မၢၵ်ႇလၢင်းမီးၽွၼ်းလီၸိူင်ႉႁိုဝ်?

ပေႃးမႃးလၢတ်ႈထိုင်မၢၵ်ႇလၢင်းၼႆႉ ယုမ်ႇဝႃႈတေႁူႉၸၵ်းၵၼ်လီလႄႈ သူင်ၵိၼ်ၵၼ်ယူႇ ယွၼ်ႉမၢၵ်ႇလၢင်းၼႆႉ မၼ်းမီးဢရသႃႇဝၢၼ်ယဝ်ႉ ဢမ်ႇၵႃး ယင်းမီးၽွၼ်းလီထႅင်ႈတင်းၼမ် တင်းလၢႆလႄႈ ဢၢႆမၼ်းၵေႃႈသမ်ႉႁႅင်းသေ တေႁဵတ်းႁႂ်ႈမၢင်ၸိူဝ်း ဢမ်ႇၵျိူၵ်ႈၵိၼ်ၵေႃႈပဵၼ်လႆႈ ယူႇ။ ၵွပ်ႈၼၼ် ႁဝ်းမႃးဢွၼ်ၵၼ်တူၺ်း ၽွၼ်းလီမၢၵ်ႇလၢင်းၸွမ်းၵၼ်ဝႃႈ မီးသင်လၢႆလၢႆ။

1. လုမ်းလႃးၽိဝ်ၼိူဝ်ႉၼင်လႄႈ သၢႆတႃ

ၼႂ်းမၢၵ်ႇလၢင်းၼႆႉ မၼ်းတေမီး Vitamin-A ဢၼ်ပဵၼ်သၢၼ်ဢႃႇႁႃႇရ တီႈၸွႆႈလုမ်းလႃးသၢႆတႃ ႁဵတ်းႁႂ်ႈတူၺ်းႁၼ်လႆႈၸႅင်ႈလႅင်း ယင်းၸွႆႈႁႄႉၵင်ႈပၼ်တၢင်းပဵၼ်ဢၼ် ၵဵဝ်ႇလူၺ်ႈတႃ သေဢမ်ႇၵႃး မၢၵ်ႇလၢင်းၼႆႉ ယင်းမီးပႃးသၢၼ်ဢၼ်လုမ်းလႃးၽိဝ်ၼိူဝ်ႉၼင်လႄႈ ၸွႆႈႁႄႉၵင်ႈပၼ်ၽိဝ်ၼိူဝ်ႉၼင် တီႈလႅတ်ႇသေ ယႃႇႁႂ်ႈၵိူတ်ႇပဵၼ်ႁွႆးမၢၼ်ႉလႆႈၼၼ်ႉ ၼႆယူႇ။

2. လုမ်းလႃးလုပ်ႇ

Calcium ဢၼ်မီးၼႂ်းမၢၵ်ႇလၢင်းၼၼ်ႉ မၼ်းၸွႆႈလုမ်းလႃးပၼ်လုပ်ႇၵူၼ်းႁဝ်း လႆႈလီတေႉတေႉ လႄႈ ၼႂ်းမၢၵ်ႇလၢင်းၼႆႉ ယင်းမီးထႅင်ႈ Vitamin-C လႄႈ magnesium ဢၼ်ပဵၼ်သၢၼ်လွင်ႈယႂ်ႇ တွၼ်ႈတႃႇၵၢၼ်ၸုပ်ႇ Calcium ၶဝ်ႈၵႂႃႇတီႈၼႂ်းတူဝ်ၶိင်း လႆႈငၢႆႈလူမ်ၶိုၼ်ႈၼၼ်ႉယဝ်ႉ။

