ရၢတ်ႉသျႃးယိုဝ်းတရူၼ်းယူႇၶရဵၼ်း တူၵ်း 36 လမ်း

ပၢင်တိုၵ်းၼႂ်းမိူင်းယူႇၶရဵၼ်းၼၼ်ႉ ယင်းတိုၵ်ႉမီးလွင်ႈၶဵင်ႈၶႅင်ၵၼ်ဝႆႉႁၢဝ်ႈႁႅင်း ယူႇလႄႈ ၸွမ်းၼင်ႇသိုဝ်ႇၶၢဝ်ႇၶႄႇ ဢွၵ်ႇဝႆႉၼၼ်ႉတႄႉဝႃႈ ရၢတ်ႉသျႃးလႆႈယိုဝ်း တရူၼ်းယူႇၶရဵၼ်းတူၵ်း 36 လမ်း ၼႆယူႇ။

သိုဝ်ႇၶၢဝ်ႇ CCTV မိူင်းၶႄႇ ဢွၵ်ႇဝႆႉ ၸွမ်းၼင်ႇၽၢႆႇၵႅတ်ႇၶႄရၢတ်ႉသျႃး လၢတ်ႈမိူဝ်ႈ ဝၼ်းထီႉ 15 July 2024 (လိူၼ်ပႅတ်ႇမႂ်ႇ 10 ၶမ်ႈ ပီႊတႆး 2118 ၼီႈ) ၼၼ်ႉဝႃႈ တပ်ႉသိုၵ်းရၢတ်ႉသျႃး လႆႈယိုဝ်းႁိူဝ်းမိၼ်တိုၵ်း ၶွင်တပ်ႉၵၢင်ႁၢဝ်ယူႇၶရဵၼ်း MIG-19 တူၵ်း 1 လမ်း လႄႈ ယိုဝ်းတရူၼ်းတူၵ်းထႅင်ႈ 36 လမ်း၊ ယိုဝ်းႁႄႉလႆႈမၢၵ်ႇၼူၾႆးထႅင်ႈ 5 လုၵ်ႈ ဢၼ်လုၵ်ႉတီႈၶိူင်ႈယိုဝ်းလႆႈလၢႆလုၵ်ႈၸွမ်းၵၼ် HIMARS ၶွင်ဢမေႇရိၵၢၼ်ႇႁဵတ်းဢွၵ်ႇၼၼ်ႉ ဝႃႈၼႆ။

ႁွင်ႈၵၢၼ်လူင်ၽၢႆႇၵႅတ်ႇၶႄရၢတ်ႉသျႃး လၢႆးငၢၼ်းထႅင်ႈဝႃႈ သိုၵ်းရၢတ်ႉသျႃး ဢၼ်တူင်ႉၼိုင်ယူႇ တပ်ႉတႅဝ်းၼႃႈၼၼ်ႉ လႆႈယႃႉလူႉၶိူင်ႈလၢၵ်ႈၼၢၵ်ႈ တပ်ႉသိုၵ်းယူႇၶရဵၼ်းတင်းၼမ် ႁူမ်ႈပႃးၵႃးၵၢပ်ႇလဵၵ်းလႄႈ ၵွင်ႈလူင် ဢိၵ်ႇတင်း တီႈၵဵပ်းၶိူင်ႈၵွင်ႈၵၢင်ႇၶွင်ယူႇၶရဵၼ်း ၸိူဝ်းၼႆႉဝႃႈၼႆ။

ၼႂ်းဝၼ်းလဵဝ်ၵၼ်ၵူၺ်း ၽၢႆႇတၢင်းတပ်ႉသိုၵ်းယူႇၶရဵၼ်းၵေႃႈ ဢွၵ်ႇမႃးလၢတ်ႈဝႃႈ လႆႈတိုၵ်းၵၼ်တင်းတပ်ႉတႅဝ်းၼႃႈရၢတ်ႉသျႃးၼၼ်ႉယူႇ 69 ပွၵ်ႈသေ ပဵၼ်ၼႂ်းငဝ်းလၢႆးဢၼ်ၶဵင်ႈၶႅင်ဝႆႉယူႇ ၼႂ်းပိုၼ်ႉတီႈပွတ်းတွၼ်ႈ Kharkiv ၊ ၵူၺ်းၵႃႈ ၼႂ်းပွတ်းတွၼ်ႈၼႆႉၵေႃႈ ယင်းတိုၵ်ႉယူႇၼႂ်းၼႃႈတီႈ ယူႇၶရဵၼ်းၵုမ်းၵမ်ဢုပ်ႉပိူင်ႇဝႆႉယူႇ ဝႃႈၼႆ။

တႆးလွတ်ႈလႅဝ်း