လိၼ်ၵူၼ်ႇဢိၼ်းတီးယႃး ၵူၼ်းတၢႆပၢၵ်ႇပၢႆ

ၽေးသၽႃႇဝ လိၼ်ၵူၼ်ႇႁၢဝ်ႈႁႅင်းတီႈၼႂ်းၸႄႈမိူင်း Kerala မိူင်းဢိၼ်းတီးယႃး ၵူၼ်းလူႉသဵင်ႈတၢႆ 100 ပၢႆလႄႈ လၢမ်းၶၢတ်ႈဝႃႈ ၵူၼ်းဢၼ်ၶမ်ယူႇၼႂ်းဢုင်ၼၼ်ႉ ၵိုတ်းထႅင်ႈတင်းၼမ် ၼႆယဝ်ႉ။

ဝၢႆးသေၽူၼ်တူၵ်းႁႅင်း တီႈၼႂ်းမိူင်းဢိၼ်းတီးယႃးပွတ်းၸၢၼ်း ၸႄႈမိူင်း Kerala ၸွမ်းသူၼ်ၼဵင်ႈ၊ ဝၢၼ်ႈလၢႆလၢႆဝၢၼ်ႈ လႆႈၶၢမ်ႇတၢင်းလိၼ်ၸွမ်းလွႆ ၵူၼ်ႇပင်းလူင်းသႂ်ႇ မိူဝ်ႈၼႂ်းဝၼ်းထီႉ 29 July 2024 ၼၼ်ႉလႄႈ ၽၢႆႇတၢင်းၽူႈမီးပုၼ်ႈၽွၼ်းၶဝ်ၵေႃႈ ဢွၼ်ၵၼ်ၶတ်းၸႂ်ၸွႆႈထႅမ်ၵႂႃႇယူႇယဝ်ႉ။ မိူဝ်ႈၼႂ်းဝၼ်းထီႉ 30 July 2024 ၼၼ်ႉ မီးၵူၼ်းလူႉသဵင်ႈတၢႆၵႂႃႇယဝ်ႉ ဢမ်ႇယွမ်း 106 ၵေႃႉ၊ လၢမ်းၶၢတ်ႈဝႃႈ မီးၵူၼ်းၶမ်ယူႇတႂ်ႈၵူမ်ႇဢုင်ၼၼ်ႉထႅင်ႈတင်းၼမ် ဝႃႈၼႆ။

ၽူႈမီးပုၼ်ႈၽွၼ်းၶဝ်ၵေႃႈ ၶဝ်ႈၵႂႃႇၸွႆႈထႅမ်လႆႈယၢပ်ႇယူႇ ၸွမ်းလူၺ်ႈမီးတူၼ်ႈမႆႉႁၵ်းၵၢၼ်ႉ ဢိၵ်ႇတင်း  မီးၼမ်ႉဢိူင်းယိုင်ႈ လေႃးလိၼ်ၵႂႃႇၸွမ်း ပဵၼ်ၵူမ်ႇပဵၼ်ဢုင်လူင်ဝႆႉ ၼၼ်ႉယဝ်ႉ။

မိူဝ်ႈၼႂ်းပီႊ 2018 ၼၼ်ႉၵေႃႈ တီႈၼႂ်းၸႄႈမိူင်း Kerala ၼႆႉၵူၺ်းၼင်ႇၵဝ်ႇ ယၢမ်ႈမီးၼမ်ႉထူမ်ႈႁၢဝ်ႈႁႅင်းသေ ၵူၼ်းလူႉသဵင်ႈတၢႆၵႂႃႇ ၸမ်ၸမ် 400 ၵေႃႉယူႇယဝ်ႉ။

တႆးလွတ်ႈလႅဝ်း