ရၢတ်ႉသျႃးယိုဝ်းမၢၵ်ႇမိတ်ႉသႆးတိုၵ်းၼႂ်းဝဵင်းလူင်ယူႇၶရဵၼ်းႁၢဝ်ႈႁႅင်း

မိူဝ်ႈဝၼ်းထီႉ 10 October 2022 ရၢတ်ႉသျႃး ယိုဝ်းမၢၵ်ႇမိတ်ႉသႆး ၶဝ်ႈတိုၵ်းယိုဝ်းဝဵင်းလူင် Kyiv လႄႈ လၢႆလၢႆဝဵင်းၼႂ်းယူႇၶရဵၼ်းသေ လႆႈဝႃႈပဵၼ်သုၼ်ႇၼိုင်ႈ ဢၼ်မိူၼ်လွင်ႈပိုၼ်ၽၢဝ်ႇ ဝလႃႇတီႇမီရ်ႇ ပူႇတိၼ်ႇ ဝႃႈတေမီးၵၢၼ်တိုၵ်းတေႃး ဢၼ်ယိုင်ႈယႂ်ႇမႃးထႅင်ႈ ၼႆၼၼ်ႉယဝ်ႉ။

ၽၢႆႇတၢင်းယူႇၶရဵၼ်းပိုတ်ႇလၢတ်ႈၼႄဝႃႈ ရၢတ်ႉသျႃးၼၼ်ႉ ယိုဝ်းမၢၵ်ႇမိတ်ႉသႆး 75 လုၵ်ႈ ၼႂ်းယူႇၶရဵၼ်းလၢႆလၢႆဝဵင်း ယႃႉလူႉပဝ်ႉမၢႆဢမ်ႇယွမ်း 10 ဢွင်ႈတီႈ၊ ၵမ်ႈၼမ်ၼၼ်ႉ တေပဵၼ်တီႈ ၼႂ်းဝဵင်းလူင် Kyiv သေ ၵိူတ်ႇပဵၼ်မႃးၼႂ်းၵၢင်မိူင်း၊ ဢွင်ႈတီႈဢၼ်မီးၵူၼ်းၶွၼ်ႈၼမ် လႄႈ ပိုၼ်ႉတီႈလႄႇၸိူဝ်းၼႆႉ ႁဵတ်းႁႂ်ႈမီးၵူၼ်းလူႉသဵင်ႈတၢႆၵႂႃႇ ဢမ်ႇယွမ်း  5 ၵေႃႉ မၢတ်ႇၸဵပ်း 12 ၵေႃႉ သေ ထႅင်ႈလၢႆလၢႆဝဵင်းၵေႃႈ မီးၵူၼ်းလူႉတၢႆ ဢမ်ႇယွမ်း 5 ၵေႃႉ မိူၼ်ၵၼ် ၼႆယဝ်ႉ။

ဢမေႇရိၵၢၼ်ႇ လႄႈ မိူင်းဝၼ်းတူၵ်းၶဝ်ၵေႃႈ ဢွၵ်ႇမႃးလၢတ်ႈထိုင် လွင်ႈငဝ်းလၢႆးဢၼ်ၵိူတ်ႇၶိုၼ်ႈပဵၼ်မႃးၼႆႉယူႇ လႄႈပိုၼ်ၽၢဝ်ႇဝႃႈ တေသူင်ႇၶိူင်ႈၵွင်ႈၵၢင်ႇ ပၼ်တပ်ႉသိုၵ်းယူႇၶရဵၼ်း တႃႇႁပ်ႉတိုၵ်းၸွမ်းရၢတ်ႉသျႃးၵႂႃႇထႅင်ႈ ဝႃႈၼႆ။

