လွင်းသုမ်းလႄႈထိုင်တီႈလႆႈႁႅမ်တၢႆပႅတ်ႈၵူၼ်းၵိၼ်ၸၢင်ႈႁေႃႈလူတ်ႉၶိူင်ႈ Taxi

ၵူၼ်းမိူင်းၵေႃႉၼိုင်ႈ ဢဝ်ငိုၼ်းလႄႈလူတ်ႉၶိူင်ႈၸဝ်ႈၵဝ်ႇ လွင်းသုမ်းတီႈ ပၢင်တေႃႇလွင်း ၼႂ်းဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇသေ ၵမ်းၼၼ်ႉၶိုၼ်းဝၢင်းၽႅၼ် ၸူၼ်ဢဝ်လူတ်ႉၶိူင်ႈ လႄႈ ႁႅမ်တၢႆၸဝ်ႈမၼ်း ၼႆယဝ်ႉ။

ၵဵဝ်ႇၵပ်းလူၺ်ႈလွင်ႈၼႆႉ သိုဝ်ႇၶၢဝ်ႇ Tachileik News Agency ဢွၵ်ႇဝႆႉဝႃႈ မိူဝ်ႈဝၼ်းထီႉ16 January 2025 ၼၼ်ႉ မီးၵူၼ်းမိူင်းၵေႃႉၼိုင်ႈ ၸိုဝ်ႈႁွင်ႉဝႃႈ လူင်ပွၵ်ႉ ဢႃႇယု 25 ပီႊ လွင်းသုမ်းသေ ၵမ်းၼၼ်ႉ ၼင်ႇႁိုဝ်ပေႃးတေမီးငိုၼ်းလႄႈလူတ်ႉၶိူင်ႈ ၶိုၼ်းၼၼ်ႉ ၶိုၼ်းႁွင်ႉဢဝ် ၵူၼ်းၵိၼ်ၸၢင်ႈႁေႃႈလူတ်ႉၶိူင်ႈ Taxi ဢၼ်မီးၼႂ်းပွၵ်ႉ သၼ်သၢႆးသေ ႁႂ်ႈၵႂႃႇသူင်ႇထိုင်တီႈဝၢၼ်ႈၼမ်ႉၶိၼ်း ၸႄႈဝဵင်းၵဵင်းလၢပ်ႈ တေပၼ်ၵႃႈၸၢင်ႈ ငိုၼ်းထႆး 900 ဝၢတ်ႇ ၼႆယဝ်ႉ။

မိူဝ်ႈၽွင်းပွၵ်ႈမိူဝ်းယူႇၼၼ်ႉ လူင်ပွၵ်ႉ လႆႈၵိုတ်းဝႄႉသိုဝ်ႉၽႃႉၼိုင်ႈမၢၵ်ႈ တီႈဝဵင်းတႃႈၶီႈလဵၵ်းသေ သိုပ်ႇဢွၵ်ႇၶၢဝ်းတၢင်းၵႂႃႇ၊ ၽိူဝ်ႇထိုင်တီႈသဵၼ်ႈ တၢင်းပၢတ်ႈဝဵင်း (မဵဝ်ႉပၢတ်ႉလၢၼ်း) တႃႈလိူဝ်ႇ ၼၼ်ႉ လူင်ပွၵ်ႉ ၸႂ်ႉၵူၼ်းႁေႃႈလူတ်ႉၶိူင်ႈ Taxi ႁႂ်ႈၵႂႃႇသူင်ႇတီႈဝၢၼ်ႈၸႃႉၵ ဢိူင်ႇမိူင်းၵူဝ်း ၸႄႈဝဵင်းတႃႈလိူဝ်ႇ ဢဝ်ၼႆလႄႈ တေၽိူမ်ႉပၼ်ထႅင်ႈငိုၼ်းၵႃႈၸၢင်ႈဝႃႈၼႆ၊ ၽိူဝ်ႇထိုင်တီႈၼႂ်းၵႄႈၵၢင်လွႆ ဢၼ်ဢမ်ႇပႆႇထိုင်တီႈဝၢၼ်ႈၸႃႉၵၼၼ်ႉ လူင်ပွၵ်ႉ ၸႂ်ႉၵူၼ်းႁေႃႈလူတ်ႉၵိုတ်းသေ ၶိုၼ်းဢဝ်ၽႃႉၽၼ်းတၢႆပႅတ်ႈၵူၼ်းႁေႃႈလူတ်ႉ လႄႈ  ၸူၼ်ဢဝ်လူတ်ႉၶိူင်ႈ ပွၵ်ႈမိူဝ်းၵႂႃႇတီႈ ဝၢၼ်ႈၼမ်ႉၶိၼ်း ၼႆယဝ်ႉ။

