လုၵ်ႈဢွၼ်ႇလႆႈတၢႆယွၼ်ႉမၢၵ်ႇလူင်သိုၵ်းမၢၼ်ႈ

မိူဝ်ႈဝႃးဝၼ်းထီႉ 9 January 2025 (လိူၼ်ၵမ်မႂ်ႇ 11 ၶမ်ႈ ပီႊတႆး 2119 ၼီႈ) ယၢမ်းၵၢင်ဝၼ်းမွၵ်ႈ 11:00 မူင်း ၸုမ်းသိုၵ်းမၢၼ်ႈယိုဝ်းမၢၵ်ႇလူင် ၶဝ်ႈၵႂႃႇတီႈ ၼႂ်းဝၢၼ်ႈဢၢႆႇၸၢၼ်ႉ ၸႄႈဝဵင်းလွႆႇလိၼ်ႇလေး မိူင်းယၢင်းလႅင် ဢၼ်တိတ်းၸပ်းၵၼ်တင်း မိူင်းတႆးၼၼ်ႉသေ ၸၢၵ်ႇမၢၵ်ႇတႅၵ်ႇတိူဝ်ႉၸပ်း လုၵ်ႈဢွၼ်ႇတၢႆ 2 ၵေႃႉ မၢတ်ႇၸဵပ်း 1 ၵေႃႉ ဝႃႈၼႆ။

ၵူၼ်းမိူင်းၼႂ်းပိုၼ်ႉတီႈ လၢတ်ႈတီႈသိုဝ်ႇၶၢဝ်ႇ People’s Spring ဝႃႈ မၢၵ်ႇလူင်သိုၵ်းမၢၼ်ႈ တူၵ်းၶဝ်ႈၵႂႃႇတီႈၼႂ်းဝၢၼ်ႈ 3 လုၵ်ႈ၊ တႅၵ်ႇတိူဝ်ႉၸပ်းၺႃး လုၵ်ႈဢွၼ်ႇယိင်း ဢႃႇယု 12 ၶူပ်ႇ 2 ၵေႃႉ လႆႈတၢႆထင်တီႈၵႂႃႇ၊ ယဝ်ႉၵေႃႈတိူဝ်ႉၺႃးပႃးမိုဝ်းၽၢႆႇသၢႆႉ လုၵ်ႈဢွၼ်ႇလႅင် ဢၼ်တိုၵ်ႉမီးဢႃႇယု မွၵ်ႈ 4 လိူၼ်ၵေႃႉၼိုင်ႈ ဝႃႈၼႆ။

တီႈဝၢၼ်ႈဢၢႆႇၸၢၼ်ႉၼႆႉ ၵမ်ႉၼမ်ပဵၼ်ၸၢဝ်းၶိူဝ်းလီႇသူးယူႇသၢင်ႈၵိၼ်သဝ်း လႄႈ မီးလင်ႁိူၼ်း မွၵ်ႈ 50 လင် ၼႆယူႇယဝ်ႉ။

တႆးလွတ်ႈလႅဝ်း