3. ၸွႆႈလုမ်းလႃးၶူင်ႉသၢင်ႈဢႃႇယူင်ႇ

ၼႂ်းမၢၵ်ႇလၢင်း တေမီးသၢၼ်ဢႃႇႁႃႇရ ဢၼ်လွင်ႈယႂ်ႇတေႃႇတူဝ်ၶိင်း မိူၼ်ၼင်ႇ− Thiamine, Niacin လႄႈ ထၢတ်ႈၵိူဝ် ယွၼ်ႉသၢၼ်ၸိူဝ်းၼႆႉ တေၵႂႃႇၸွႆႈၽိူမ်ႉထႅမ်ပၼ် ႁႅင်းႁဵတ်းၵၢၼ်ဢွၵ်းဢေႃလႄႈ ၶူင်ႉသၢင်ႈဢႃႇယူင်ႇ။ ၵွပ်ႈၼၼ် မၼ်းၸင်ႇၸွႆႈ ၵႄႈၽၢင်ႁၢင်ႈလွင်ႈဢူၼ်ႈဢွၼ်ႇ၊ ႁိူဝ်ႉဢူၼ်ႈ ႁိူဝ်ႉမွႆႈ ႁိုဝ် လွင်ႈပဵၼ်ၵၢမ်ႈၼိူဝ်ႉဢူၼ်ႈဢွၼ်ႇ ၼၼ်ႉယဝ်ႉ။

4. ယူတ်းယႃပၼ်လွင်ႈပဵၼ်ၸဵပ်းယဵၼ်း

မၢၵ်ႇလၢင်းၼႆႉ ပဵၼ်မၢၵ်ႇမႆႉမဵဝ်းဢၼ်မီးၽွၼ်းလီ ၸွႆႈတေႃႇသူႈ လွင်ႈၸဵပ်းယဵၼ်း ဢိၵ်ႇတင်း ပႅတ်ႉတီးရီးယႃး Bacteria လႄႈ Viral ။ ဢၼ်လွင်ႈယႂ်ႇသမ်ႉ ၽိူမ်ႉ Antioxidants ဢၼ်ၸွႆႈႁႄႉၵင်ႈ သႄးလ်ၽိဝ်ၼင် ဢၼ်လႆႈထုၵ်ႇတၢင်းႁဵတ်းႁၢႆႉ။ ၵွပ်ႈၼၼ်လႄႈ ဢမ်ႇမီးလွင်ႈပႅၵ်ႇၸႂ်သေဢိတ်း ဝႃႈ ယွၼ်ႉသင် မၢၵ်ႇလၢင်းၸွႆႈယူတ်းယႃလႆႈ ႁွႆးမၢတ်ႇၸဵပ်း ပဵၼ်ယဵၼ်းပိူဝ်ႉလႄႈ တုမ်ႉၼွင်ၸဵပ်း ယဵၼ်း။

5. ၸွႆႈလူတ်းယွမ်းတၢင်းပဵၼ်လိူတ်ႈသုင်

 ယွၼ်ႉမၢၵ်ႇလၢင်းၼႆႉ မၼ်းတေမီး Potassium သုင်လႄႈ မၼ်းၸင်ႇၵႂႃႇလူတ်းယွမ်း တၢင်းပဵၼ် လိူတ်ႈသုင်လႆႈသေ မၢႆထိုင်ဝႃႈ လွင်ႈၵိၼ်မၢၵ်ႇလၢင်းၼႆႉ တေၸွႆႈႁဵတ်းႁႂ်ႈတၢင်းပဵၼ်လိူတ်ႈသုင် ယူႇၼႂ်းပၢၼ်ၵၢင် ဢိၵ်ႇတင်း ႁဵတ်းႁႂ်ႈၽၢင်ႁၢင်ႈတၢင်းပဵၼ်ႁူဝ်ၸႂ်၊ လွတ်ႇလိူတ်ႈပိၵ်ႉတၼ် လႄႈ ပၼ်ႁႃ လွင်ႈၽိတ်းပိူင်ႈလွတ်ႇလိူတ်ႈ လူတ်းယွမ်းၵႂႃႇၸွမ်း ၼၼ်ႉယဝ်ႉ။

