ရၢတ်ႉသျႃးယိုဝ်းတပ်ႉၵၢင်ႁၢဝ်ယူႇၶရဵၼ်း ႁိူဝ်းမိၼ်လူႉသုမ်း 5 လမ်း

မိူဝ်ႈဝၼ်းထီႉ 2 July 2024 (လိူၼ်ၸဵတ်းလွင်ႈ 11 ၶမ်ႈ ပီႊတႆး 2118 ၼီႈ) ရၢတ်ႉသျႃးဢွၵ်ႇမႃးလၢတ်ႈဝႃႈ လႆႈတိုၵ်းယိုဝ်းတပ်ႉၵၢင်ႁၢဝ်ယူႇၶရဵၼ်းတီႈၼိုင်ႈ ႁဵတ်းႁႂ်ႈႁိူဝ်းမိၼ်လူႉသုမ်းၵႂႃႇ 5 လမ်း ၼႆယူႇယဝ်ႉ။

ႁွင်ႈၵၢၼ်ၽၢႆႇၵႅတ်ႇၶႄရၢတ်ႉသျႃး ဢွၵ်ႇမႃးလၢတ်ႈဝႃႈ တပ်ႉသိုၵ်းရၢတ်ႉသျႃး လႆႈယိုဝ်းသႂ်ႇတပ်ႉၵၢင်ႁၢဝ်ယူႇၶရဵၼ်း ၼႂ်းမိူင်းယူႇၶရဵၼ်းပွတ်းၵၢင်တီႈၼိုင်ႈ  ဢၼ်ႁၢင်ႇၵႆၵၼ်တင်းလႅၼ်လိၼ်ရၢတ်ႉသျႃးမွၵ်ႈ 150 ၵီႇလူဝ်ႇမီႇတိူဝ်ႇ သေ ႁဵတ်းႁႂ်ႈႁိူဝ်းမိၼ် Su-27  တင်းမူတ်း 5 လမ်းလူႉသုမ်း လႄႈ ထႅင်ႈ 2 လမ်း လူႉၵွႆၵႂႃႇတေလႆႈမႄး ဝႃႈၼႆ။

သိုပ်ႇသေၼၼ်ႉရၢတ်ႉသျႃးၵေႃႈ လႆႈပိုၼ်ၽႄႈၼႄ Video Clip ဢၼ်ၶဝ်ဢၢင်ႈဝႃႈ ပဵၼ်လွင်ႈတူင်ႉၼိုင်တိုၵ်းတေႃးၼၼ်ႉ တေႁၼ်ပဵၼ်ၵႂၼ်းမူၼ်ႇမူဝ်း ပုင်ႈၶိုၼ်ႈမႃးတီႈတႃႈႁိူဝ်းမိၼ်လႄႈ ႁၼ်ၸႅင်ႈဝႃႈ မီးႁိူဝ်းမိၼ်မၢင်လမ်းဢၼ်တမ်းယူႇ ဢိၵ်ႇတင်းဢွင်ႈတီႈဢၼ်ထုၵ်ႇၾႆးမႆႈပဵၼ်သီလမ်ဝႆႉ ၼႆယဝ်ႉ။

ၵဵဝ်ႇၵပ်းလူၺ်ႈလွင်ႈၼႆႉၵေႃႈ ၽၢႆႇတၢင်း AFP လၢတ်ႈဝႃႈ ဢမ်ႇၸၢင်ႈယိုၼ်ယၼ်လွင်ႈၼႆႉလႄႈ ၽၢႆႇတၢင်းတပ်ႉသိုၵ်းယူႇၶရဵၼ်းၼၼ်ႉၵေႃႈ လႆႈဢွၵ်ႇမႃးတွပ်ႇထဵင်ၶိုၼ်းလွင်ႈၼႆႉမိူၼ်ၵၼ် ယူႇယဝ်ႉ။

လွင်ႈၼႆႉၵေႃႈ ၵိူတ်ႇၶိုၼ်ႈပဵၼ်မႃး ၽွင်းဢၼ် ယူႇၶရဵၼ်း ယင်းတိုၵ်ႉႁၢင်ႈႁႅၼ်း ပႂ်ႉႁပ်ႉၽုင်ႁိူဝ်းမိၼ် F-16 ဢၼ်မိူင်းၼႂ်းၸုမ်း NATO လၢတ်ႈဝႃႈ တေသူင်ႇမွပ်ႈဢၢပ်ႈပၼ် တီႈယူႇၶရဵၼ်း ဢၼ်ဢမ်ႇႁိုင်သင်ယဝ်ႉၼၼ်ႉ ဝႃႈၼႆ။

တႆးလွတ်ႈလႅဝ်း