ၵူၼ်းၵေႃႉထုၵ်ႇၺႃးႁႅမ်တၢႆၼၼ်ႉ ၸိုဝ်ႈႁွင်ႉ  ပျေႉၽဵဝ်းဢွင်ႇ ဢႃႇယု 21 ပီႊ မၢႆၵူၼ်းႁေႃႈလူတ်ႉၶိူင်ႈ (595) လႄႈ လူတ်ႉၶိူင်ႈၼၼ်ႉၵေႃႈ တိုၵ်ႉၸင်ႇႁႃသိုဝ်ႉမႂ်ႇၵူၺ်း ၼႆယဝ်ႉ။

ၸွမ်းၼင်ႇၵူၼ်းႁေႃႈလူတ်ႉၶိူင်ႈ Taxi ၵေႃႉၼိုင်ႈ လၢတ်ႈတီႈသိုဝ်ႇၶၢဝ်ႇဝႃႈ ၶမ်ႈဝၼ်းထီႉ 16 January 2025 ၼၼ်ႉ သိုပ်ႇၽူင်းၸူး ၵူၼ်းႁေႃႈလူတ်ႉၵေႃႈ ဢမ်ႇလႆႈယဝ်ႉလႄႈ ၵမ်းၼၼ်ႉၵူၼ်းတင်းႁိူၼ်းလႄႈဢူၺ်းၵေႃႉၸိူဝ်းၼႆႉ ပဵၼ်ဢၼ်မႆႈၸႂ်မၼ်းၸၢႆး ယွၼ်ႉဝႃႈတီႈ ဝဵင်းတႃႈၶီႈလဵၵ်းၼႆႉ ၵႆႉမီးလွင်ႈႁုၵ်းႁၢႆႉၼႃႇ၊ ၶိုၼ်းလႆႈဢဝ်လွင်ႈတၢင်း ၵႂႃႇတိူင်ႇလၢတ်ႈတီႈ ႁူင်းပလိၵ်ႈမၢၼ်ႈ၊ ၵမ်းၼၼ်ႉထိုင်ဝၼ်းထီႉ 17 January 2025 ၽူႈမီးပုၼ်ႈၽွၼ်း ၽၢႆႇၵုမ်းထိင်းၵူၼ်းၵိၼ်ၸၢင်ႈႁေႃႈလူတ်ႉၶိူင်ႈ Taxi လႄႈ ပေႃႈမႄႈပီႈၼွင်ႉၶဝ် ဢွၼ်ၵၼ်ၵႂႃႇ တီႈဝၢၼ်ႈၼမ်ႉၶိၼ်းသေ လႆႈၵႂႃႇထူပ်းႁၼ်တီႉၺွပ်းလႆႈ လူင်ပွၵ်ႉတင်းလူတ်ႉၶိူင်ႈ ဢၼ်ၸူၼ်မႃးၼၼ်ႉ ဝႃႈၼႆ။

ၸွမ်းၼင်ႇပလိၵ်ႈမၢၼ်ႈၶဝ် ၸႅတ်ႈထၢမ်တီႈ လူင်ပွၵ်ႉ ၼၼ်ႉလႆႈႁူႉဝႃႈ ၵွပ်ႈပိူဝ်ႈလွင်းသုမ်းလႄႈ ၸင်ႇလႆႈတႅပ်းတတ်းဝၢင်းၽႅၼ် ႁႅမ်တၢႆၵူၼ်းလႄႈ ၸူၼ်ဢဝ်လူတ်ႉၶိူင်ႈဝႃႈၼႆ၊ မိူဝ်ႈလဵဝ် လူင်ပွၵ်ႉ လႆႈထုၵ်ႇၵုမ်းၶင်တူဝ်ဝႆႉတီႈ ႁူင်းပလိၵ်ႈမၢၼ်ႈ ဝဵင်းတႃႈၶီႈလဵၵ်းဝႆႉ ၼႆယဝ်ႉ။

တႆးလွတ်ႈလႅဝ်း