မၢၵ်ႇလူင်တူၵ်းတႅၵ်ႇသႂ်ႇမႄႈမၢၼ်းဢၼ်ၸမ်တေၵိူတ်ႇ

သွင်ၵေႃႉၽူဝ်မေး ႁႃပိတ်းၽၵ်းၶဵဝ်ၸွမ်းၼႂ်းသူၼ် တီႈဝၢၼ်ႈပၢင်ႁၢတ်ႇ ဢိူင်ႇတၢတ်ႇၵႂၢင်တႆး ၸႄႈဝဵင်းၵျွၵ်ႉမႄး လႄႈ မီးမၢၵ်ႇလူင်ၶွင်ၸုမ်းယိပ်းၵွင်ႈၵၢင်ႇ တူၵ်းတႅၵ်ႇႁိမ်းၶႃၽူဝ်မေးသေ ၵေႃႉပဵၼ်မေးလႆႈလူႉတၢႆၵႂႃႇ ၽွင်းၸပ်းတွင်ႉဝႆႉ ယူႇယဝ်ႉ။

ၵဵဝ်ႇလူၺ်ႈလွင်ႈၼႆႉ မိူဝ်ႈဝၼ်းထီႉ 22 July 2024 (လိူၼ်ပႅတ်ႇလွင်ႈ 2 ၶမ်ႈ ပီႊတႆး 2118 ၼီႈ) ယၢမ်းႁူဝ်ၶမ်ႈၼၼ်ႉ သွင်ၵေႃႉၽူဝ်မေး ႁႃပိတ်းၽၵ်းတႃႇႁုင်ၵိၼ်ၶဝ်ႈၶမ်ႈၼႆ လႄႈ ဢမ်ႇထၢင်ႇဢမ်ႇထိူမ်သေ မီးမၢၵ်ႇလူင်လုၵ်ႈၼိုင်ႈ ၵႂႃႇတူၵ်းတႅၵ်ႇ ႁိမ်းၶႃၽူဝ်မေးလႄႈ ၵေႃႉပဵၼ်မေးၼၢင်း ဢၼ်ပႃးတွင်ႉဝႆႉၸမ်တေၵိူတ်ႇၼၼ်ႉ လႆႈတၢင်းၸဵပ်းမၢတ်ႇႁၢဝ်ႈႁႅင်း ဝႃႈၼႆ၊ ၽွင်းၵူၼ်းႁိမ်းႁွမ်း ၸွႆႈဢဝ်တူဝ်မၼ်းၼၢင်းသူင်ႇယူတ်းယႃၼၼ်ႉ မၼ်းၼၢင်းလႆႈသဵင်ႈသၢႆၸႂ်ၵႂႃႇ ၸွမ်းပွတ်းတၢင်း ဝႃႈၼႆ။

ၵူၼ်းမိူင်းၼႂ်းပိုၼ်ႉတီႈလၢတ်ႈၼႄဝႃႈ ၼၢင်းယိင်းၵေႃႉပႃးတွင်ႉၼၼ်ႉ မီးဢႃႇယု 26 ပီႊ လႄႈ ပႃးတွင်ႉဝႆႉ 9 လိူၼ်ၼႆႉယဝ်ႉ မၼ်းၺႃးၸၢၵ်ႇမၢၵ်ႇတီႈႁိမ်းဢႅဝ်မၼ်း လႄႈ လႆႈတၢင်းၸဵပ်းမၢတ်ႇႁႅင်းဝႆႉ၊ ၵူၼ်းႁိမ်းႁွမ်းၸွႆႈဢဝ်သူင်ႇယူတ်းယႃ တီႈႁူင်းယႃၵျွၵ်ႉမႄးသေတႃႉ ၵွပ်ႈပိူဝ်ႈဝႃႈတီႈဝဵင်းၵျွၵ်ႉမႄး မီးပၢင်တိုၵ်းလႄႈ ႁူင်းယႃပိၵ်ႉဢိုတ်းဝႆႉ ၶိုၼ်းသိုပ်ႇဢဝ်ၵႂႃႇယူတ်းယႃတီႈ ႁူင်းယႃဝဵင်းပၢင်ဢူး၊ ၽွင်းၵႂႃႇႁွတ်ႈပွတ်းတၢင်းၼၼ်ႉၵူၺ်း မၼ်းၼၢင်းဢမ်ႇၶၢမ်ႇလႆႈလွင်ႈၸဵပ်းသႅပ်ႇ ယဝ်ႉလႄႈ လႆႈသဵင်ႈသၢႆၸႂ်ၵႂႃႇတင်းမႄႈတင်းလုၵ်ႈယဝ်ႉ၊ သင်ဝႃႈ ႁူင်းယႃဝဵင်းၵျွၵ်ႉမႄး ပိုတ်ႇၽုၺ်ႇယႃၵူၼ်းပဵၼ်ၼႆတႄႉ ၶႃမႄႈလုၵ်ႈ တေဢမ်ႇလႆႈသဵင်ႈသၢႆၸႂ် သင်ဝႃႈၵေႃႉပဵၼ်မႄႈလႆႈသဵင်ႈၵေႃႈ ၵေႃႉပဵၼ်လုၵ်ႈ တေလွတ်ႈသၢႆၸႂ်ယူႇ ဝႃႈၼႆ။

သွင်ၵေႃႉၽူဝ်မေးၼႆႉ ပဵၼ်ၵူၼ်းၼႂ်းၸႄႈဝဵင်းၼမ်ႉသၼ်ႇ ၶၢႆႉၵႂႃႇယူႇတီႈ ဝၢၼ်ႈပၢင်ႁၢတ်ႇ ဢိူင်ႇတၢတ်ႇၵႂၢင်တႆး ၸႄႈဝဵင်းၵျွၵ်ႉမႄး ၼႆယူႇယဝ်ႉ။

တႆးလွတ်ႈလႅဝ်း