လိူတ်ႈတႃတႅၵ်ႇၼင်ႇၵၼ်ယဝ်ႉလႄႈ ႁိုဝ်မီးၸႂ်မႅတ်ႉတႃႇၼိူဝ်ၵူၼ်းမိူင်း

ပၢင်တိုၵ်း 1027 ၸိုင်ႈတႆးပွတ်းႁွင်ႇၼႆႉ သိုၵ်းတင်းသွင်ၽၢႆႇ လူႉတၢႆမၢတ်ႇၸဵပ်းၼမ်ၵႃႈႁိုဝ်ၼႆ တေဢမ်ႇလႆႈႁူႉၸွမ်း ၵူၺ်းၵႃႈ သင်ႇၶႃႇၸဝ်ႈလႄႈ ပေႃႈမႄႈၵူၼ်းမိူင်း ၸိူဝ်းဢမ်ႇမီးတၢင်းၽိတ်းသင်ၼၼ်ႉတႄႉ လႆႈမၢတ်ႇၸဵပ်းလူႉတၢႆၸွမ်း ဢမ်ႇဢေႇယဝ်ႉ၊ ဢၼ်လႆႈပၢႆႈလႆႈၼီ ယွၼ်ႉပၢင်တိုၵ်းသိုၵ်းသွင်ၽၢႆၼၼ်ႉၵေႃႈ ယိုင်ႈၶႅၼ်းၼပ်ႉပေႃးဢမ်ႇလႆႈယဝ်ႉ။

ၽၢႆႇၼိုင်ႈၵေႃႈ ၵွပ်ႈတူၵ်းသုမ်းၼမ်ၽႅဝ်လႄႈ မင်ၵႃႈပွင်ႇၵႃႈပဵၼ် တီႈလႂ်မီးၶဵၼ် တီႈလႂ်ပဵၼ်ၵူၼ်းမိူင်းၼႆၼၼ်ႉ ပေႃးဢမ်ႇဝူၼ်ႉဢမ်ႇသွၼ်ႇ၊ ၸူးဢဝ်ၸႂ်ၶႂ်ႈတုမ်ႉတွပ်ႇသေ တီႈလႂ်ႈမီးၵူၼ်းၵိုၼ်းၶွၼ်ႈ ဢမ်ႇဝႃႈတေပဵၼ်ၸွမ်းဝတ်ႉဝႃးၽႃသိူဝ်ႇ၊ ၸွမ်းႁူင်းယႃ၊ ၸွမ်းၵၢတ်ႇၸွမ်းသႃးၸိူဝ်းၼႆႉ တင်ႈၸႂ်ယိုဝ်းသႂ်ႇပွႆႇမၢၵ်ႇသႂ်ႇ ထိုင်တီႈပေႃးလိုမ်းတူၺ်းႁၼ်ၸႅၵ်ႇပဵၼ် ၽူႈၶဵၼ်လႄႈၵူၼ်းမိူင်းယဝ်ႉ၊ ထႅင်ႈၽၢႆႇၼိုင်ႈၵေႃႈတေႃႈၼင်ႇၼၼ် ပဵၼ်ၽၢႆႇဢွင်ႇပေႉဝႆႉသေၵေႃႈယႃႇ ၸွမ်းဢဝ်ၸႂ်ၶႂ်ႈပဵၼ်ၶႂ်ႈဝႃႈသေ တိုၵ်းယိုဝ်းၵႃႈပွင်ႇၵႃႈပဵၼ် လူၺ်ႈလိုမ်းယၵ်ႉဝၢႆႇႁၼ်ၵူၼ်းဝၢၼ်ႈၵူၼ်းမိူင်း ၸိူဝ်းဢမ်ႇမီးတၢင်းၽိတ်းသင်ၼၼ်ႉယဝ်ႉ၊ ၸုမ်းလႂ်ၵေႃႈလၢတ်ႈတၢင်းသူပ်းတႄႉဝႃႈ ႁၼ်ထိုင်ပေႃႈမႄႈၵူၼ်းမိူင်း တၢင်းႁဵတ်းတၢင်းသၢင်ႈသမ်ႉ ၸိုင်မိူၼ်ၵူၼ်းလိူင်းတႄႉယဝ်ႉ။