ၸွမ်ၸိုင်ႈ ဢမေႇရိၵၢၼ်ႇ ၵျူဝ်း ပၢႆႇတႅၼ်ႇ လႆႈဢွၵ်ႇမႃးလၢတ်ႈထိုင် လွင်ႈရၢတ်ႉသျႃးယိုဝ်းမၢၵ်ႇမိတ်ႉသႆး  ၶဝ်ႈလူမ်ႇယူႇၶရဵၼ်းၼႆႉ လႆႈဝႃႈပဵၼ်လွင်ႈဢၼ် ၼႄႁႂ်ႈႁၼ်မႃးထႅင်ႈပွၵ်ႈၼိုင်ႈ  လူၺ်ႈလွင်ႈႁုၵ်းႁၢႆႉလိူဝ်သေပိူၼ်ႈ ၶွင်ပၢင်တိုၵ်း ဢၼ်ၽိတ်းတေႃႇမၢႆမီႈ ယွၼ်ႉလွင်ႈႁဵတ်းသၢင်ႈပူႇတိၼ်ႇ၊  ၵၢၼ်တိုၵ်းတေႃးၼႆႉ လိူဝ်သေတေၵမ်ႉသၢင်ႈပၼ် ႁႂ်ႈယိုၼ်ယၼ်ယူႇၽၢႆႇလဵဝ်ၵၼ်တင်းၵူၼ်းမိူင်းယူႇၶရဵၼ်း ႁႂ်ႈယိုၼ်းယၢဝ်းမႃးထႅင်ႈယဝ်ႉ ၽၢႆႇတၢင်းဢမေႇရိၵၢၼ်ႇၼၼ်ႉၵေႃႈ တေႁူမ်ႈၸွမ်းမိူင်းဢူၺ်းလီ ဢိၵ်ႇတင်း မိူင်းႁူမ်ႈၼႃႈၵၢၼ်ၵၼ်ၸိူဝ်းၼႆႉ တေသိုပ်ႇႁဵတ်းသၢင်ႈၵႂႃႇ ၸွမ်းၶၵ်ႉတွၼ်ႈ ၼႂ်းၵၢၼ်ပၢႆးမၢၵ်ႈမီးတေႃႇရၢတ်ႉသျႃး ဢၼ်ပူၼ်ႉပႅၼ်ယူႇၶရဵၼ်းၼၼ်ႉလႄႈ တေႁဵတ်းႁႂ်ႈ ပူႇတိၼ်ႇလႄႈရၢတ်ႉသျႃး ပေႃးလႆႈႁပ်ႉဢဝ်ပုၼ်ႈၽွၼ်း တေႃႇလွင်ႈဢၼ်ႁုၵ်းႁၢႆႉ လႄႈ ၵၢၼ်ၵေႃႇသၢင်ႈပၢင်တိုၵ်းၸိူင်ႉၼႆမႃး၊ လိူဝ်ၼၼ်ႉ တေၸတ်းႁႃၶိူင်ႈၵမ်ႉထႅမ် ဢၼ်ၸမ်ပဵၼ်တေႃႇဢဵၼ်ႁႅင်းယူႇၶရဵၼ်း တႃႇၵႅတ်ႇၶႄမိူင်းလႄႈလွင်ႈလွတ်ႈလႅဝ်းဢဝ်ဝႆႉ ဝႃႈၼႆ။

