လုၵ်ႈၼွင်ႉတပေး ၸဝ်ႈသြႃႇၵလျႃႇၼဝမ်ႇသ တေၸတ်းႁဵတ်းပၢင်ၶုၵ်းထူပ်း ၶွပ်ႈတဵမ် 4 ပီႊ

လုၵ်ႈၼွင်ႉတပေး လႄႈ တၵ်ႉၵႃႇသတ်ႉထႃး ၼႂ်းတူင်ႇဝဵင်းၵျွၵ်းမႄး တေၸတ်းႁဵတ်း ပၢင်ၶုၵ်းထူပ်း ၶွပ်ႈၶူပ်ႇတဵမ် 4 ပီႊ ႁဵတ်းတၢင်းလီ  ယွၼ်းသူးထိုင် ၸဝ်ႈသြႃႇ ၵလျႃႇၼဝမ်ႇသ ဢၼ်လွၼ်ႇဢဝ်ၼိပ်ႉပၢၼ်ႇၵႂႃႇၼၼ်ႉ တမ်ႈတီႈဝတ်ႉသွၼ်ထမ်း ၵျွင်းယွတ်ႈ ပွၵ်ႉ (7) ဝဵင်းၵျွၵ်းမႄး ဝႃႈၼႆ။

ပေႃးထိုင်မႃး မိူဝ်ႈၽုၵ်ႈ ဝၼ်းထီႉ 5 October 2022 (လိူၼ်သိပ်းဢဵတ်းမႂ်ႇ 11 ၶမ်ႈ ပီႊတႆး 2116 ၼီႈ) ပဵၼ်ဝၼ်းဢၼ် ၸဝ်ႈသြႃႇၵလျႃႇၼဝမ်ႇသ ၽူႈႁၵ်ႉသႃ သႃႇသၼႃႇ လႄႈ ၸိူဝ်ႉၶိူဝ်းဝၢၼ်ႈမိူင်း လူႉလွၼ်ႇၵႂႃႇ ၶွပ်ႈတဵမ် 4 ပီႊယဝ်ႉၼႆလႄႈ ၸိူဝ်းပဵၼ်လုၵ်ႈၼွင်ႉတပေး ဢိၵ်ႇတင်း တၵ်ႉၵႃႇသတ်ႉထႃး တေၸတ်းႁႅၼ်း ပၢင်လူႇတၢၼ်း ႁဵတ်းတၢင်းလီၵုသူဝ်ႇယိူင်းၸူးထိုင် ၸဝ်ႈသြႃႇၵလျႃႇၼဝမ်ႇသ ဝတ်ႉသွၼ်ထမ်း ၵျွင်းယွတ်ႈ ဝဵင်းၵျွၵ်းမႄး ဢၼ်လႆႈလွၼ်ႇ ဢဝ်ၼိပ်ႉပၢၼ်ႇ ၵႂႃႇသေ ယၢမ်းၵၢင်ၼႂ် 09:00 မူင်း တေမီးပၢင်လူႇတၢၼ်းယၢတ်ႇၼမ်ႉလႄႈ ယၢမ်း 10:45 မူင်း တေၵၢပ်ႈသွမ်းဝၼ်း သင်ႇၶႃႇၸဝ်ႈ၊ ယၢမ်းၵၢင်ၶမ်ႈ 18:00 မူင်း လုၵ်ႈၼွင်ႉတပေး သင်ႇၶႃႇၸဝ်ႈ လႄႈ တၵ်ႉၵႃႇသတ်ႉထႃး တေၶိုၼ်းႁူမ်ႈၵၼ် တႆႈတဵၼ်း ပူႇၸေႃႇလူႇတၢၼ်းထိုင် ၸဝ်ႈသြႃႇ ၵလျႃႇၼဝမ်ႇသ ဝႃႈၼႆ။

ယွၼ်ႉၼႆလႄႈ ၼင်ႇႁိုဝ်ပေႃးတေပဵၼ်ၽွၼ်းလီၵုသူဝ်ႇ ၽဵင်ႇပဵင်းၵၼ်ၼၼ်ႉ ပေႃႈမႄႈၵူၼ်းမိူင်းႁဝ်းၶႃႈ တီႈၸမ်တီႈၵႆ ၵႂႃႇၶဝ်ႈႁူမ်ႈလူႇတၢၼ်း ႁူမ်ႈႁဵတ်းတၢင်းလီ ၵုသူဝ်ႇလႆႈယူႇ ဝႃႈၼႆ။

ၸဝ်ႈသြႃႇၵလျႃႇၼဝမ်ႇသၼႆႉ လႆႈထုၵ်ႇၵူၼ်းႁၢႆႉ ဢမ်ႇႁူႉၸိုဝ်ႈ 2 ၵေႃႉ ပႃးၵွင်ႈၵၢင်ႇ ႁေႃႈလူတ်ႉၶိူင်ႈ  ၶဝ်ႈၵႂႃႇၼႂ်းဝၢင်းၵျွင်းယွတ်ႈသေ ယိုဝ်းသႂ်ႇၸဝ်ႈသြႃႇ 7 ၵမ်း လႄႈ ႁဵတ်းႁႂ်ႈၸဝ်ႈသြႃႇၵလျႃႇၼဝမ်ႇသ လႆႈလွၼ်ႇဢဝ်ၼိပ်ႉပၢၼ်ႇၵႂႃႇ မိူဝ်ႈဝၼ်းထီႉ 5 October 2018 ယၢမ်းႁူဝ်ၶမ်ႈ 18:00 မူင်း ၼၼ်ႉၵမ်းလဵဝ် ဝႃႈၼႆ။

ၸဝ်ႈသြႃႇၵလျႃႇၼဝမ်ႇသ မီးဢႃႇယု 46 ပီႊ ၵိူတ်ႇတီႈဝၢၼ်ႈသွၼ်း ၸႄႈဝဵင်းၼမ်ႉၶမ်း လႄႈ ဝႃႇတေႃႇၸဝ်ႈ မီး 27 ဝႃႇ ၶိုၼ်ႈပဵၼ်ၸဝ်ႈၼင်ႈၵျွင်း ၵျွင်းယွတ်ႈ ဝဵင်းၵျွၵ်းမႄး ပႃးထူၼ်ႈ (7) သေ မီးသင်ႇၶႃႇၸဝ်ႈ ၶိုၼ်ႈသွၼ်ႁဵၼ်းဝႆႉ 200 တူၼ် သေဢမ်ႇၵႃး မၼ်းၸဝ်ႈလႆႈဢွၼ်ႇတႄႇတင်ႈ ယေးငိုၼ်းဝူင်းမႅတ်ႉတႃႇ ၼႂ်းမိူင်းတႆး ထႅင်ႈလၢႆလၢႆတီႈ ဝႃႈၼႆ။

တႆးလွတ်ႈလႅဝ်း