ယူႇၶရဵၼ်း ႁိပ်ႈၼႅတ်ႈႁဵတ်းလုၵ်းပၢႆႈၽေး ၼႃႈတေပိုတ်ႇၽုၺ်ႇႁူင်းႁဵၼ်းၶိုၼ်း

သိုဝ်ႇၶၢဝ်ႇၼွၵ်ႈမိူင်း ဢွၵ်ႇၶၢဝ်ႇဝႆႉမိူဝ်ႈၼႆႉ ဝၼ်းထီႉ 30 August 2022 (လိူၼ်သိပ်းမႂ်ႇ 5 ၶမ်ႈ ပီႊတႆး 2116 ၼီႈ) ဝႃႈ ယွၼ်ႉပၢင်တိုၵ်းၼႂ်းမိူင်းယူႇၶရဵၼ်း လႅပ်ႈတေသိုပ်ႇယိုၼ်းယၢဝ်းၶၢဝ်းႁိုင်ၵႂႃႇထႅင်ႈလႄႈ ၼႃႈတေပိုတ်ႇၽုၺ်ႇၵၢၼ် ႁဵၼ်းၵၢၼ်သွၼ်မႂ်ႇၶိုၼ်း ၼႂ်းလိူၼ်ၼႃႈၼႆႉ ယွၼ်ႉမႆႈၸႂ်လွင်ႈလွတ်ႈၽေး လုၵ်ႈႁဵၼ်းၼႆသေ ႁူင်းႁဵၼ်းလၢႆလၢႆတီႈ ၼႂ်းမိူင်းယူႇၶရဵၼ်း ႁိပ်ႈၼႅတ်ႈ ႁဵတ်းလုၵ်းပၢႆႈၽေးပၼ်လုၵ်ႈႁဵၼ်း ဝႃႈၼႆ။

ၽူႈမီးပုၼ်ႈၽွၼ်း ၼႂ်းမိူင်းယူႇၶရဵၼ်း လၢတ်ႈဝႃႈ ယၢမ်းလဵဝ် တိုၵ်ႉႁဵတ်းလုၵ်းပၢႆႈ ၽေး လႄႈ မႄးၵုမ်းလုမ်းလႃးၶိုၼ်း ႁိူၼ်းတိူၵ်ႈ ၼပ်ႉႁူဝ်ႁဵင်လင် ၸိူဝ်းလႆႈလူႉၵွႆၵႂႃႇ ပိူဝ်ႈတႃႇပဵၼ်ဢွင်ႈတီႈတႃႇပၢႆႈၽေးမၢၵ်ႇ တႃႇလွင်ႈလွတ်ႈၽေး လုၵ်ႈႁဵၼ်း 6 လၢၼ်ႉၵေႃႉ ဢၼ်တေၶဝ်ႈႁဵၼ်းၶိုၼ်း ၼႂ်းလိူၼ်ၼႃႈ September 2022 ၼႆႉ ယွၼ်ႉဝႃႈ တေမီးၵၢၼ်ႁဵၼ်းတၢင်းဢွၼ်ႇလၢႆး လႄႈ ၶဝ်ႈႁဵၼ်းၼႂ်းႁွင်ႈႁဵၼ်းၵေႃႈမီး ဝႃႈၼႆ။

တႄႇၸဵမ်မိူဝ်ႈရၢတ်ႉသျႃးၶဝ်ႈတိုၵ်းယူႇၶရဵၼ်းမႃးၼႆႉ ႁူင်းႁဵၼ်း 2,300 လင် လႆႈထုၵ်ႇပဵၼ်ပဝ်ႉမၢႆမၢၵ်ႇမိတ်ႉသႆးၶွင်ရၢတ်ႉသျႃး ဝႃႈၼၼ်သေတႃႉ ၽၢႆႈပၢႆးပၺ်ႇၺႃႇၶဝ် တေပိုတ်ႇၽုၺ်ႇၵၢၼ်ႁဵၼ်းၵၢၼ်သွၼ်ၶိုၼ်းၼႆလႄႈ ႁူင်းႁဵၼ်းလၢႆလၢႆတီႈ ၸင်ႇလႆႈႁိပ်ႈၼႅတ်ႈႁဵတ်းလုၵ်းပၢႆႈၽေး ဝႃႈၼႆ။

လိူဝ်သေၼၼ်ႉ  လုၵ်ႈႁဵၼ်းလၢႆလၢၼ်ႉၵေႃႉ တေလႆႈၵႂႃႇၶိုၼ်ႈႁူင်းႁဵၼ်းၵႆ ယွၼ်ႉဝႃႈ မီးလၢႆလၢႆပိုၼ်ႉတီႈ ပႆႇတူဝ်ႈတၼ်းတႃႇပိုတ်ႇၽုၺ်ႇၵၢၼ်ႁဵၼ်း ၵၢၼ်သွၼ်ၶိုၼ်း၊ မၢင်ဢွင်ႈတီႈသမ်ႉ တိုၵ်ႉပဵၼ်ပၢင်တိုၵ်းသိုၵ်းသိူဝ်ယူႇ ဢမ်ႇၵႃး မၢင်တီႈသမ်ႉ ယွၼ်ႉတၢင်းပဵၼ် COVID-19 သေ ပႆႇၸၢင်ႈပိုတ်ႇၽုၺ်ႇ ၵၢၼ်ႁဵၼ်းၵၢၼ်သွၼ်ၶိုၼ်း ဝႃႈၼႆ။

တႆးလွတ်ႈလႅဝ်း