လွင်ႈႁဵတ်းသၢင်ႈမိူဝ်ႈၼႆႉ တေပဵၼ်ပိုၼ်းမိူဝ်းၼႃႈပၼ်လုၵ်ႈလၢၼ်

ၼႂ်းမိူင်းတႆးႁဝ်းၶႃႈၼႆႉ သင်ပဵၼ်မႃးပၢင်တိုၵ်းထႅင်ႈၸိုင် တေၸၢင်ႈႁၢဝ်ႈႁႅင်း လိူဝ်သေၵူႈပွၵ်ႈယူႇ။ ပေႃးႁဝ်းမႃးတူၺ်းငဝ်းလၢႆး ၵၢၼ်မိူင်း ၵၢၼ်သိုၵ်း ၼႂ်းမိူင်းၸိုင်ႈတႆးႁဝ်းယၢမ်းလဵဝ်  ပၼ်ႁႃပၢင်တိုၵ်းၼႂ်းမိူင်းတႆးႁဝ်းၶႃႈၼႆႉ တေၸၢင်ႈပေႃႇပဵၼ်မႃးႁၢဝ်ႈႁႅင်းလႆႈထႅင်ႈယူႇ ယွၼ်ႉဝႃႈၸုမ်းယိပ်းၵွင်ႈၵၢင်ႇ ဢၼ်မီးယူႇၼႂ်းၸိုင်ႈတႆးႁဝ်းယၢမ်းလဵဝ် ဢမ်ႇဝႃႈၸုမ်းလႂ်ၵေႃႈ ၶတ်းၸႂ်သၢင်ႈႁႂ်ႈမီးႁႅင်းသိုၵ်းမႃး ႁင်းၽႂ်မၼ်းယဝ်ႉသေ ဢမ်ႇၶဝ်ႈႁႃၵၼ်။ ပေႃးႁၼ်ၽိတ်း ႁၼ်ပိူင်ႈၵၼ်မႃးသမ်ႉ ၵုမ်ႇဢိင်ဢဝ်မႃႇၼ တေႃးသ ဢဝ်ႁဵတ်းပဵၼ်ပိူင်လူင်ၵူၺ်းလႄႈ တေၸၢင်ႈပဵၼ်ၽိုၼ်းပဵၼ်ၾႆး ၼင်ႇႁၢဝ်ႈႁႅင်းတေႃႇၵၼ်ယူႇ။ ၵႃႈပူၼ်ႉမႃး ယွၼ်ႉဝႃႈဢမ်ႇႁူႉၵၢၼ်မိူင်း ၵၢၼ်သိုၵ်း တႅတ်ႈတေႃးသေ ဢဝ်ဝၢၼ်ႈမိူင်းတႆးႁဝ်း သုၵ်ႉယုင်ႈဢူၼ်ၵဝ်း ႁဝ်းႁႃးပီႈၼွင်ႉ ၸင်ႇလႆႈဢွၼ်ၵၼ်လႅၼ်ႈၸွမ်းလွၵ်းၵၢၼ်မိူင်းပိူၼ်ႈမႃး၊ မိူဝ်ႈလဵဝ်ၼႆႉလူး ပုၼ်ႈတႃႇၵူၼ်းမိူင်းတႆးလူင်ႁဝ်းၼႆႉ တေၸႂ်ယႂ်ႇၸုမ်းဢၼ်မီးဢဵၼ်ႁႅင်းၶဝ်သေ ပၼ်ပိူၼ်ႈၽိုတ်ႉၶဝ်ႈယူႇ သွၼ်ႉၸွမ်းႁဝ်းၵႂႃႇၸိူင်ႉၼၼ်ၵူၺ်းၶႃႈႁႃႉ? ၵႃႈပူၼ်ႉမႃးၼၼ်ႉ ယွၼ်ႉတႆးႁဝ်းၶႃႈ မီးၼမ်ႉၸႂ်ၶႂ်ႈပိုင်ႈဢိင်ပိူၼ်ႈၼမ်ႁႅင်းလႄႈ မိူင်းတႆးႁဝ်းၶႃႈ ၸင်ႇလႆႈယွမ်းဢဝ်လွတ်ႈလႅဝ်းၸွမ်းမၢၼ်ႈသေ တင်ႈပဵၼ်မႃး မိူင်းႁူမ်ႈတုမ် လွင်ႈၼႆႉတႄႉႁၼ်မႃးႁင်းၽႂ်ႁင်းမၼ်းယဝ်ႉ။

