လူင်ပွင်ၸိုင်ႈမိူင်းၶျၢင်း ပၼ်ၵႃႈသၢႆတႅၼ်း ၵူၼ်းမိူင်းဢၼ်လႆႈတၢႆယွၼ်ႉသိုၵ်းမၢၼ်ႈဢဝ်ႁိူဝ်းမိၼ် တိုၵ်းယိုဝ်းတီႈပလႅတ်ႉဝ

ယွၼ်ႉသိုၵ်းမၢၼ်ႈ ဢဝ်ႁိူဝ်းမိၼ် မႃးပွႆႇမၢၵ်ႇတိုၵ်းယိုဝ်းၸွႆႈ ၼႂ်းပၢင်တိုၵ်း သိုၵ်းမၢၼ်ႈတင်း သိုၵ်းရၶႅင်ႇ AA တီႈႁိမ်းဝဵင်းပလႅတ်ႉဝ မိူဝ်ႈဝၼ်းထီႉ 7 April 2020 (လိူၼ်ႁႃႈမူၼ်း ပီႊတႆး 2114 ၼီႈ) ၼၼ်ႉသေ ႁဵတ်းႁႂ်ႈၵူၼ်းမိူင်းပလႅတ်ႉဝ လႆႈလူႉတၢႆ (7) ၵေႃႉလႄႈ မၢတ်ႇၸဵပ်း (8) ၵေႃႉ၊ လင်ႁိူၼ်းၵူၼ်းမိူင်း ၸိူဝ်းၼႆႉၵေႃႈ ၾႆးမႆႈၵႂႃႇတင်းၼမ်ၼႆယဝ်ႉ။

ယွၼ်ႉသိုၵ်းမၢၼ်ႈ ဢဝ်ႁိူဝ်းမိၼ် မႃးပွႆႇမၢၵ်ႇတိုၵ်းယိုဝ်းလႄႈ ၵူၼ်းမိူင်းဢၼ်လႆႈတၢႆၵႂႃႇၸိူဝ်းၼၼ်ႉ ပဵၼ်ၵူၼ်းမိူင်းၼႂ်းပိုၼ်ႉတီႈ ၽၢႆႇၸဵင်ႇၸၢၼ်းဝၼ်းဢွၵ်ႇ ဝဵင်းပလႅတ်ႉဝ၊ ဢၼ်မီးႁိမ်း သဵၼ်ႈတၢင်းၵႃး ၵျွၵ်ႉတေႃႇ−ပလႅတ်ႉဝ ၸိူဝ်းၼႆႉၼႆယဝ်ႉ။

ၸိူဝ်းႁိမ်းႁွမ်းၼၼ်ႉ မီးဝၢၼ်ႈၵူၼ်းရၶႅင်ႇ၊ ၵူၼ်းၶူႇမီးလႄႈ ၵူၼ်းၶျၢင်းယူႇသဝ်းဝႆႉၵမ်ႈၽွင်ႈသေ တပ်ႉသိုၵ်းရၶႅင်ႇ AA မီးလွင်ႈလတ်းၽၢၼ်ႇၵႂႃႇမႃးၸွမ်းဝၢၼ်ႈၸိူဝ်းၼၼ်ႉလႄႈ သိုၵ်းမၢၼ်ႈၸင်ႇလႆႈ ဢဝ်ႁိူဝ်းမိၼ်မႃးတိုၵ်းယိုဝ်း ပွႆႇမၢၵ်ႇသႂ်ႇၼႆ ႁူဝ်ပဝ်ႈၸုမ်းၸၢဝ်းၶိူဝ်းၶူႇမီး (KACC) လၢတ်ႈတီႈသိုဝ်ႇၶၢဝ်ႇ BBC ဝႆႉၼင်ႇၼႆ။

ၵူၼ်းမိူင်းဢၼ်လႆႈလူႉတၢႆ ယွၼ်ႉသိုၵ်းမၢၼ်ႈ ဢဝ်ႁိူဝ်းမိၼ်မႃးပွႆႇမၢၵ်ႇၼၼ်ႉ ပဵၼ်ၽူႈယိင်း (3) ၵေႃႉ၊ ၽူႈၸၢႆး (3) ၵေႃႉလႄႈ လုၵ်ႈဢွၼ်ႇမွၵ်ႈ ဢႃႇယု (3) ၶူပ်ႇ ၵေႃႉၼိုင်ႈၼႆယဝ်ႉ။