6. ႁႄႉၵင်ႈလွင်ႈပဵၼ်လိူတ်ႈၸၢင်

ၼႂ်းမၢၵ်ႇလၢင်းၼၼ်ႉ မီးထၢတ်ႈလဵၵ်း လႄႈ Magnesium သေ ထၢတ်ႈလဵၵ်းၼၼ်ႉ တေမီး ၽွၼ်းလီတႃႇမဵတ်ႉလိူတ်ႈ၊ ဢၼ်ပဵၼ် Magnesium ပဵၼ်ထၢတ်ႈဢၼ်လွင်ႈယႂ်ႇ တွၼ်ႈတႃႇမဵတ်ႉ လိူတ်ႈၶၢဝ် ၵွပ်ႈၸိူင်ႉၼၼ်လႄႈ မၼ်းၸင်ႇၸွႆႈႁႄႉၵင်ႈ လွင်ႈပဵၼ်လိူတ်ႈၸၢင် ၼၼ်ႉယဝ်။

7. ႁႄႉၵင်ႈတၢင်းပဵၼ်ၵႅၼ်ႇသႃႇ

မၢၵ်ႇလၢင်းၼႆႉ ပဵၼ်မၢၵ်ႇမႆႉဢၼ်မီးသၢၼ် Antioxidants သေဢမ်ႇၵႃး ယင်းမီးပႃး Phytonutrients လႄႈ Vitamin-C သေ သၢၼ်ဢႃႇႁႃႇရၸိူဝ်းၼႆႉ ၸွႆႈႁႄႉၵင်ႈတၢင်းပဵၼ်ၵႅၼ်ႇသႃႇလႆႈလၢႆလၢႆမဵဝ်း ၵွပ်ႈသၢၼ်ၸိူဝ်းၼႆႉ ၸွႆႈႁႄႉၵင်ႈသႄးလ်ၼႂ်းတူဝ်ၶိင်းဢၼ်ထုၵ်ႇႁဵတ်းႁၢႆႉလႄႈ ၸွႆႈမႄးသၢင်ႈပၼ် ၶိုၼ်းၸိူဝ်းဢၼ်ဢမ်ႇလီၼၼ်ႉ ၼႆယူႇ။

ၵမ်းၼႆႉလႆႈႁၼ်ၽွၼ်းလီမၢၵ်ႇလၢင်းယဝ်ႉလႄႈ ၸိူဝ်းဢၼ်ဢမ်ႇမၵ်ႉၼၼ်ႉၵေႃႈ ယုမ်ႇယမ်ဝႃႈ တေသူင်ၵိၼ်မႃးသေ ၽွၼ်းလီမၢၵ်ႇလၢင်းၼႆႉ လိူဝ်သေဢၼ်လၢတ်ႈမႃးတၢင်းၼိူဝ်ၼႆႉယဝ်ႉ မၼ်းယင်းၸွႆႈၵႄႈပၼ်ႁႃ ဢၼ်ၵိူတ်ႇပဵၼ်ၼႂ်းၶူင်ႉသၢင်ႈယွႆႈဢႃႇႁႃႇရလႄႈ ၸွႆႈၵႄႈပၼ် လွင်ႈၼွၼ်းဢမ်ႇလပ်းလႆႈလီ ဝႃႈၼႆသေတႃႉၵေႃႈ ထုၵ်ႇလီၵိၼ်ႁႂ်ႈမၼ်းၵိုင်ႇတၢၼ်ႇၵူၺ်းလႄႈ ဢမ်ႇထုၵ်ႇလီၵိၼ်ၼမ်လူၼ်ႉပူၼ်ႉတီႈ ၼၼ်ႉယဝ်ႉ။

ပိၼ်ႇတႅမ်ႈ − ၸၢႆးဢႅၼ်

တႆးလွတ်ႈလႅဝ်း

ဢၢင်ႈဢိင် − 7 ประโยชน์ของขนุน ผลไม้ที่ขึ้นชื่อเรื่องบำรุงผิวพรรณ (sanook.com)