ႁဝ်းမႃးတူၺ်းၶိုၼ်း ပိူင်ဢၼ်ပဵၼ်တေႉ ဢၼ်ပဵၼ်ပူၼ်ႉမႃးၼႂ်းဝၼ်းထီႉ 23/2/2023 ႁွင်ႈၵၢၼ်ၽၢႆႇပွင်ႇၶၢဝ်ႇ တပ်ႉသိုၵ်းၸၢဝ်းၶိူဝ်းပွတ်းႁွင်ႇၸုမ်းၼိုင်ႈ လႆႈတႅမ်ႈမွၵ်ႇၵႂႃႇဝႃႈ ၸုမ်းၶဝ် လႆႈၸတ်းႁဵတ်းပၢင်ႁူပ်ႉထူပ်းၸၢဝ်းၶိူဝ်း ပိူဝ်ႈတႃႇပူၵ်းတင်ႈၼႃႈလိၼ်ၽွင်းငၢမ်းတူဝ် တႄႇဢဝ် ၼႂ်းဝၼ်းထီ့ 13/2/2023 ထိုင်ဝၼ်းထီ့ 20/2/2023 တႃႇၶၢဝ်းတၢင်း (8) ဝၼ်း၊ ႁဝ်းမႃးတူၺ်း ပၢင်ႁူပ်ႉထူပ်းၵူၼ်းမိူင်း မီးၵႂႃႇ 6 ဢွင်ႈတီႈ ၼႂ်းၸေႊဝဵင်းမူႇၸေႊ၊ ၼမ်ႉၶမ်း၊ မၢၼ်ႊတူင်ႈ လႄႈ ၵူတ်ႉၶၢႆ ၸဵမ်ၸိူဝ်းၼႆႉဝႃႈၼႆ။

ၼႂ်းႁူဝ်လိူၼ် April 2023 မႃးၼႆႉ လႆႈမီးၶၢဝ်ႇၸုမ်းယိပ်းၵွင်ႈၵၢင်ႇၸၢဝ်းၶိူဝ်း  လႆႈၶႂၢၵ်ႈ ၼႃႈလိၼ် ၶၢမ်ႈၶူင်းလူင်းမႃးသဝ်းထင်ဝႆႉ ၼႂ်းမိူင်းတႆးပွတ်းႁွင်ႇ ပွတ်းထုင်ႉမိူင်းယေႃ ၸႄႈဝဵင်းလႃႈသဵဝ်ႈတင်းၼမ်။ ၸိူဝ်းႁဝ်းႁႃး လွမ်ဝူၼ်ႉၸွမ်း ၵၢၼ်သိုၵ်းၼႂ်းဝၼ်းမိူဝ်ႈၼႆႉ  မိူၼ်တေပဵၼ်ၽႅၼ်ၵၢၼ်တပ်ႉသိုၵ်းၸၢဝ်းၶိူဝ်း ၸိူဝ်းမီးႁႅင်းယႂ်ႇၶဝ်ဝႆႉလူဝ်လူဝ်။ ၵႃႈပူၼ်ႉမႃးတေလႆႈႁၼ်သိုၵ်းၸၢဝ်းၶိူဝ်းမၢင်ၸုမ်း ၶဝ်ႈႁႃၶွင်ႇသီႇသိုၵ်းမၢၼ်ႈသေ ထူဝ်းသိုၵ်းၶဝ်ႈမႃးၼႂ်းမိူင်းတႆးပွတ်းၸၢၼ်း လႄႈ ပွတ်းဢွၵ်ႇ ယၢမ်းလဵဝ်သမ်ႉ မႅၵ်ႇၶႃၸုမ်းဢူၺ်းလီပွတ်းႁွင်ႇသေ ထူဝ်းသိုၵ်းၶၢမ်ႈၶူင်း ၶဝ်ႈတဝ်ၼႂ်းမိူင်းတႆးပွတ်းႁွင်ႇ ဝၢႆးၼႆႉမႃး ၸိူဝ်းၶဝ်ႁိုဝ် တေယွၼ်ႇယွမ်းထွႆဢွၵ်ႇပၼ် ႁဝ်းလႃႇ  ထႅင်ႈလွင်ႈၼိုင်ႈၵေႃႈ တေလႆႈဝႃႈ ယွၼ်ႉဢတ်ႉတ၊ မႃႇၼ၊ တေႃးသ၊ မေႃးႁ တႆးႁဝ်း ၽၢၼ်ႇသၢင်ႈ ႁဵတ်းပဵၼ်ဢဝ်ၵူၺ်း ဝႃႈၼႆၵေႃႈ တိုၼ်းတေဢမ်ႇၽိတ်းသင်။

ၵူၼ်းၶိူဝ်းတႆးႁဝ်းၶႃႈၵူႈၸၼ်ႉထၢၼ်ႈ ၸိူဝ်းမီးဝႆႉၼႂ်းၸိုင်ႈတႆး သင်ဝႃႈႁဝ်းတိုၵ်ႉမီးႁႅင်းၸႂ် ႁတ်းႁၢၼ် ၵႅၼ်ႇၶႅင် ဢမ်ႇယွမ်းႁူၼ်လင် ဢဝ်ၵၢၼ်မိူင်း ၵၢၼ်သိုၵ်း ၵိုၵ်းႁွမ်းၵၼ်ဝႆႉမၼ်ႈမၼ်ႈ သိုပ်ႇႁဵတ်းသၢင်ႈတူင်ႉၼိုင် ဢမ်ႇၵိုတ်းဢမ်ႇလိုဝ်ႈပေႃးၼႆ မိူင်းတႆးဢၼ်ဝႃႈၼၼ်ႉ ဝၼ်းၼိုင်ႈၸဝ်ႉၸဝ်ႉ တိုၼ်းလွတ်ႈလႅဝ်းၵွၼ်းၶေႃ မႃးဢမ်ႇႁၢင်ႉ၊ ယႃႇလိုမ်းၶေႃႈၵႂၢမ်းဢၼ်ဝႃႈ “ယၢႆႈၵၼ်ႁႅင်းယွမ်း ႁွမ်းၵၼ်ႁႅင်းယႂ်ႇ” ၼၼ်ႉလႃးလႃး ႁဝ်းတေလႆႈမေႃဢဝ်တွၼ်ႈသွၼ် ဢၼ်ပဵၼ်ပိူင်တေႉမီးတေႉ ၼႂ်းမိူင်းပိူၼ်ႈၼၼ်ႉ ဢဝ်မႃးၸႂ်ႉတိုဝ်းႁႂ်ႈပဵၼ်ၽွၼ်းလီ တႃႇၸိူဝ်ႉၸၢတ်ႈတႆးႁဝ်းၼၼ်ႉၶႃႈယဝ်ႉ၊ ၵွၵ်းတူၺ်းၶိုၼ်း ပိုၼ်းမိူဝ်ႈပၢၼ် ၶႄႇလႅင် လႄႈ ၶႄႇၽိူၵ်ႇ ၶဝ်ၼၼ်ႉၵေႃႈ မိူဝ်ႈတႄႇမၼ်းပဵၼ်ဝႆႉသွင်ၸုမ်း ဢမ်ႇမႅၼ်ႈၵၼ် ပိုတ်းယိုဝ်းၵၼ်ၶိုၼ်း ႁွင်ႉဢဝ်ဢူၺ်းလီၶဝ်ၸိူဝ်းမီးဝႆႉၼွၵ်ႈမိူင်းၼၼ်ႉ ၶဝ်ႈမႃးတိုၵ်းၸွႆႈ ထိုင်တီႈပေႃးမီးမႃး လွင်ႈလူႉယႂ်ႇသုမ်းၼမ်သေ ၵမ်းလိုၼ်းမႃးတႄႉ ၶိုၼ်းဢဝ်လွၵ်းလၢႆးလီသေ ၶဝ်ႈဢုပ်ႇၵုမ်ၵၼ် မႃးၶွၼ်ႈၽွမ်ႉႁူမ်ႈၵၼ် ပဵၼ်ၸုမ်းလဵဝ်ၵၼ်ၶိုၼ်းသေ လႆႈတိုၵ်းပေႉၶိုၼ်း ၵျႃႇပၢၼ်ႇၼၼ်ႉၶႃႈယဝ်ႉ။ တႆးႁဝ်းၵေႃႈ သင်ၶွၼ်ႈၽွမ်ႉႁူမ်ႈပဵၼ်မူႇၼိုင်ႈၸုမ်းလဵဝ်ၵၼ် ၸၢင်ႈမီးႁႅင်းၶဵင်ႇတႃႉ လိုပ်ႈလမ်းၽူႈၶႂၢၵ်ႈမိူင်း ဢွၵ်ႇပူၼ်ႉမိူင်းႁဝ်းလႆႈယူႇဢမ်ႇႁၢင်ႉ၊ တီႈတေႉမၼ်း မိူင်းတႆးႁဝ်းၼႆႉ မီးသုၼ်ႇၽၢတ်ႇဢွၵ်ႇမိူင်းႁူမ်ႈတုမ်မၢၼ်ႈ ၼႆၼၼ်ႉ တႅမ်ႈဝႆႉၼႂ်းလိၵ်ႈႁူမ်ႈမၢႆပၢင်လူင်တႅၵ်ႇလႅင်းယူႇ။ ၵူၺ်းၵႃႈ မၢၼ်ႈၶဝ် ဢမ်ႇမီးလွင်ႈသိုဝ်ႈယူဝ်း ဢမ်ႇႁဵတ်းၸွမ်း လိၵ်ႈႁူမ်ႈမၢႆပၢင်လူင် သေဢမ်ႇၵႃး ယူႇၽၢႆႇပေႉပုၼ်ႈသေ သိၵ်ႇယႃႉပႅတ်ႈလိၵ်ႈႁူမ်ႈမၢႆပၢင်လူင် သိမ်းဢဝ်ၸိုင်ႈတႆးႁဝ်းမႃး ႁၢၼ်ႉတေႃႇဝၼ်းမိူဝ်ႈၼႆႉ၊ ယွၼ်ႉပိူဝ်ႈၼၼ် ဝၢၼ်ႈမိူင်းၸင်ႇဢမ်ႇၼိမ်သဝ်း  ဝၢၼ်ႈမိူင်းလုၵ်ႉပဵၼ်ၾႆး ၵူၼ်းမိူင်းတႆး တုၵ်ႉၶမႃး ၶၢဝ်းတၢင်းၸမ် 100 ပီႊယဝ်ႉ ၵူၼ်းမိူင်းႁဝ်းၶႃႈ ယင်းတိုၵ်ႉထုၵ်ႇတီႉၺွပ်း ဢဝ်ၶူဝ်းၶွင်ၵူၼ်းမိူင်းႁဝ်းလၢႆ ႁၢၼ်ႉတေႃႇဝၼ်းမိူဝ်ႈၼႆႉၵေႃႈ ယင်းတိုၵ်ႉလႆႈႁၼ် လွင်ႈမိူၵ်ႈမႂ်ႈသိုၵ်းမၢၼ်ႈၶဝ်ယူႇ၊ ယွၼ်ႉဝႃႈၼႂ်းမိူင်းတႆး မီးလွင်ႈၶီႇၼဵၵ်းတဵၵ်းတဵင် လႄႈ ၼႂ်းမိူင်းတႆး ၸင်ႇမီးၽူႈလုၵ်ႉၽိုၼ်ႉၼမ်၊ မီးၸုမ်းလုၵ်ႈၽိုၼ်ႉၼမ် လၢႆလၢႆၵူၺ်း ယွၼ်ႉမီးၸႂ် ၶႂ်ႈပဵၼ်ယႂ်ႇ ၶႂ်ႈၵုမ်းၵမ် ၶႂ်ႈသုမ်ႇငမ်းၼိူဝ်ၵၼ်လႄႈ ၸင်ႇလႆႈပဵၼ်ပၼ်ႁႃတေႃႇၵၼ်မႃး ၸင်ႇပဵၼ်ပၢင်တိုၵ်းၵၼ်မႃး တႆးႁဝ်းၼင်ႇၵၼ် ၸင်ႇလႆႈၶႃႈႁႅမ်ၵၼ်မႃး ႁၢၼ်ႉတေႃႇယၢမ်းမိူဝ်ႈလဵဝ်ယဝ်ႉ၊ ဝႃႈၼၼ်သေတႃႉ ထုၵ်ႇလီၵႄႈၶႆၵႂႃႇၸိူင်ႉႁိုဝ်ၼႆၼၼ်ႉ လီဢွၼ်ၵၼ်ဝူၼ်ႉယူႇ။

သင်ၸုမ်းယိပ်းၵွင်ႈၵၢင်ႇပိုတ်းယိုဝ်းတေႃႇၵၼ်မႃးထႅင်ႈပေႃးၼႆ တေၸၢင်ႈပဵၼ် ပၢင်တိုၵ်းယႂ်ႇ ပၢင်တိုၵ်းလူင် ၼႂ်းမိူင်းၸိုင်ႈတႆးႁဝ်းထႅင်ႈယူႇ ယွၼ်ႉသင်လႄႈ ဝႃႈၼၼ်လႃႇပေႃးၼႆ  ဢမ်ႇဝႃႈၸၢဝ်းၶိူဝ်းလႂ် ႁူႉၵႃႈတိုၼ်းၶႂ်ႈမီးဢႃႇၼႃႇပူၵ်းပွင်ၶိုၼ်း ၸိူဝ်ႉၶိူဝ်းႁင်းၽႂ်မၼ်းသေ ၶႂ်ႈမီးဝၢၼ်ႈမိူင်း တႃႇႁဵတ်းႁႃၵိၼ်လဵင်ႉတွင်ႉ။ ဢဝ်ၶေႃႈဢၢင်ႈဢၼ်ၼႆႉသေ ၵေႃႇတင်ႈတပ်ႉသိုၵ်းႁင်းၽႂ်မၼ်းမႃး မီးႁႅင်းတပ်ႉသိုၵ်းမႃးယဝ်ႉ ယွၼ်းၸႄႈမိူင်း ယွၼ်းတင်ႈၸိုင်ႈမိူင်းႁင်းၽႂ်မၼ်း၊ ႁဝ်းမႃးတူၺ်းၼႂ်းမိူင်းတႆးပွတ်းႁွင်ႇယၢမ်းလဵဝ် တႃႇတေပူၵ်းတင်ႈမႃးလႆႈ ၸႄႈမိူင်းမႃးလႆႈၼၼ်ႉ TNLA လႆႈၶိုင်ၵူႈလွၵ်းၵူႈလၢႆး ၶတ်းၸႂ်ဢဝ်ႁႅင်းသိုၵ်း ႁိပ်ႇတူင်ႉၼိုင်ဢဝ်ၼႃႈတီႈ ၸွတ်ႇတူဝ်ႈဝႆႉ ၼႂ်းမိူင်းတႆးပွတ်းႁွင်ႇ၊ ယၢမ်းလဵဝ် ၸုမ်းသိုၵ်း ဝ ၶဝ် လႆႈၶႂၢၵ်ႈဢဝ်တီႈယူႇ ၶၢမ်ႈၶူင်းထိုင်ၼႂ်းၸႄႈဝဵင်းလႃႈသဵဝ်ႈ လွင်ႈၼႆႉၵေႃႈ တေႁၼ်ၵၼ်မႃးႁင်းၽႂ်မၼ်းၶႃႈယဝ်ႉ၊ ၸိူဝ်းပဵၼ်လုၵ်ႈၸုမ်းဢူၺ်းလီပွတ်းႁွင်ႇၼၼ်ႉ ပေႃးႁဝ်းမႃးၼပ်ႉသၢင်ႈတူၺ်း တေလႆႈႁၼ်ဝႃႈ ဢမ်ႇမီးၸုမ်းယိပ်းၵွင်ႈၵၢင်ႇၸုမ်းလႂ် ဢၼ်ၶႂ်ႈယူႇႁူမ်ႈႁွမ်းၸွမ်းတႆး၊ လွင်ႈၼႆႉ ၸိူဝ်းၸႃႉပဵၼ်တႆးႁဝ်း လီဝူၼ်ႉၵႄႈလိတ်ႈၵႂႃႇ ။