ယွၼ်ႉသိုၵ်းမၢၼ်ႈဢဝ်ႁိူဝ်းမိၼ် (2) လမ်းမႃးတိုၵ်းယိုဝ်း ပွႆႇမၢၵ်ႇတီႈႁိမ်းဝၢၼ်ႈၼၼ်းၶျွင်းဝလႄႈ ၵူၼ်းမိူင်း ဢၼ်လႆႈလူႉတၢႆၵႂႃႇၼၼ်ႉ ယူႇတီႈ လူင်ပွင်ၸိုင်ႈမိူင်းၶျၢင်း ၸွႆႈထႅမ်ပၼ်ၵႃႈသၢႆႈတႅၼ်း ၼိုင်ႈၵေႃႉလႂ် ငိုၼ်းမၢၼ်ႈ 300,000 ပျႃး (သၢမ်သႅၼ်)၊ ၵူၼ်းဢၼ်လႆႈ မၢတ်ႇၸဵပ်းၸွမ်းၸိူဝ်းၼၼ်ႉသမ်ႉ ၼိုင်ႈၵေႃႉလႂ် 100,000 ပျႃး (ၼိုင်ႈသႅၼ်)၊ ႁိူၼ်းဢၼ်ထုၵ်ႇၾႆးမႆႈ ၸိူဝ်းၼၼ်ႉသမ်ႉ ၼိုင်ႈႁိူၼ်းလႂ် 300,000 ပျႃး (သၢမ်သႅၼ်)ၼႆယဝ်ႉ။  

ၵူၼ်းမိူင်းၸိူဝ်းမၢတ်ႇၸဵပ်းၸိူဝ်းၼၼ်ႉတႄႉ လႆႈယူတ်းယႃတူဝ်ဝႆႉယူႇတီႈ ႁူင်းယႃဝဵင်းပလႅတ်ႉဝသေ သင်ဝႃႈ လႆႈမႆႈၸႂ်ႁႅင်းမႃးၼႆ တေၶိုၼ်းသူင်ႇယူတ်းယႃတူဝ်တီႈ ႁူင်းယႃမိၼ်းတၢတ်ႉၼႆယဝ်ႉ။

ယူႇတီႈလူင်ပွင်ၸိုင်ႈတႄႉ ပိုၼ်ၽၢဝ်ႇပဵၼ်တၢင်းၵၢၼ် မိူဝ်ႈဝၼ်းထီႉ 23 March 2020 ဝႆႉဝႃႈ ၸုမ်းသိုၵ်းရၶႅင်ႇ AA ၼႆႉ ပဵၼ်ၸုမ်းၵေႃႇၵၢၼ်ႁၢႆႉၼႆယဝ်ႉ။

တႄႇၸဵမ်မိူဝ်ႈ လိူၼ် November 2018 ၼၼ်ႉမႃးသေ သိုၵ်းမၢၼ်ႈတင်း သိုၵ်းရၶႅင်ႇ AA ပဵၼ်ပၢင်တိုၵ်းၵၼ် ၶိူဝ်းၶိူဝ်းယႂ်းယႂ်း တီႈၼႂ်းမိူင်းရၶႅင်ႇပွတ်းႁွင်ႇလႄႈ ၸႄႈဝဵင်းပလႅတ်ႉဝ မိူင်းၶျၢင်းမႃး တေႃႇပေႃးထိုင် ၼႂ်းလိူၼ် April 2020 ယၢမ်းလဵဝ်ၼႆႉသေ ယွၼ်ႉပၢင်တိုၵ်းသွင်ၽၢႆႇသေ ၵူၼ်းမိူင်းၼပ်ႉႁူဝ်သႅၼ် လႆႈပၢႆႈၽေးပၢင်တိုၵ်းတင်းၼမ်လႄႈ လႆႈလူႉတၢႆၵေႃႈမီးမႃးတင်းၼမ်ၼႆယဝ်ႉ။

တႆးလွတ်ႈလႅဝ်း