မၢၵ်ႇတႅၵ်ႇသႂ်ႇၵူၼ်းမိူင်းမူႇၸေႊ တၢႆ 2 ၵေႃႉ

မိူဝ်ႈဝၼ်းထီႉ 15 October 2024 (လိူၼ်သိပ်းဢဵတ်းမႂ်ႇ 13 ၶမ်ႈ ပီႊတႆး 2118 ၼီႈ) ယၢမ်းၵၢင်ၼႂ် 09:00 မူင်းပၢႆ မီးၵူၼ်းမိူင်းၼႂ်းပိုၼ်ႉတီႈ ၵဵပ်းလႆႈမၢၵ်ႇလူင် ၼိုင်ႈလုၵ်ႈသေ ဢၢၼ်းယႃႉဢဝ်ယၢမ်းတင်းၼႂ်းမၼ်းလႄႈ ဢဝ်မၢၵ်ႇၵိုင်ႉၵၢင်ႉ တႅၵ်ႇသႂ်ႇ တၢႆၵႂႃႇတီႈဝၢၼ်ႈပၢင်ၶႃး ဢိူင်ႇၼမ်ႉဢုမ် ၸႄႈဝဵင်းမူႇၸေႊ။

ၵူၼ်းမိူင်းၼႂ်းပိုၼ်ႉတီႈလၢတ်ႈၼႄဝႃႈ ၶႃသွင်ၵေႃႉၼၼ်ႉ ၵေႃႉၼိုင်ႈမီးဢႃႇယု 27 ပီႊ ၵေႃႉၼိုင်ႈမီးဢႃႇယု မွၵ်ႈ 60 ပီႊၼႆႉယဝ်ႉ ၶႃၵႂႃႇၵဵပ်းလႆႈမၢၵ်ႇလူင် တီႈလႂ်မႃးၵေႃႈဢမ်ႇႁူႉ  သမ်ႉမႃးတွႆႇမႃးယႃႉ ဢဝ်ယၢမ်းတင်းၼႂ်းမၼ်းလႄႈ ဢဝ်မၢၵ်ႇၵိုင်ႉၵၢင်ႉတႅၵ်ႇသႂ်ႇသေ လႆႈတၢႆၵႂႃႇတင်းသွင်ၵေႃႉယဝ်ႉ၊ တီႈမူႇၸေႊၼႆႉသမ်ႉ မီးၸုမ်းယိပ်းၵွင်ႈၵၢင်ႇတူင်ႉၼိုင်ၼမ်ႁႅင်းၼႃႇလႄႈ ဢမ်ႇႁူႉဝႃႈပဵၼ်မၢၵ်ႇၶွင်ၸုမ်းလႂ် ဝႃႈၼႆ။

ဝၢႆးသေပဵၼ်ပၢင်တိုၵ်း 1027 ယဝ်ႉၼၼ်ႉ ၵူၼ်းမိူင်းၼႂ်းပိုၼ်ႉတီႈ ဝဵင်းၼမ်ႉၶမ်း၊ ၵူတ်ႉၶၢႆ၊ ၼမ်ႉတူႈၸိူဝ်းၼႆႉ လႆႈၺႃးၽေးလွင်ႈမၢၵ်ႇယဵပ်ႇမၢၵ်ႇၽႃႇ လႄႈ မၢၵ်ႇၽၢင်းဢၼ်ဢမ်ႇပႆႇတႅၵ်ႇ ၼမ်တေႉတေႉၼႆယဝ်ႉ။

တႆးလွတ်ႈလႅဝ်း