မိူဝ်ႈ  01 August 2024 ၼၼ်ႉ ၸုမ်းသိုၵ်းမၢၼ်ႈတင်ႈၸႂ်ပွႆႇမၢၵ်ႇသႂ်ႇႁူင်းယႃ တီႈလဝ်ႉၵႆႇ (လၢဝ်ႇၵၢႆး) သေ ထႅင်ႈဝၼ်းၼိုင်ႈ ၸုမ်းသိုၵ်းၵူဝ်းၵၢင်ႉ ၶိုၼ်းပိုတ်းယိုဝ်းသႂ်ႇႁူင်းယႃ တီႈဝဵင်းလႃႈသဵဝ်ႈလႂ်ၸိူဝ်းၼႆႉ ပဵၼ်ၵၢၼ်တုမ်ႉတွပ်ႇၵၼ်ၵႂႃႇမႃးလႄႈ လွင်ႈႁဵတ်းသၢင်ႈသွင်ၸုမ်းၼႂ်းဝၼ်းၼၼ်ႉ ႁဵတ်းႁႂ်ႈမီးၵူၼ်းလူႉတၢႆၼမ်တင်းသွင်တီႈ ပႃးၸဵမ် ၵူၼ်းလူင် လုၵ်ႈဢွၼ်ႇ ႁူင်းယႃၼႆၼၼ်ႉ ပဵၼ်တီႈဢၼ် ၵူၼ်းၶွၼ်ႈၵၼ်ၼမ်ၼၼ်ႉယဝ်ႉ၊ ဢမ်ႇၵွမ်ႉၵႃႈၼႆႉၵွႆး တႄႇဢဝ်ဝၼ်းႁႅၵ်ႈပၢင်တိုၵ်း 1027 ပွၵ်ႈၵမ်းသွင် ၼၼ်ႉမႃး ၵူၼ်းမိူင်းလႆႈတၢႆယွၼ်ႉသိုၵ်းသွင်ၽၢႆ ၼပ်ႉႁူဝ်ပၢၵ်ႇမၼ်းယဝ်ႉ။

မိူၼ်ၼင်ႇဝၼ်းဢၼ်သိုၵ်းၵူဝ်းၵၢင်ႉ MNDAA ႁူမ်ႈဢူၺ်းလီမၼ်းသေ တႄႇပိုတ်ႇပၢင်တိုၵ်းတီႈလႃႈသဵဝ်ႈၼၼ်ႉ ပိူဝ်ႈပဵၼ်ၵၢၼ်တုမ်ႉတွပ်ႇသိုၵ်းၵၼ်ၼႆသေ သိုၵ်းမၢၼ်ႈၵေႃႈဢဝ်ႁိူဝ်းမိၼ်ပွႆမၢၵ်ႇ တီႈဝဵင်းသႅၼ်ဝီလႄႈ ၵူၼ်းမိူင်းလူႉတၢႆမၢတ်ႇၸဵပ်းဢမ်ႇဢေႇ၊ ၸွမ်းၼင်ႇၸုမ်း SHRF ဢွၵ်ႇၽိုၼ်တၢမ်းငဝ်းလၢႆးၼၼ်ႉ တီႈဝဵင်းသႅၼ်ဝီၼႆႉ တင်ႇတႄႇဝၼ်းထီႉ 13−28 July 2024 ၵူၼ်းမိူင်းလူႉတၢႆ ယွၼ်ႉသိုၵ်းမၢၼ်ႈပွႆႇမၢၵ်ႇတုမ်ႉတွပ်ႇသိုၵ်းၵူဝ်းၵၢင်ႉၶဝ် 13 ၵေႃႉ၊ မၢတ်ႇၸဵပ်း 24 ၵေႃႉ၊ ႁိူၼ်းယေးလႄႈႁူင်းႁဵၼ်းလူႉၵွႆ 40 လင်ပၢႆၼႆယဝ်ႉ။

