မၢၵ်ႇတႅၵ်ႇတီႈၶူင်ႇႁူတ်းၼမ်ႉ ဝဵင်းလႃႈသဵဝ်ႈလႄႈ မီးလွင်ႈလူႉတၢႆမၢတ်ႇၸဵပ်းတင်းၼမ်

ဝၼ်းႁပ်ႉသၢင်းၵျၢၼ်ႇမိူဝ်ႈၼႆႉ မီးမၢၵ်ႇတႅၵ်ႇတီႈၶူင်ႇႁူတ်းၼမ်ႉ ဝဵင်းလႃႈသဵဝ်ႈ မိူင်းတႆးပွတ်းႁွင်ႇလႄႈ မီးၵူၼ်းလူႉသဵင်ႈသၢႆၸႂ်လႄႈ မၢတ်ႇၸဵပ်းၸွမ်းဝႃႈၼႆ။

မိူဝ်ႈၼႆႉဝၼ်းထီႉ 13 April 2023 (လိူၼ်ႁႃႈလွင်ႈ 9 ၶမ်ႈ ပီႊတႆး 2117 ၼီႈ) သိုဝ်ႇၶၢဝ်ႇ BBC ဢွၵ်ႇၼႄဝႆႉဝႃႈ ႁိမ်းၸမ်ၶူင်ႇႁူတ်းၼမ်ႉ ယၼ်ႇတၢႆးဢွင်ႇ တၢင်းၶဝ်ႈဝဵင်းလႃႈသဵဝ်ႈ မိူင်းတႆးပွတ်းႁွင်ႇၼၼ်ႉ မီးမၢၵ်ႇတႅၵ်ႇတီႈၵိုတ်းလူတ်ႉလႄႈ မီးၵူၼ်းလူႉတၢႆၸွမ်း 4 ၵေႃႉသေ မၢတ်ႇၸဵပ်း 10 ၵေႃႉၼႆယဝ်ႉ။

ၸုမ်းၸွႆႈထႅမ်ၶဝ် လၢတ်ႈတီႈသိုဝ်ႇၶၢဝ်ႇ BBC ဝႃႈ “လူႉတၢႆ 4 ၵေႃႉ မၢတ်ႇၸဵပ်း 10 ၵေႃႉ တႃႇ 3 ၵေႃႉတႄႉ ပဵၼ်ၽႂ်ၵေႃႉလႂ်ၼႆၵေႃႈ ယင်းဢမ်ႇၸၢင်ႈႁူႉ” ၼႆယဝ်ႉ၊ ၵူၼ်းဢၼ်လူႉတၢႆၸိူဝ်းၼႆႉပဵၼ်ၽႂ်ၼႆ ယင်းတိုၵ်ႉ ၸွမ်းႁႃၶေႃႈမုၼ်းမၼ်းယူႇဝႃႈၼႆ။

လႆႈႁူႉၸွမ်းၵူၼ်းယူႇႁိမ်းၸမ်ၼၼ်ႉၼပ်ႉၸင်ႈဝႃႈ ပဵၼ်မၢၵ်ႇတႅၵ်ႇ ဢၼ်ႁၢင်ႈၸွမ်းလူတ်ႉလူင် တႅၵ်ႇသႂ်ႇမိူဝ်ႈၽွင်း ၸုမ်းတၢင်းၵႃႈၶဝ် ၽိုၵ်းၵႃႈႁိမ်းတီႈၵိုတ်းလူတ်ႉၼၼ်ႉၼႆယဝ်ႉ။

ၵူၼ်းမိူင်းပိုၼ်ႉတီႈလႃႈသဵဝ်ႈလၢတ်ႈဝႃႈ ၶူင်ႇႁူတ်းၼမ်ႉၼႆႉ ႁၢင်ႈႁႅၼ်းတေပိုတ်ႇၽုၺ်ႇၶၢဝ်းယၢမ်း ဝၢႆးဝၼ်း 3 မူင်း ၼႆသေတႃႉ ဝၢႆးသေမၢၵ်ႇတႅၵ်ႇမိူဝ်ႈ 11 မူင်းပၢႆယဝ်ႉၼၼ်ႉ လႆႈပိၵ်ႉတၢင်းၶၢဝ်ႈဢွၵ်ႇဝႆႉ၊ မၢၵ်ႇဢၼ်တႅၵ်ႇၼႆႉႁႅင်းလႄႈ ႁိူၼ်းၵူၼ်းမိူင်းၼႂ်းဝဵင်းပေႃးသၼ်ႇယွၼ်ႈဝႆႉဝႃႈၼႆ။

ပူၼ်ႉမႃးမိူဝ်ႈဝၼ်းထီႉ 8 April 2023 (လိူၼ်ႁႃႈလွင်ႈ 4 ၶမ်ႈ ပီႊတႆး 2117 ၼီႈ) ၼၼ်ႉၵေႃႈ ယူႇတီႈၸုမ်း TACTIC OF MUSE လႆႈဢွၵ်ႇလိၵ်ႈပိုၼ်ၽၢဝ်ႇပၼ်ၾၢင်ႉ ပေႃႈမႄႈၵူၼ်းမိူင်းတႆးပွတ်းႁွင်ႇ မူႇၸေႊ၊ ၼမ်ႉၶမ်း၊ ၵူတ်ႉၶၢႆ ၸိူဝ်းၼႆႉဝႃႈ ယႃႇႁႂ်ႈၶဝ်ႈလဵၼ်ႈၼမ်ႉ တီႈၶဵင်ႇႁူတ်းၼမ်ႉဢၼ်ၶွင်ႇသီႇသိုၵ်းမၢၼ်ႈ တေႁၢင်ႈႁႅၼ်းၸတ်းႁဵတ်းၼၼ်ႉၼႆယဝ်ႉ။

တႆးလွတ်ႈလႅဝ်း