လူမ်းလႅင်ႉလူင် Typhoon Rai ၶႃႈသၢႆၸႂ်ၵူၼ်း ၾီႇလိပ်ႇပိၼ်ႇ ၼပ်ႉႁူဝ်ပၢၵ်ႇ

လူမ်းလႅင်ႉလူင် Typhoon Rai  ပဵၼ်လူမ်းဢၼ်ႁႅင်းလိူဝ်ပိူၼ်ႈၼႂ်းပီႊၼႆႉ တီႈၼႂ်းမိူင်းၾီႇလိပ်ႇပိၼ်ႇၼႆသေ မီးၵူၼ်းလူႉတၢႆၵႂႃႇယွၼ်ႉမၼ်း ၼပ်ႉႁူဝ်ပၢၵ်ႇ ယူႇယဝ်ႉ။

မိူဝ်ႈဝၼ်းထီႉ 20 December 2021 (လိူၼ်ၸဵင်လွင်ႈ 2 ၶမ်ႈ ပီႊတႆး 2116 ၼီႈ)  ၼႆႉ ၽၢႆႇတင်းၾီႇလိပ်ႇပိၼ်ႇ လၢႆးငၢၼ်းဝႃႈ ယွၼ်ႉလူမ်းလႅင်ႉလူင် Typhoon Rai သေ လႆႈထူဝ်းၽတ်ႉၶဝ်ႈတီႈၼႂ်းမိူင်း ၾီႇလိပ်ႇပိၼ်ႇလႄႈ မီးၵူၼ်းလူႉတၢႆၵႂႃႇ သုင်ထိုင် 208 ၵေႃႉ၊ ၵူၼ်းမၢတ်ႇၸဵပ်းဢမ်ႇယွမ်း 239 ၵေႃႉ၊ ၵူၼ်းႁႃဢမ်ႇပႆႇထူပ်း မီး 52 ၵေႃႉသေ ႁူဝ်ၼပ်ႉၵူၼ်းလူႉသဵင်ႈတၢႆၼၼ်ႉ တေၸၢင်ႈတိူဝ်းၶိုၼ်ႈထႅင်ႈ ဝႃႈၼႆ။

မိူဝ်ႈဝၼ်းထီႉ 16 December 2021 (လိူၼ်ၸဵင်မႂ်ႇ 3 ၶမ်ႈ ပီႊတႆး 2116 ၼီႈ) လူမ်းလႅင်ႉလူင် Typhoon Rai တႄႇၽတ်ႉထူဝ်းၶဝ်ႈ ၼႂ်းမိူင်းၾီႇလိပ်ႇပိၼ်ႇ ပွတ်းၵၢင်လႄႈ ပွတ်းၸၢၼ်းသေ၊ ႁႅင်းလူမ်းတူင်ႉၼိုင်တၢင်းဝႆး ၼိုင်ႈၸူဝ်ႈမူင်း တေႃႇ 195 ၵီႇလူဝ်ႇမီႇတိူဝ်ႇ၊ ႁဵတ်းႁႂ်ႈၵူၼ်းမိူင်းဢမ်ႇယွမ်း 3 သႅၼ်ၵေႃႉ လႆႈၶၢႆႉပၢႆႈၵႂႃႇယူႇဝႆႉၼႂ်းပိုၼ်ႉတီႈလွတ်ႈၽေး ၼႆယူႇ။

ၽၢႆႇတင်းမိူင်းဝႅတ်ႉၼၢမ်းၵေႃႈ လၢမ်းၶၢတ်ႈဝႆႉဝႃႈ လူမ်းလႅင်ႉလူင် Typhoon Rai တေထူဝ်းၽတ်ႉၶဝ်ႈ ၼႂ်းဝၼ်းထီႉ 20 December 2021 ၼႆႉ ၼႆလႄႈ တေၸၢင်ႈႁဵတ်းႁႂ်ႈမီးၽူၼ်တူၵ်းႁႅင်း၊ လူမ်းႁႅင်းၼႆသေ ၵူၼ်းၸိူဝ်းဢၼ် ယူႇႁိမ်းၽင်ႇပၢင်ႇလၢႆႇ လၢႆႁဵင်ၵေႃႉ လႆႈၶၢႆႉပၢႆႈၵႂႃႇယူႇဝႆႉတီႈလွတ်ႈၽေး ယူႇယဝ်ႉ။

ၼႂ်းဝၼ်းထီႉ 19 December 2021 ၼႆႉၵူၺ်း သိုဝ်ႇၶၢဝ်ႇဝႅတ်ႉၼၢမ်း VTV  လၢႆးငၢၼ်းဝႃႈ ႁွၼ်ၼမ်ႉၶိုၼ်ႈသုင် လူမ်းႁႅင်းၼႂ်းပၢင်ႇလၢႆလႄႈ ဢီးၽိုတ်ႉထွင်းႁိူဝ်းၵူၼ်းႁႃပႃ 5 လမ်းသေ မီးၵူၼ်းလူႉတၢႆ 1 ၵေႃႉ ၼႆယူႇ။

ၽၢႆႇၸဝ်ႈပၢႆးသၢႆႈၶဝ်ၵေႃႈ ပၼ်ၾၢင်ႉမႃးၶၢဝ်းႁိုင်ယဝ်ႉဝႃႈ ႁႅင်းမႆႈလုမ်ႈၾႃႉ သုင်ၶိုၼ်ႈမႃး ယွၼ်ႉလွင်ႈႁဵတ်းသၢင်ႈၵူၼ်းႁဝ်းလႄႈ ပဵၼ်လွင်ႈတၢင်းဢၼ်ၼိုင်ႈ ႁဵတ်းႁႂ်ႈလူမ်းလႅင်ႉလူင် Typhoon  ထူဝ်းထွင်းမႃးႁၢဝ်ႈႁႅင်းသေ တိူဝ်းၶိုၼ်ႈတၢင်းဝႆး ႁႅင်းမႃးထႅင်ႈ ၼႆယူႇယဝ်ႉ။

တႆးလွတ်ႈလႅဝ်း