼ်ႁဵင် ၊ ၵႃႇလိ ၊ ၼမ်ႉၸၢင် ၊ ၼမ်ႉၶမ်း ၊ ၼမ်ႉတူႈ ၊ မိူင်းၵိုင် ၊ မိူင်းၼွင် ၊ မိူင်းပွၼ် ၊ မိူင်းပၼ်ႇ ၊ မိူင်းၼၢႆး ၊ မိူင်းငေႃႉ ၊ တႃႈၶီႈလဵၵ်း တႃႇ 45,951 ၵေႃႉ လႄႈ ဢၼ်လႆႈပၼ်ပိုၼ်ႉႁူႉ ၵဵဝ်ႇလူၺ်ႈ ၸိူဝ်ႉမႅင်းတၢင်းပဵၼ် COVID-19 သမ်ႉ မီး 408 ပွၵ်ႈ/ဢွင်ႈတီႈ သေ မီးၵူၼ်းၶိုၼ်ႈထွမ်ႇငိၼ်းႁူမ်ႈ 45,480 ၵေႃႉ ၼႆယဝ်ႉ။
ပေႃႈမႄႈပီႈၼွင်ႉၵူၼ်းမိူင်း ၸိူဝ်းမီးတၢင်းပဵၼ် လိူတ်ႈသုင် ၊ ၼၢဝ် ၊ ႁိူဝ်ႉငၢႆႈ ၊ တွင်ႉၵႂႃႇ ၊ ၶႃၶတ်း ၊ ပဵၼ်ၶူမ်း ၊ ဢႆ ၊ ၶေႃးၸဵပ်း ၊ မီးႁွႆးၸဵပ်း မေႃယႃၽၢႆႇပၢႆးယူလီ ၶွင်ႇသီႇဢဝ်ႇၶိုၼ်းၸိုင်ႈတႆး RCSS လႆႈယူတ်းယႃပၼ် လႄႈ ပၼ်ပႃးယႃႈယႃ ၵိၼ်/တႃး တႃႇထႅင်ႈလၢႆလၢႆဝၼ်းယူႇယဝ်ႉ။
![မေႃယႃ ၽၢႆႇပၢႆးယူႇလီ RCSS ၵူတ်ႇထတ်းပၼ်ပၢႆးယူႇလီ ပေႃႈမႄႈၵူၼ်းမိူင်း လႄႈ သင်ႇၶၸဝ်ႈ ၸွမ်းဝၢၼ်ႈၼွၵ်ႈၼႃးပၢင်ႇ](https://i0.wp.com/taifreedom.com/wp-content/uploads/2020/04/image_14-1.jpg?resize=696%2C522&ssl=1)
မၢင်ပိုၼ်ႉတီႈ မေႃယႃ ၽၢႆႇပၢႆးယူႇလီ ၶွင်ႇသီႇဢဝ်ၶိုၼ်းၸိုင်ႈတႆး လႆႈႁူမ်ႈမိုဝ်းတင်း မေႃယႃ ၽၢႆႇပၢႆးယူႇလီ လူင်ပွင်ၸိုင်ႈ ၊ ၸုမ်းၶၢႆႇၶႂႃပေလႅင် (Red Cross) ၊ ၸုမ်းၵူၼ်းၼုမ်ႇတႆး ၊ ၽူႈယႂ်ႇၵူၼ်းလူင် ဝၢၼ်ႈ/ဢိူင်ႇသေ ႁူမ်ႈၵၼ်ႁဵတ်းသၢင်ႈ ၶိုင်ပွင်ၵႂႃႇ ၼႂ်းပိုၼ်ႉတီႈၼႆယဝ်ႉ။
တင်းၽၢႆႇ ၵေႃၵမ်ၵၢၼ်ပွင်သၢင်ႈလွင်ႈငမ်းယဵၼ် PMC (RCSS) ၵေႃႈ လႆႈႁူမ်ႈမိုဝ်းတင်း ၽူႈမီးၼမ်ႉၸႂ်ၸေႇတၼႃႇ ၽိူၵ်ႇၸိုၼ်ႈၶၢဝ်သႂ်သေ ဢဝ်ၶိူင်ႈၵမ်ႉၵႅမ် ပၢႆးယူႇလီ တႃႇႁႄႉၵင်ႈ COVID-19 သူင်ႇပၼ်ထိုင်တီႈ ၽူႈမီးပုၼ်ႈၽွၼ်း လူင်ပွင်ၸိုင်ႈ လႄႈ ၵေႃႇမတီႇ ၵႅတ်ႇၶႄႁႄႉၵင်ႈတၢင်းပဵၼ် COVID-19 ဢၼ်မီးတီႈဝဵင်း လၢႆးၶႃႈ ၊ လွႆလႅမ် ၊ ၼမ်ႉၸၢင် ၊ ၵေးသီး ၊ ပၢင်လူင် ၊ မိူင်းၵိုင် ၊ မိူင်းၼွင် ၊ မိူင်းသူႈ ၊ မိူင်းပွၼ် ၊ ၼႂ်းဢိူင်ႇဝၢၼ်ႈၸိင်း ၸႄႈဝဵင်းမိူင်းၼွင် ၊ မိူင်းပၼ်ႇ ၊ မိူင်းၼၢႆး ၊ မိူင်းတူၼ် ၊ မွၵ်ႇမႆႇ ၊ လၢင်းၶိူဝ်း ၊ ၵႃႇလိ ၊ ၵုၼ်ႁဵင် ၊ ၵဵင်းတုင် ၊ မိူင်းပဵင်း ၊ တႃႈၶီႈလဵၵ်း ၊ မိူင်းတူၼ် ၼႆယဝ်ႉ။
