လုမ်းတႅပ်းတတ်းတြႃးမိူင်းထႆး သင်ႇယႃႉပႃႇတီႇၵၢဝ်ႉၵႆ

ပႃႇတီႇၵၢၼ်မိူင်း ၼႂ်းမိူင်းထႆး ဢၼ်ပဵၼ် ပႃႇတီႇၵၢဝ်ႉၵႆ Move Forward Party ဢၼ်ဢွင်ႇပေႉပၢင်လိူၵ်ႈတင်ႈၼႂ်းမိူင်းထႆး မိူဝ်ႈပီႊ 2023 ပူၼ်ႉမႃးၼၼ်ႉ လႆႈထုၵ်ႇသင်ႇယႃႉပႃႇတီႇသေ ထွၼ်ဢွၵ်ႇၼႂ်းသၽႃးမိူင်းထႆးၵႂႃႇ ယူႇယဝ်ႉ။

မိူဝ်ႈၼႂ်းဝၼ်းထီႉ 7 August 2024 (လိူၼ်ၵဝ်ႈမႂ်ႇ 3 ၶမ်ႈ ပီႊတႆး 2118 ၼီႈ) လုမ်းတႅပ်းတတ်းတြႃးမိူင်းထႆး လႆႈတႅပ်းတတ်း သင်ႇယႃႉပႃႇတီႇၵၢဝ်ႉၵႆ လႄႈ သင်ႇႁၢမ်ႈၸုမ်းၽူႈပွင်ၵၢၼ်ပႃႇတီႇ ဢမ်ႇပၼ်ႁႂ်ႈၶဝ်ႈမႃးၵဵဝ်ႇၶွင်ႈၸွမ်းၵၢၼ်မိူင်း ၶၢဝ်းတၢင်း 10 ပီႊ ဝႃႈၼႆ။

ၼႂ်းလုမ်းတႅပ်းတတ်းတြႃးၵေႃႈ ဢွၵ်ႇမႃးလၢတ်ႈဝႃႈ လွင်ႈတူင်ႉၼိုင်ပႃႇတီႇၵၢဝ်ႉၵႆၼၼ်ႉ ပဵၼ်လွင်ႈႁဵတ်းသၢင်ႈဢၼ်ၸၢင်ႈပဵၼ်ၽေး တေႃႇၵၢၼ်ဢုပ်ႉပိူင်ႇၽွင်းငမ်း ၼႂ်းပိူင်တီႇမူဝ်ႇၶရေႇသီႇ ဢၼ်မီးၶုၼ်ႁေႃၶမ်းပဵၼ်ၸိၵ်းၸွမ်ဝႆႉၼၼ်ႉ ဝႃႈၼႆ။

ပႅၵ်ႉသမ်ႉဝႃႈ လွင်ႈထုၵ်ႇသင်ႇယႃႉပႃႇတီႇၼၼ်ႉ သၼ်ႇၶွၼ်းထိုင် ၵူၼ်းၼုမ်ႇ ၸိူဝ်းမီးသုၼ်ႇလႆႈလိူၵ်ႈတင်ႈလႄႈ ၵူၼ်းၼႂ်းမိူင်းၼပ်ႉႁူဝ်လၢၼ်ႉ ၸိူဝ်းၵမ်ႉထႅမ်ပႃႇတီႇၵၢဝ်ႉၵႆ ၼၼ်ႉသေတႃႉ ၽွၼ်းယွၼ်ႈၵၢၼ်တႅပ်းတတ်းတြႃးၼႆႉၵေႃႈ ဝူၼ်ႉဝႃႈတေမီးၶွပ်ႇလႅၼ်မၼ်းယူႇ ဝႃႈၼႆ၊ ၸိူင်ႉႁိုဝ်ၵေႃႈယဝ်ႉ တႅၼ်းၽွင်းၵူၼ်းမိူင်းၶွင်ပႃႇတီႇၵၢဝ်ႇၵႆၼၼ်ႉ ယင်းတိုၵ်ႉပဵၼ် ၽူႈၶဝ်ႈၸုမ်းသၽႃး ထိင်းသိမ်းတီႈၼင်ႈဝႆႉလႆႈယူႇလႄႈ လၢမ်းၶၢတ်ႈဝႃႈ ၼႂ်းဝၼ်းထီႉ 9 August 2024 ၼႆႉ တေဢွၼ်ၵၼ်ၶၢႆႉၵႂႃႇၶဝ်ႈပဵၼ် ၽူႈၶဝ်ႈၸုမ်းပႃႇတီႇမႂ်ႇ ဢၼ်လႆႈႁၢင်ႈႁႅၼ်းဝႆႉလူင်ႈၼႃႈၼၼ်ႉ ဝႃႈၼႆ။

လိူဝ်သေၼၼ်ႉ ႁွင်ႈၵၢၼ်လူင်ၽၢႆႇၼွၵ်ႈမိူင်း ဢမေႇရိၵၢၼ်ႇ ၵေႃႈ ဢွၵ်ႇမႃးလၢတ်ႈထိုင် လွင်ႈၼႆႉမိူၼ်ၵၼ်ဝႃႈ ဢမေႇရိၵၢၼ်ႇ ပဵၼ်ဢၼ်မႆႈၸႂ်ယူႇ ၵဵဝ်ႇလူၺ်ႈလွင်ႈဢၼ် လုမ်းတႅပ်းတတ်းတြႃးမိူင်းထႆး မီးၶေႃႈတႅပ်းတတ်း သင်ႇယႃႉပႃႇတီႇၵၢဝ်ႉၵႆ လႄႈ တတ်းသုၼ်ႇလႆႈ ၽၢႆႇၵၢၼ်မိူင်းၶွင် ၸုမ်းၽူႈပွင်ၵၢၼ်ပႃႇတီႇ 11 ၵေႃႉ၊ ၸွမ်းၼင်ႇပဵၼ်မိူင်းဢူၺ်းလီၵၼ်ၵေႃႈ ၶႂ်ႈတုၵ်းယွၼ်းႁႂ်ႈမိူင်းထႆး ပၼ်ႁႂ်ႈၵူၼ်းမိူင်းၵူႈၵေႃႉ မီးသုၼ်ႇႁူမ်ႈတၢင်းၵၢၼ်မိူင်း လႆႈတႄႉတႄႉလႄႈ ၵႅတ်ႇၶႄပၼ်ၵၢၼ်ဢုပ်ႉပိူင်ႇ လၢႆးတီႇမူဝ်ႇၶရေႇသီႇ ႁူမ်ႈပႃးလွင်ႈလွတ်ႈလႅဝ်း ၼႂ်းတူင်ႇဝူင်း၊ ယွၼ်ႉပိူဝ်ႈ လွင်ႈၵူၼ်းမိူင်းမီးသုၼ်ႇႁူမ်ႈတၢင်းၵၢၼ်မိူင်းၼၼ်ႉ ၸွႆႈသၢင်ႈပၼ်ႁႂ်ႈမေႃယူႇသၢင်ႈၵိၼ်သဝ်း ၼႂ်းတူင်ႇဝူင်းႁူမ်ႈၵၼ်လႄႈ ၵမ်ႉထႅမ်ပၼ်ႁႂ်ႈၸိူဝ်ႉၸၢတ်ႈၵႅၼ်ႇၶႅင်မႃး ဝႃႈၼႆ။

တႆးလွတ်ႈလႅဝ်း