လွင်ႈဢၼ်သိုၵ်းမၢၼ်ႈၸႂ်ႉတိုဝ်းႁိူဝ်းမိၼ်သေ ၵႆႉပွႆႇမၢၵ်ႇသႂ်ႇၼႆႉ တေမီးမိူၼ်ၼင်ႇ လႃႈသဵဝ်ႈ၊ သႅၼ်ဝီ၊ ၵူတ်ႉၶၢႆ၊ သီႇပေႃႉ၊ ၵျွၵ်ႉမႄး၊ လဝ်ႉၵႆႇ (လၢဝ်ႇၵၢႆး) ၸိူဝ်းၼႆႉ မၢင်တီႈဢမ်ႇမီးပၢင်တိုၵ်းသင် ယွၼ်ႉၼင်ႇၼႆသေ မိူဝ်ႈၼႂ်းဝၼ်းထီႉ 06 August 2024 ၼႆႉ လႆႈႁူႉဝႃႈ ၸုမ်းဢူၺ်းလီ 3 ၸုမ်း တုၵ်းယွၼ်းႁႂ်ႈမိူင်းၶႄႇ ႁႄႉႁၢမ်ႈသိုၵ်းမၢၼ်ႈ လွင်ႈၸႂ်ႉတိုဝ်းႁိူဝ်းမိၼ်သေပွႆႇမၢၵ်ႇၼႆယဝ်ႉ ဝႃႈၼၼ်သေတႃႉ ၼႂ်းဝၼ်းလဵဝ်ၵၼ်ၵူၺ်း သိုၵ်းမၢၼ်ႈပွႆႇမၢၵ်ႇသႂ်ႇတီႈ ဝတ်ႉၵျွင်းၼွင် ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ဢၼ်မီးတီႈဝၢၼ်ႈၼွင်ၵေႃႈ ၸႄႈဝဵင်းသီႇပေႃႉ ၼၼ်ႉၼႆ တေႁူႉႁၼ်ၵၼ်ယူႇ။

တီႈၵူတ်ႉၶၢႆၵေႃႈတေႃႈၼင်ႇၼၼ် မိူဝ်းဝႃး 07 August 2024 ယၢမ်းဝၢႆးဝၼ်းမွၵ်ႈ 13:30 မူင်း သိုၵ်းမၢၼ်ႈဢဝ်ႁိူဝ်းမိၼ် Jet Fighter ပွႆႇမၢၵ်ႇသႂ်ႇထႅင်ႈ ဝဵင်းၵူတ့်ၶၢႆ မိူင်းတႆးပွတ်းႁွင်ႇ တီႈဢၼ်သိုၵ်းပလွင်ႈ TNLA ၶဝ်ၵုမ်းၵမ်ဝႆ့ၼၼ်ႉမိူၼ်ၵၼ် လွင်ႈတုမ်ႉတိူဝ်ႉတႄႉပႆႇႁူႉၸွမ်း။ ပေႃးမႃးတူၺ်းလၢႆလၢႆၸႄႈဝဵင်း ဢၼ်ၸုမ်းဢူၺ်းလီၶဝ် ပိုၼ်ၽၢဝ်ႇတိုၵ်းသိမ်းၵုမ်းၵမ်ႇလႆႈၼၼ်ႉ လိူဝ်သေဝဵင်းဢၼ်တိတ်းၸပ်းမိူင်းၶႄႇ လႄႈဝဵင်းဢၼ်သိုၵ်းဝ UWSA ၶဝ်ၵုမ်းၵၼ်ၼၼ်ႉ ဢမ်ႇပေႃးမီးဝဵင်းလႂ် ဢၼ်လွတ်ႈသိုၵ်းမၢၼ်ႈပွႆႇမၢၵ်ႇသႂ်ႇ တေလႆႈဝႃႈ ၸုမ်းဢူၺ်းလီၶဝ်တိုၵ်းသိမ်းလႆႈသေတႃႉ ၽႂ်ၵေႃႈဢမ်ႇပၵ်းသဝ်းလႆႈမိူၼ်ၵၼ် ၵူၺ်း မႃးၼႃႇတီႈၵူၼ်းမိူင်းၵွႆးယဝ်ႉ။

