ရၢတ်ႉသျႃးသူင်ႇဢွၵ်ႇၶၢႆႁႅင်းထၢတ်ႈ မိူင်းဢိၼ်းတီးယႃးၶိုၼ်ႈပဵၼ် မၢႆသွင်ယဝ်ႉ

ဝၢႆးသေရၢတ်ႉသျႃးၶဝ်ႈတိုၵ်းယူႇၶရဵၼ်းမႃးၼၼ်ႉ ၵၢၼ်တေႃႉသူင်ႇဢွၵ်ႇၶၢႆ ႁႅင်းထၢတ်ႈၶွင်ရၢတ်ႉသျႃး ဢၼ်သူင်ႇၵႂႃႇတီႈမိူင်းၶႄႇ၊ မိူင်းဢိၼ်းတီးယႃးၼၼ်ႉ တိူဝ်းၶိုၼ်ႈမႃးတေႉတေႉယူႇ ၵူၺ်းၵႃႈ ၵၢၼ်သူင်ႇဢွၵ်ႇတင်းဢမေႇရိၵၢၼ်ႇ လႄႈ ယူးရူပ်ႇ ဢိၵ်ႇၵျႃႇပၢၼ်ႇၼၼ်ႉတႄႉ လူတ်းယွမ်းမႃးတေႉတေႉယဝ်ႉ ဝႃႈၼႆ။

ၽၢႆႇထတ်းသၢင်ႈငဝ်းလၢႆးႁႅင်းထၢတ်ႈလႄႈလူမ်းမူတ်းသႂ်ၶဝ် ပိုတ်ႇလၢတ်ႈၼႄဝႃႈ ၵႃႈၶၼ်ၵၢၼ်သူင်ႇဢွၵ်ႇႁႅင်းထၢတ်ႈၶွင်ရၢတ်ႉသျႃး ၵႂႃႇတီႈမိူင်းၶႄႇၼၼ်ႉ တိူဝ်းၶိုၼ်ႈမႃးထႅင်ႈ ႁူဝ်ပၢၵ်ႇသိပ်းၸဵတ်း 17% ဢမ်ႇၼၼ် 30 လၢၼ်ႉယူႇရူဝ်ႇ၊ ၼႂ်းၵႄႈၵၢင်လိူၼ် July ထိုင် August 2022 ၼႆႉ ပေႃးတႅၵ်ႈၵၼ်တူၺ်းၼႂ်းလိူၼ် February လႄႈ March 2022 ပေႃးၼႆၸိုင် ၵၢၼ်သူင်ႇဢွၵ်ႇ ႁႅင်းထၢတ်ႈတီႈဢိၼ်းတီးယႃးၼၼ်ႉ တိူဝ်းၶိုၼ်ႈမႃးပဵၼ် 5.7 ပုၼ်ႈ ပဵင်းတၢၼ်ႇ 40 လၢၼ်ႉယူႇရူဝ်ႇ လႄႈ သူင်ႇဢွၵ်ႇထၢၼ်ႇႁိၼ်ယူႇတီႈႁူဝ်ပၢၵ်ႇႁႃႈသိပ်းသၢမ် 53% လႄႈၼမ်ႉမၼ်း ႁူဝ်ပၢၵ်ႇသိပ်းႁူၵ်း 16% သေ လႆႈဝႃႈပဵၼ်ၵၢၼ်သူင်ႇၶၢႆႁႅင်းထၢတ်ႈ တီႈဢိၼ်းတီးယႃးၼၼ်ႉ ပဵၼ်မၢႆသွင်ၶွင်ရၢတ်ႉသျႃး ဢၼ်ယူႇဝႆႉတီႈမၢႆသိပ်း ၼႂ်းပီႊ 2021 ၼၼ်ႉယဝ်ႉ။