ႁဝ်းမႃးလဵပ်ႈႁဵၼ်းတူၺ်းၶိုၼ်း လွင်ႈလွႆလူင် Masada stands as a symbol of Jewish determination to be free  လွႆလူင်လုၵ်ႈၼႆႉ ပဵၼ်လွႆဢၼ်ၸၢဝ်းၶိူဝ်းၵျူးၶဝ် လႆႈပိုင်ႈဢိင် ၼႂ်းၵၢၼ်လုၵ်ႉၽိုၼ်ႉ တိုၵ်းၶိုၼ်း ၽူႈၶဵၼ်တေႉတေႉၼၼ်ႉၶႃႈယဝ်ႉ။ ၵျူးၶဝ်လႆႈမၵ်းမၼ်ႈၶေႃႈတႅပ်းတတ်း ဢၼ်ဝႃႈ လွတ်ႈလႅဝ်းၵွၼ်းၶေႃ ၼႆၼၼ်ႉၵေႃႈ ပဵၼ်ၼိူဝ်လွႆသုင်လုၵ်ႈၼႆႉၵမ်းလဵဝ်၊ မိူဝ်ႈပၢၼ်ၵျူး ဢမ်ႇၼၼ် ဢၼ်ႁွင်ႉ ဢိတ်ႉသရေးယၢမ်းလဵဝ်ၼႆႉ တူၺ်းၶိုၼ်းပိုၼ်းမိူဝ်ႈၽွင်းပၢၼ်ၼၼ်ႉ ပေႃးၼႆ တေလႆႈႁၼ်ၶဝ် လႆႈၼႃႈလဵၵ်ႉတႃၼွႆႉ ၵႄႈၵၢင်ၶိူဝ်းပိူၼ်ႈ လႆႈၸွၼ်သေႃႉယူႇၸွမ်းမိူင်းပိူၼ်ႈမႃး ဝႃႈၼၼ်သေတႃႉ မိူဝ်ႈၽွင်းၼၼ်ႉ ၵူၼ်းမိူင်းပိူၼ်ႈ ၸင်းၶဝ်ၼႃႇလႄႈ ဢမ်ႇမီးမိူင်းလႂ် ၶႂ်ႈႁပ်ႉႁွင်းၸိူဝ်းၶဝ်ဝႆႉ၊ ၸၢဝ်းၶိူဝ်းၵျူး ၶဝ်လႆႈၶၢမ်ႇတၢမ်ႇၽေးၵူႈပိူင်ပိူင် လႆႈထုၵ်ႇတပ်ႉသိုၵ်းရူမ်း (ယေႃးမ) ၶဝ်ႈတိုၵ်းႁၢဝ်ႈႁႅင်းမႃး ထိုင်တီႈပေႃးလႆႈၽၢတ်ႇၽႄၵၼ်ၵႂႃႇ ၵေႃႉတီႈၵေႃႉတၢင်း ၵူၺ်းၵိုတ်းဝႆႉၸုမ်းသိုၵ်းၵျူးၸုမ်းၼိုင်ႈ ႁႅင်းၵူၼ်းဢၼ်မီးမွၵ်ႈႁဵင်ပၢႆ လႆႈတႄႇလိုပ်ႈ တိုၵ်းသိမ်းဢဝ်လႆႈ လွႆလူင် Masada ၶိုၼ်း ပဵၼ်တီႈလိုၼ်းသုတ်းသေ ဢဝ်ႁဵတ်းပဵၼ်တီႈတင်ႈတပ်ႉသိုၵ်းၶဝ်မႃး