လိၵ်ႈႁူမ်ႈမၢႆ NCA ၶွပ်ႈတဵမ် 9 ပီႊ လႄႈ သိုၵ်းမၢၼ်ႈတေဢမ်ႇယွမ်းတေႃႇၸၢဝ်းၶိူဝ်း

မိူဝ်ႈၼႆႉဝၼ်းထီႉ 15 October 2024 (လိူၼ်သိပ်းဢဵတ်းမႂ်ႇ 13 ၶမ်ႈ ပီႊတႆး 2118 ၼီႈ) ပဵၼ်ဝၼ်းဢၼ် ၸုမ်းယိပ်းၵွင်ႈၵၢင်ႇၸၢဝ်းၶိူဝ်း လူင်းလၢႆးမိုဝ်းလိၵ်ႈႁူမ်ႈမၢႆၵိုတ်းတိုၵ်း ပတ်းပိုၼ်ႉၸိုင်ႈမိူင်း NCA ၶွပ်ႈတဵမ် 9 ပီႊ လႄႈ ပွၵ်ႈၼႆႉဢမ်ႇမီးပၢင်ၵႅဝ်ႈယႂ်ႇလူင် မိူၼ်မိူဝ်ႈပီႊပူၼ်ႉမႃး ဝႃႈၼႆ။

ၼႂ်းဝၼ်းလိၵ်ႈႁူမ်ႈမၢႆ NCA ၶွပ်ႈတဵမ် 9 ပီႊၼႆႉ ၽၢႆႇပိုၼ်ၽၢဝ်ႇသိုၵ်းမၢၼ်ႈ ဢဝ်ၶေႃႈၵႂၢမ်း ၸွမ်ၸိၵ်းသိုၵ်း မိၼ်းဢွင်ႇလၢႆႇ ပိုၼ်ၽႄႈၼိူဝ် Online သေ ၼႂ်းၼၼ်ႉ ၸွမ်ၸိၵ်းသိုၵ်း မိၼ်းဢွင်ႇလၢႆႇ လၢတ်ႈဝႆႉဝႃႈ −

ၸုမ်းၸၢဝ်းၶိူဝ်း ယိပ်းၵမ်ၵွင်ႈၵၢင်ႇသေ တႅၼ်းတၢင်တီႈၵၢၼ်ဢုပ်ႇဢူဝ်းၵၢၼ်မိူင်း လႄႈ တုၵ်းယွၼ်းသုၼ်ႇလႆႈသုၼ်ႇပဵၼ်ၼၼ်ႉ ယူႇတီႈတပ်ႉသိုၵ်းမၢၼ်ႈ တေဢမ်ႇယွၼ်ႇယၢၼ်း ၵႄႈလိတ်ႈပၼ်ၵႂႃႇလႆႈ၊ တႅၼ်းတီႈတေယိပ်းၵွင်ႈၵၢင်ႇသေ တုၵ်းယွၼ်းသုၼ်ႇလႆႈသုၼ်ႇပဵၼ်ၼၼ်ႉ တပ်ႉသိုၵ်းမၢၼ်ႈတိုၵ်းသူၼ်း ႁႂ်ႈလႆႈဢုပ်ႇငူပ်ႉငီႉၵၼ်သေ တုၵ်းယွၼ်းဢဝ်၊ ၵဵဝ်ႇလူၺ်ႈၵၢၼ် ဢုပ်ႇဢူဝ်းလွင်ႈငမ်းယဵၼ်ၼၼ်ႉ တၢင်းၽၢႆႇသိုၵ်းမၢၼ်ႈ လႆႈၽိတ်ႈမွၵ်ႇ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း 2 ပွၵ်ႈသေတႃႉ ၵွပ်ႈဢမ်ႇပႆႇသၢင်ႈလႆႈ လွင်ႈယုမ်ႇယမ်ၵၼ် လႄႈ လွင်ႈဢုပ်ႇဢူဝ်းၵၼ်ၼၼ်ႉၵေႃႈ ဢမ်ႇပႆႇပဵၼ်မႃး။

ၸုမ်းလူင်းလၢႆးမိုဝ်းလိၵ်ႈႁူမ်ႈမၢႆ NCA ၵမ်ႈၽွင်ႈၵေႃႈ ယႃႉပႅတ်ႈၶေႃႈၵိၼ်ႇၵႅၼ်ႇသေ ၵမ်ႉထႅမ်ပၼ်ႁႅင်း ၸုမ်း NUG,CRPH,PDF  လႄႈ ယူႇတီႈတပ်ႉသိုၵ်းမၢၼ်ႈၵေႃႈ တွၼ်ႈတႃႇတေ တိုၵ်းတေႃးပႅတ်ႈၸုမ်းၵေႃႇၵၢၼ်ႁၢႆႉၼၼ်ႉ ထုၵ်ႇလီႁဵတ်းသၢင်ႈ ၸိူင်ႉႁိုဝ်ၵေႃႈ တေဝၢင်းၽႅၼ်သေၶိုင်ပွင်ႁဵတ်းသၢင်ႈၵႂႃႇယူႇယဝ်ႉ၊ ၼင်ႇႁိုဝ်ၵူၼ်းမိူင်း ပေႃးတေဢမ်ႇထုၵ်ႇၺႃး ၸုမ်းၵေႃႇၵၢၼ်ႁၢႆႉၸႂ်ႉၵိၼ်ယွၵ်ႇၵိၼ်ၼၼ်ႉ ႁႂ်ႈလႆႈၾၢင်ႉသတိၵၼ် ဝႃႈၼႆ။

ၼႂ်းပိုၼ်ႉတီႈၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸိူဝ်းလူင်းလၢႆးမိုဝ်းလိၵ်ႈႁူမ်ႈမၢႆ NCA ဝႆႉၵမ်ႈၽွင်ႈၼၼ်ႉ မိူဝ်ႈလဵဝ်လႆႈၶဵင်ႈၶႅင်ၵၢၼ်သိုၵ်းၵၼ်တင်း ၸုမ်းသိုၵ်းမၢၼ်ႈၵေႃႈမီးယူႇယဝ်ႉ။

တႆးလွတ်ႈလႅဝ်း