ၶူဝ်းၶွင်ၶၢႆဢွၵ်ႇၼွၵ်ႈမိူင်းရၢတ်ႉသျႃးၼၼ်ႉ လႆႈဝႃႈႁႅင်းထၢတ်ႈၼႆႉပဵၼ်ပိူင်လူင်ယဝ်ႉ ၼႂ်းၼၼ်ႉ တေမီးမိူၼ်ၼင်ႇ ၼမ်ႉမၼ်း၊ ၵႅတ်ႉသ် သေ ၽၢႆႇတၢင်းလူင်ပွင်ၸိုင်ႈၵေႃႈ ႁပ်ႉၽွၼ်းလႆႈ ႁူဝ်ပၢၵ်ႇ သီႇသိပ်း 40% ယူႇ၊ ၵူၺ်းၵႃႈ ဝၢႆးသေၵိူတ်ႇပဵၼ်မႃးပၼ်ႁႃၵၼ်တင်းယူႇၶရဵၼ်းမႃးၼၼ်ႉ ႁဵတ်းႁႂ်ႈ ဢမေႇရိၵၢၼ်ႇ၊ ယူးရူပ်ႇ လႄႈ ၵျႃႇပၢၼ်ႇ ၶွမ်ႈသပိတ်ႈ ၼမ်ႉမၼ်း လႄႈ ထၢၼ်ႇႁိၼ်ရၢတ်ႉသျႃး သေ ၵၢၼ်သူင်ႇဢွၵ်ႇႁႅင်းထၢတ်ႈၶွင်ရၢတ်ႉသျႃး ဢၼ်သူင်ႇဢွၵ်ႇၼႂ်းယူးရူပ်ႇၼၼ်ႉၵေႃႈ ယွမ်းလူင်းႁူဝ်ပၢၵ်ႇသၢမ်သိပ်းႁႃႈ 35% ၊ ဢမေႇရိၵၢၼ်ႇလႄႈမိူင်းဢိင်းၵတ်ႉၼၼ်ႉ ယွမ်းလူင်းမႃးထိုင် ႁူဝ်ပၢၵ်ႇၵဝ်ႈသိပ်း 90% ယူႇ၊ ၵျႃႇပၢၼ်ႇၵေႃႈ ယွမ်းလူင်းမႃး ႁူဝ်ပၢၵ်ႇၸဵတ်းသိပ်း 70% ၼႆသေ ၽၢႆႇတၢင်းရၢတ်ႉသျႃးၼၼ်ႉ လႆႈဝၢႆႇၼႃႈၶဝ်ႈႁႃတၢင်ႇမိူင်း ဢၼ်ဢမ်ႇလႆႈၶဝ်ႈႁူမ်ႈၸွမ်း ၵၢၼ်ၶွမ်ႈသပိတ်ႈရၢတ်ႉသျႃး မိူၼ်ၼင်ႇၶႄႇ လႄႈ ဢိၼ်းတီးယႃး ၼၼ်ႉမႃးယူႇယဝ်ႉ။

လိူဝ်သေၼၼ်ႉ ရၢတ်ႉသျႃးၵေႃႈ ယင်းသူင်ႇၶၢႆႁႅင်းထၢတ်ႈပၼ်ပႃးတီႈ တူႇရၵီႇ တိူဝ်းၶိုၼ်ႈမႃးထႅင်ႈ ႁူဝ်ပၢၵ်ႇသၢဝ်း 20% ယူႇ ပႅၵ်ႉသမ်ႉဝႃႈ တူႇရၵီႇၼၼ်ႉ ပဵၼ်ၽူႈၶဝ်ႈၸုမ်း NATO လႄႈ ယၢမ်ႈလၢတ်ႈထိုင်လွင်ႈရၢတ်ႉသျႃး ၶဝ်ႈတိုၵ်းယူႇၶရဵၼ်းသေတႃႉ ၵူၺ်းၵႃႈ ဢမ်ႇလႆႈၶွမ်ႈသပိတ်ႈရၢတ်ႉသျႃး ၼႆယဝ်ႉ။

တႆးလွတ်ႈလႅဝ်း