တင်ႇတႄႇသွင်ၽၢႆႇတိုၵ်းၵၼ်မႃး ၵူၼ်းမိူင်းၼပ်ႉသႅၼ် လႆႈပၢႆႈၽေးလႄႈ ၵမ်ႈၼမ် ပၢႆႈၸူးမိူင်းတႆးပွတ်းၸၢၼ်း ဢၼ်မၢတ်ႇၸဵပ်းလူႉတၢႆၸွမ်းၵေႃႈ ၼပ်ႉႁူဝ်ႁဵင် ပႃးၸဵမ်သင်ႇၶႃႇၸဝ်ႈၶဝ်ယဝ်ႉ၊ ၶူဝ်းၶွင်ဢမူၺ်ႇ ႁိူၼ်းယေးၵူၼ်းမိူင်း လႄႈဝတ်ႉဝႃးၽႃသိူဝ်ႇၵေႃႈ လႆႈလူႉၵွႆႁၢႆၸွမ်းဢမ်ႇဢေႇယဝ်ႉ၊ ပဵၼ်ၼၼ်မႃး ပုၼ်ႈတႃႇၵူၼ်းမိူင်းဢၼ်လႆႈပၢႆႈယွၼ်ႉပၢင်တိုၵ်းၼၼ်ႉ ၵတ်းၵႃႈယင်းမီးသင်ႇၶႃႇၸဝ်ႈၶဝ်လႄႈ ပေႃႈမႄႈၵူၼ်းမိူင်း၊ မူႇၸုမ်း၊ တူင်ႇဝူင်းၵူၼ်း၊ ၸိူဝ်းယူႇၼွၵ်ႈမိူင်း/ၼႂ်းမိူင်း ၵမ်ႉၸွႆႈတူၺ်းထိုင်ပၼ် လွင်ႈတီႈယူႇတၼ်းသဝ်း၊ ၶဝ်ႈၼမ်ႉတၢင်းၵိၼ်၊ ၽႃႇႁူမ်ႇၶူဝ်းၼွၼ်း လႄႈယႃႈယႃၸိူဝ်းၼႆႉလႂ်လႃႈ သင်ဢမ်ႇမီးၸႂ်မႅတ်ႉတႃႇၶဝ်ၸဝ်ႈ တေပဵၼ်ႁိုဝ်မႃးၼႆၼၼ်ႉ ဝူၼ်ႉပေႃးဢမ်ႇပွင်ႇယဝ်ႉ ၸႂ်ယႂ်ႇၸူးဢဝ်ၸုမ်းသိုၵ်း ဢၼ်ၵေႃႇပၢင်တိုၵ်းမႃးၼၼ်ႉတႄႉ ႁိုဝ်မီးၽႂ်ၸုမ်းလႂ်ဢဝ်ပုၼ်ႈၽွၼ်ႈပၼ်ၶိုၼ်း ၵွပ်ႈ “လိူတ်ႈတႃတႅၵ်ႇၼင်ႇၵၼ်ယဝ်ႉလႄႈ ႁိုဝ်မီးၸႂ်မႅတ်ႉတႃႇၼိူဝ်ၵူၼ်းမိူင်း” ။

လွမ်ႉမိူင်း ၵေးသီး

08 August 2024

ပွၵ်ႈၵႂၢမ်းႁူဝ်ၼႆႉ ပဵၼ်ပၢႆးဝူၼ်ႉလႄႈတၢင်းႁၼ်ထိုင်ၽူႈတႅမ်ႈလိၵ်ႈၵေႃႉလဵဝ်ၵွႆး ဢမ်ႇၸႂ်ႈၶေႃႈၶၢၼ်ပၢၵ်ႇ တႆးလွတ်ႈလႅဝ်း