ၽၢႆႇတၢင်းပူႇတိၼ်ႇၵေႃႈ လႆႈလၢတ်ႈတီႈပၢင်ၵုမ် လွင်ႈမၼ်ႈၼိမ်သဝ်းၼၼ်ႉဝႃႈ ၵၢၼ်တိုၵ်းတေႃးၼၼ်ႉ ယိူင်းဢၢၼ်းပဝ်ႉမၢႆဝႆႉတီႈ ၶူင်ႉသၢင်ႈပိုၼ်ႉထၢၼ်ပွတ်းတွၼ်ႈႁႅင်းထၢတ်ႈ ၼႂ်းၵၢၼ်သိုၵ်း၊ ၵၢၼ်ၵပ်းသိုပ်ႇၵပ်းသၢၼ်ၶွင်ယူႇၶရဵၼ်း ႁႂ်ႈပဵၼ်ၵၢၼ်တုမ်ႉတွပ်ႇၶိုၼ်း ဢၼ်ယူႇၶရဵၼ်း ႁဵတ်းႁၢႆႉၶူဝ်လူင်ၵပ်းသိုပ်ႇၵၼ်ၼႂ်းၵႄႈၵၢင် ရၢတ်ႉသျႃး လႄႈ Crimea ဢၼ်ရၢတ်ႉသျႃးႁုပ်ႈသိမ်းလႆႈမိူဝ်ႈပီႊ 2014 ၼၼ်ႉသေ ၼႄလႆႈၸႅင်ႈလႅင်းဝႃႈ ၸုမ်းၶၢဝ်ႇလပ်ႉၶွင်ယူႇၶရဵၼ်းၼၼ်ႉ ပဵၼ်ၽူႈသင်ႇၵၢၼ်ဝၢင်းၽႅၼ်လႄႈတိုၵ်းတေႃး လူၺ်ႈႁဵတ်းႁၢႆႉပဝ်ႉမၢႆၶူင်ႉသၢင်ႈ ပိုၼ်ႉထၢၼ်သဵၼ်ႈတၢင်းဢၼ်လမ်ႇလွင်ႈ ၶွင်ရၢတ်ႉသျႃးၼၼ်ႉဝႃႈၼႆ။

ၵဵဝ်ႇလူၺ်ႈလွင်ႈၶူဝ်ဢၼ်လႆႈထုၵ်ႉယႃႉလူႉလႅဝ်ၼႆႉ ၽၢႆႇတၢင်းယူႇၶရဵၼ်းၵေႃႈ ဢမ်ႇပႆႇဢွၵ်ႇမႃးယွမ်းႁပ်ႉဝႃႈ ပဵၼ်ၽၢႆႇယႃႉလူႉၶူဝ်ၼၼ်ႉယူႇႁိုဝ်ၼႆယဝ်ႉ။

လိူဝ်သေၼႂ်းဝဵင်းလူင် Kyiv ၼၼ်ႉယဝ်ႉ မၢၵ်ႇမိတ်ႉသႆးၶွင်ရၢတ်ႉသျႃးၼၼ်ႉၵေႃႈ တူၵ်းၵႂႃႇၼႂ်းလၢႆလၢႆဝဵင်း ႁူမ်ႈပႃးပွတ်းတူၵ်း၊ ပွတ်းၵၢင် လႄႈပွတ်းဢွၵ်ႇၸိူဝ်းၼႆႉ ၽၢႆႇတၢင်းယူႇၶရဵၼ်းၵေႃႈ ပိုတ်ႇလၢတ်ႈၼႄဝႃႈ လႆႈယႃႉလူႉမၢၵ်ႇမတ်ႉသႆးရၢတ်ႉသျႃးၵႂႃႇ 41 လုၵ်ႈ ၼႆယူႇ။

ၸွမ်ၸိုင်ႈ ဝူဝ်ႇလူဝ်ႇတီႇမီရ်ႇ သေႇလႅၼ်ႇသၵီႇၵေႃႈဝႃႈ ရၢတ်ႉသျႃး တိုၵ်းတေႃးပဝ်ႉမၢႆ ဢၼ်ပဵၼ်ပိုၼ်ႉတီႈၵူၼ်းမိူင်းၶွၼ်ႈတုမ်လႄႈ ၶူင်ႉသၢင်ႈၾႆးၾႃႉ တူဝ်ႈတင်းမိူင်း လူၺ်ႈမုင်ႈမွင်းႁႂ်ႈ မီးလွင်ႈတိုၼ်ႇၵူဝ် လႄႈ ႁႂ်ႈမီးလွင်ႈလူႉသုမ်းၼမ် ဢိၵ်ႇတင်း ယႃႉလူႉႁႅင်းထၢတ်ႈၶွင်ယူႇၶရဵၼ်းၸိူဝ်းၼႆႉ ၼႆယဝ်ႉ။

တႆးလွတ်ႈလႅဝ်း