လွႆလူင် Masada ၼႆႉသုင် မီးပိုၼ်ႉတီႈ 23 ဢေႇၵႃႉ ႁိမ်းႁွမ်းလၢၼ်းၽႃသမ်ႉ မီးၼမ်ႉသၽႃႇဝ ဢွၵ်ႇမႃးတႃႇသေႇလႄႈ တေလႆႈဝႃႈ ၼႃႈလိၼ်တႃႇတိုၵ်းသိုၵ်းၼၼ်ႉ ပဵၼ်ၽၢႆႇပေႉပုၼ်ႈ ၽူႈၶဵၼ်ဝႆႉတႃႇသေၼႆယူႇ၊ ၵျူးၶဝ်ႁဵတ်းႁိုဝ် ၶတ်းၸႂ်တေႃႇသူႈမႃး ပဵၼ်ဢၼ်လီယိူင်ႈ ဢဝ်ၵုင်ႇမုၼ်ၸွမ်းတေႉတေႉ။ ၵူၼ်းၶိူဝ်းၵျူးၶဝ်ၼႆႉ ယွၼ်ႉမိူင်းဢႃႇရပ်ႉ လႄႈ မိူင်းပႃႇလႅတ်ႉသ်တၢႆး ၶိုင်ႁႃႁဵတ်းပၢင်တိုၵ်းၸူး ယူႇၵူႈၶၢဝ်းယၢမ်းလႄႈ ၶဝ်ၸင်ႇတိုၵ်းသူၼ်းၵူၼ်းမိူင်းၶဝ် ၶဝ်ႈႁၢပ်ႇထၢမ်းၵၢၼ်သိုၵ်းမႃးၼၼ်ႉၶႃႈယဝ်ႉ၊ မိူဝ်ႈၽွင်းၵျူးၶဝ် ပိုၼ်ၽၢဝ်ႇဢဝ်ၵွၼ်းၶေႃၼၼ်ႉ လႆႈထုၵ်ႇမိူင်းႁိမ်းႁွမ်း 9 မိူင်း ႁူမ်ႈၵၼ်သေ ၶဝ်ႈတိုၵ်း ဢမ်ႇၼၼ် ပၢင်တိုၵ်း 6 ဝၼ်းၼႆၵေႃႈႁွင်ႉ ၵူၺ်းဢမ်ႇဢဝ်ဢွင်ႇပေႉလႆႈၸၢဝ်းၶိူဝ်းၵျူးၶဝ်လႄႈ  ထိုင်မႃး 14/5/1948  ၼၼ်ႉ ၸၢဝ်းၶိူဝ်းၵျူး ဢမ်ႇၼၼ် ဢၼ်ႁွင်ႉဢိတ်ႉသရေးယၢမ်းလဵဝ် လႆႈပူၼ်ႉၸၢတ်ႈၶႃႈ ပူၼ်ႉၸၢတ်ႈဢၼ်ၽၢၼ်ဝၢၼ်ႈၽၢၼ်မိူင်းသေ တင်ႈပဵၼ်မိူင်း ဢိတ်ႉသရေး မႃးႁၢၼ်ႉတေႃႇဝၼ်းမိူဝ်ႈၼႆႉ။ ယၢမ်းလဵဝ်ၵူၼ်းမိူင်းဢိတ်ႉသရေး မီးလွင်ႈထၢင်ႇႁၢင်ႈၵူႈပိူင် ၶိူင်ႈၵွင်ႈၵၢင်ႇၼႆၵေႃႈ ဢမ်ႇယွမ်းသေမိူင်းလႂ် ၼၼ်ႉၶႃႈယဝ်ႉ၊ ဝၢႆးလင်ပူၵ်းတင်းၸိုင်ႈမိူင်းလႆႈယဝ်ႉၼၼ်ႉ ႁူဝ်ၼပ်ႉၵူၼ်းၶိူဝ်း ဢိတ်ႉသရေးၼႆႉ တိူဝ်းၼမ်မႃး 10 ပုၼ်ႈ လူးၵွၼ်ႇ။

