ဝၢႆးသေ ၶေႃႈမုၼ်းလပ်ႉ ထုၵ်ႇပိုၼ်ၽႄႈ ယူႇၶရဵၼ်း ပိၼ်ႇလႅၵ်ႈလၢႆႈ ၽႅၼ်ၵၢၼ်တိုၵ်းၶိုၼ်းရၢတ်ႉသျႃး

မိူဝ်ႈဝၼ်းထီႉ 12 April 2023 (လိူၼ်ႁႃႈလွင်ႈ 7 ၶမ်ႈ ပီႊတႆး 2117 ၼီႈ) သိုဝ်ႇၶၢဝ်ႇ CNN လၢႆးငၢၼ်းဝႃႈ ၸွမ်ၸိုင်ႈ သေႇလႅၼ်ႇသၵီႇ ၽူႈၼမ်းယူႇၶရဵၼ်း လႄႈ လူင်ပွင်ႈၸိုင်ႈယူႇၶရဵၼ်း လၢတ်ႈဝႃႈ ၽၢႆႇၵႅတ်ႇၶႄလွင်ႈမၼ်ႈၼိမ်သဝ်းယူႇၶရဵၼ်း ၵႃႈတေလႆႈပိၼ်ႇလႅၵ်ႈလၢႆႈ ၽႅၼ်ၵၢၼ်တိုၵ်း တႃႇလိုပ်ႈလမ်းတိုၵ်းၶိုၼ်းရၢတ်ႉသျႃး လၢမ်းၶၢတ်ႈဝႃႈ လႅပ်ႈတေပဵၼ်ၵႂႃႇၼႂ်းၶၢဝ်းမႆႈၼႆႉသေ ၽႅၼ်ၵၢၼ်ၶေႃႈမုၼ်းလပ်ႉ ဢၼ်ႁၢင်ႈႁႅၼ်းဝႆႉၵမ်ႉၽွင်ႈသမ်ႉ မီးဝႆႉၼႂ်းမိုဝ်းတပ်ႉသိုၵ်းမိူင်းဢမေႇရိၵၢၼ်ႇသေ ထုၵ်ႇပိုၼ်ၽႄႈဢွၵ်ႇၼိူဝ်ၵႂႃႇ Online ပႃးၵႂႃႇၸွမ်းဝႃႈၼႆ။

Mykhailo Podolyak ၵေႃႉဢၼ်ပဵၼ်တီႈၵိူဝ်းၵုမ် ၸွမ်ၸိုင်ႈ သေႇလႅၼ်ႇသၵီႇ လၢတ်ႈဝႃႈ ၽႅၼ်ၵၢၼ်တပ်ႉသိုၵ်းယူႇၶရဵၼ်းၼၼ်ႉ တိုၼ်းတေဢမ်ႇလႅၵ်ႈလၢႆႈ ၵူၺ်းၵႃႈ တေၶိုၼ်းမူၼ်ႉမႄး တမ်းဝၢင်းၽႅၼ်ၵၢၼ် ႁႂ်ႈၶိုတ်းတၼ်း ငၢမ်ႇၸွမ်း ၶိင်ႇလႂ်ၶၢဝ်းၼၼ်ႉၵႂႃႇ ဝႃႈၼႆ။

ၵဵဝ်ႇလူၺ်ႈလွင်ႈၼႆႉၼၼ်ႉ သိုဝ်ႇၶၢဝ်ႇ New York Times မိူင်းဢမေႇရိၵၢၼ်ႇ လႆႈပိုတ်ႇၼႄဢွၼ်တၢင်းၵႂႃႇသေ ၵူၺ်းၵႃႈ ဢမ်ႇလႆႈလၢတ်ႈပႃးဝႃႈ လႆႈႁပ်ႉႁူႉၶၢဝ်ႇၶေႃႈမုၼ်းလပ်ႉ မႃးတီႈႁွင်ႈၵၢၼ်လႂ် ပူၵ်ႉၵူဝ်ႇၵေႃႉလႂ်ၼႆယူႇ ၸိူင်ႉႁိုဝ်ၵေႃႈလီ ၼႂ်းၼၼ်ႉ ၽိုၼ်လိၵ်ႈဢၼ်ဢွၵ်ႇပွၵ်ႈလိုၼ်းသုတ်းတႄႉ ပဵၼ်ဝၼ်းထီႉ 1 March 2023 ၸႅင်ႈလႅင်းလီ၊ ၼႂ်းၽိုၼ်လိၵ်ႈၶေႃႈမုၼ်းလပ်ႉ ၼၼ်ႉၼႄပႃးဝႃႈ ဢမေႇရိၵၢၼ်ႇ လႄႈ လုၵ်ႈၸုမ်းဢူၺ်းလီ NATO လႆႈသူင်ႇၶိုင်ႈၵွင်ႈၵၢင်ႇ ၸွႆႈပၼ်ၽၢႆႇယူႇၶရဵၼ်း ပိူဝ်ႈတႃႇတိုၵ်းလိုပ်ႈလမ်းၶိုၼ်း ရၢတ်ႉသျႃး မီးပႃးႁၢင်ႈၽႅၼ်ႇလိၼ် ဢၼ်ရၢတ်ႉသျႃးမႃးပၵ်းတပ်ႉဝႆႉၸွမ်း ဝႃႈၼႆ။

တႆးလွတ်ႈလႅဝ်း