![မေႃယႃ ၽၢႆႇပၢႆးယူႇလီ RCSS ၵူတ်ႇထတ်းပၼ်ပၢႆးယူႇလီ ပေႃႈမႄႈၵူၼ်းမိူင်း လႄႈ သင်ႇၶၸဝ်ႈ ၸွမ်းဝၢၼ်ႈၼွၵ်ႈၼႃးပၢင်ႇ](https://i0.wp.com/taifreedom.com/wp-content/uploads/2020/04/image_15.jpg?resize=696%2C522&ssl=1)
မၢင်ပိုၼ်ႉတီႈ လႄႈ ဢွင်ႈတီႈၼႂ်းဝဵင်းၼၼ်ႉ မေႃယႃ ၽၢႆႇပၢႆးယူႇလီ ၶွင်ႇသီႇဢဝ်ၶိုၼ်းၸိုင်ႈတႆး ဢမ်ႇၸၢင်ႈၶဝ်ႈႁွတ်ႈထိုင်လႆႈ လႄႈ ဢမ်ႇလႆႈၵူတ်ႇထတ်းပၼ်ပၢႆးယူႇလီ ဢိၵ်ႇတင်း ပၼ်ၵႂၢမ်းႁူႉ ၵဵဝ်ႇလူၺ်ႈ COVID-19 တီႈပေႃႈမႄႈၵူၼ်းမိူင်း ဢိၵ်ႇပႃးသင်ႇၶၸဝ်ႈႁဝ်းၶႃႈသင်သေ ၶႂ်ႈႁႂ်ႈပေႃႈမႄႈၵူၼ်းမိူင်းႁဝ်း မေႃတူၺ်းထိုင်လုမ်းလႃး ပၢႆးယူႇလီ တူဝ်ၵဝ်ႇလီလီ ယူႇယဝ်ႉ။
1. ၵူၼ်းမိူင်းႁဝ်းၵူႈၵေႃႉ ဝႆႉသတိၼမ်ၼမ် ယႃႇယူႇလူမ်လၢမ် ႁႂ်ႈဢွၼ်ၵၼ်လုမ်းလႃးတူဝ်ႁင်းၽႂ်မၼ်း။
2. ၶၢဝ်းမီးတၢင်းယၢပ်ႇၽိုတ်ႇၼႆႉ ၼႂ်းဝၢၼ်ႈ/ဢိူင်ႇ ဝဵင်း ႁႂ်ႈမေႃၽွမ်ႉၵၼ် ၸွႆႈထႅမ်ၵၼ်။
3. ၸွမ်းဝၢၼ်ႈၸွမ်းႁိူၼ်း ႁႂ်ႈႁဵတ်းလိူမ်ႈလႆႇမူတ်းသႂ် ယႃႇႁႂ်ႈရေႃးၵႃႇတၢင်းပဵၼ် ၽႄႈလၢမ်းငၢႆႈ။
4. ႁႂ်ႈၵိၼ်ပၼ်ၼမ်ႉၼမ်ၼမ် လႄႈ သုၵ်ႈလၢင်ႉမိုဝ်း ႁႂ်ႈယူႇမူတ်းသႂ်တႃႇသေႇတႃႉ။
ၸူဝ်ႈၵႃႈၸိူဝ်ႉမႅင်းတၢင်းပဵၼ် COVID-19 ဢမ်ႇပႆႇႁၢႆၵႂႃႇၼႆႉ မေႃယႃ ၽၢႆႇပၢႆးယူႇလီ ၶွင်ႇသီႇဢဝ်ၶိုၼ်းၸိုင်ႈတႆး RCSS တေႁူမ်ႈမိုဝ်းတင်း ၽူႈၵဵဝ်ႇၶွင်ႈ လၢႆလၢႆၵေႃႉ/လၢႆလၢႆၸုမ်း သေ သိုပ်ႇၵူတ်ႇထတ်းပၢႆးယူႇလီ လႄႈ ပၼ်ၵႂၢမ်းႁူႉ ၵဵဝ်ႇလူၺ်ႈ COVID-19 တီႈပေႃႈမႄႈပီႈၼွင်ႉၵူၼ်းမိူင်း ဢိၵ်ႇ သင်ႇၶၸဝ်ႈၶဝ်ၵႂႃႇ ဢမ်ႇလိုဝ်ႈဢမ်ႇသဝ်းယူႇယဝ်ႉ။
တႆးလွတ်ႈလႅဝ်း