တႆးႁဝ်းၶႃႈလူး ၸိူဝ်းၽၢတ်ႇၽႄၵၼ်ၵႂႃႇၵေႃႉတီႈၵေႃႉတၢင်း မီးဝႆႉၸွတ်ႇတူဝ်ႈ လုမ်ႈၾႃႉ ယူႇယၢမ်းလဵဝ် ၸွင်ႇတေဢၢၼ်းႁဵတ်းမိူၼ်ၸၢဝ်းၶိူဝ်းၵျူး ၶဝ်ယူႇၼႄႇ၊ ပေႃးတေဢၢၼ်းႁဵတ်းႁႂ်ႈမိူၼ်ၵူၼ်းၶိူဝ်းၵျူးၶဝ်ၼႆ ၵူၼ်းတႆးႁဝ်းၶႃႈ ဢၼ်မီးၸွတ်ႇၵႂႃႇတီႈၼႂ်းလုမ်ႈၾႃႉလူင်ႁဝ်းဝၼ်းမိူဝ်ႈၼႆႉ လီမႃးၶွၼ်ႈႁႅင်း ပဵၼ်ၼမ်ႉၼိုင်ႈၸႂ်လဵဝ်ၵၼ် လီမႃးၶွၼ်ႉႁႅင်း ၵၢၼ်မိူင်း ၵၢၼ်သိုၵ်း ၵၢၼ်တူင်ႇဝူင်းၵူၼ်း ၸဵမ်ၸိူဝ်းၼႆႉ လီမႃးၶွၼ်ႈႁႅင်းၵၼ်တေႉတေႉ၊ လၢတ်ႈငၢႆႈႁဵတ်းယၢပ်ႇ ဢၼ်ဝႃႈၼၼ်ႉထုၵ်ႇမႅၼ်ႈၶႃႈယဝ်ႉ သင်ဢမ်ႇႁဵတ်းလူး ၸွင်ႇသမ်ႉတေပဵၼ်မႃးယူႇၼႄႇ?  သင်ဢမ်ႇႁတ်းတိုၵ်း တေလႆႈမိူင်းတႆးယူႇၶႃႈႁႃႉ? ၵႂၢမ်းၼိုင်ႈၶေႃႈၼႆႉ သင်ၵႆႉၵႆႉတူၵ်ႇလၢတ်ႈၼႆ တေၸၢင်ႈပဵၼ်လၵ်းမၢႆပိူင်တၢႆၵႂႃႇယူႇ ပိူင်လူင်မၼ်းတႄႉ ႁဝ်းၶႃႈၵူၼ်းတႆး လူဝ်ႇမေႃဢွမ်ႇလွမ်ႈၽွမ်ႉသဵင်ပဵင်းပၢၵ်ႇၵၼ် ပဵၼ်ၼမ်ႉၼိုင်ႈၸႂ်လဵဝ်ၼၼ်ႉၵူၺ်း ဢၼ်တေၸွႆႈႁႂ်ႈတႆးႁဝ်း မီးလွင်ႈထၢင်ႇႁၢင်ႈမႃး မီးမိူင်းႁင်းၶေႃၶေႃမႃးလႆႈ။

တႅမ်ႈ−ၸၢႆးထုၼ်းလႃႉ

ပိုၼ်းၶိူဝ်းၵျူး ဢိင်−  https://www.yingpook.com/blogs/reviews/masada-fortress ၵမ်ႈၽွင်ႈ၊ ၼႂ်းပပ်ႉၽူႈႁတ်းႁၢၼ် လႄႈ ၵူၼ်းၸိူဝ်းငၢၼ် ၵမ်ႈၽွင်ႈ

*** ပွင်ႈၵႂၢမ်းႁူဝ်ၼႆႉ ပဵၼ်ပၢႆးဝူၼ်ႉလႄႈတၢင်းႁၼ်ထိုင်သုၼ်ႇတူဝ် ၽူႈတႅမ်ႈလိၵ်ႈၵူၺ်း ဢမ်ႇၸႂ်ႈ​​ၶေႃႈၶၢၼ်ပၢၵ်ႇ တႆးလွတ်ႈလႅဝ်း။