ဝၢႆးသေ ၾိၼ်ႇလႅၼ်ႇၶဝ်ႈပဵၼ်လုၵ်ႈၸုမ်း NATO ႁိပ်ႈၼႅတ်ႈႁႃၶိူင်ႈယိပ်းၵွင်ႈၵၢင်ႇ သႅၼ်းၶိုတ်းၵၢပ်ႈ

ႁဝ်းမႃးတူၺ်းၶိုၼ်း မိူင်းၾိၼ်ႇလႅၼ်ႇၼႆႉ ပႅၵ်ႉသမ်ႉဝႃႈ ဢမ်ႇမီးပၢင်တိုၵ်းသိုၵ်းသိူဝ် ၼႂ်းမိူင်းၶဝ်မႃးႁိုင်ၼၢၼ်း ဝႃႈၼၼ်သေတႃႉ ၵူၺ်းၵႃႈ မိူင်းၾိၼ်ႇလႅၼ်ႇ မီးၼင်လိၼ် တိတ်းၸပ်းရၢတ်ႉသျႃးဝႆႉသေ မိူဝ်ႈၽွင်းပၢင်တိုၵ်းသိုၵ်းလုမ်ႈၾႃႉ ပွၵ်ႈၵမ်း 2 ၼၼ်ႉၵေႃႈ ရၢတ်ႉသျႃးၶိုင်ၶဝ်ႈတိုၵ်းလၢႆပွၵ်ႈလၢႆၵမ်းယူႇ။ ထိုင်မႃးယၢမ်းၼႆႉသမ်ႉ တႃႇႁႄႉၵင်ႈမိူင်းၸဝ်ႈၵဝ်ႇလႆႈၼၼ်ႉ မိူင်းၾိၼ်ႇလႅၼ်ႇ လႆႈၶတ်းၸႂ် သၢင်ႈတပ်ႉသိုၵ်းႁႂ်ႈၵႅၼ်ႇၶႅင်မီးႁႅင်းမႃး ဢမ်ႇဝႃႈတေပဵၼ်တပ်ႉၼမ်ႉ တပ်ႉၵၢင်ႁၢဝ် တပ်ႉလိၼ်  လႆႈမီးပၢင်ၽိုၵ်းၽွၼ်ႉၵၢၼ်သိုၵ်း ပိူဝ်ႈတႃႇႁပ်ႉတိုၵ်း သိုၵ်းရၢတ်ႉသျႃး၊ မိူဝ်ႈၽွင်းဢမ်ႇပႆႇၶဝ်ႈပဵၼ်လုၵ်ႈၸုမ်း NATO ၼၼ်ႉၵေႃႈ ယၢမ်ႈၸတ်းႁဵတ်းမႃး မိူၼ်ၵၼ်ဝႃႈၼႆ။

ႁဝ်းမႃးတူၺ်း တပ်ႉလိၼ် မိူင်းၾိၼ်ႇလႅၼ်ႇၼႆႉ လႆႈၽိုၵ်းၽွၼ်ႉၵၢၼ်သိုၵ်း ပၼ်ၵူၼ်းသႅၼ်းႁုၼ်ႈမႂ်ႇ ၼိုင်ႈပီႊလႂ်ၼိုင်ႈၸုပ်ႈ၊ ၼိုင်ႈၸုပ်ႈလႂ် တေမီး 21,000 ၵေႃႉ  တႃႇ 10,000 ၵေႃႉသမ်ႉ ၽၢႆႇလူင်ပွင်ၸိုင်ႈၶဝ် လႆႈႁွင်ႉၽိုၵ်းပၼ်ၽၢႆႇပၢႆးဝူၼ်ႉၼႆယူႇ ၸိူဝ်းလႆႈၽိုၵ်းၵၢၼ်သိုၵ်း ယဝ်ႉတူဝ်ႈၵႂႃႇၼၼ်ႉ တေပဵၼ်ႁႅင်းထႅမ် ၽွင်းယၢမ်းပဵၼ်ပၢင်တိုၵ်းသိုၵ်းသိူဝ်မႃး ဝႃႈၼႆ။

ၾိၼ်ႇလႅၼ်ႇ မီးၵႃးၵၢပ်ႇလဵၵ်း 650 လမ်း တႃႇ 200 လမ်းသမ်ႉ ပဵၼ်သႅၼ်း  Leopards 2A6 လႄႈ 2A4 ဢၼ်ႁဵတ်းဢွၵ်ႇမိူင်းၵျႃႇမၼီႇ၊ မီးၵွင်ႈလူင် 1,500  ၊ မီးပႃးၶိူင်ႈႁႄႉ ၵွင်ႈလူင် ႁူမ်ႈပႃးမၢၵ်ႇမိတ်ႉသႆး ELTA  ဢၼ်ႁဵတ်းဢွၵ်ႇမိူင်းဢိတ်ႉသရေးပႃးၸွမ်း၊ ELTA  သႅၼ်းၼႆႉ တေႁပ်ႉႁူႉႁၼ်လႆႈပႃးဝႃႈ မၢၵ်ႇမိတ်ႉသႆး မၢၵ်ႇၵွင်ႈလူင် လုၵ်ႉတီႈလႂ်သေယိုဝ်းၶဝ်ႈမႃးၼႆယူႇ၊ မၢၵ်ႇမိတ်ႉသႆးတႃႇယိုဝ်းႁိူဝ်းမိၼ်တိုၵ်း 650 လုၵ်ႈ လႄႈယင်းတိုၵ်ႉႁႃဝႆႉတႃႇသိုဝ်ႉၶိူင်ႈၵွင်ႈၵၢင်ႇ တီႈမိူင်းသဝိတ်ႇတဵၼ်ႇ ၼႂ်းႁူင်းၵၢၼ် Saab Dynamics လႄႈ Rafael Advanced Defense Systems ထႅင်ႈတင်းၼမ် ဝႃႈၼႆ။

လိူဝ်သေၼၼ်ႉ ယင်းမီးပႃးၶိူင်ႈႁႄႉၵင်ႈၽေးၵၢင်ႁၢဝ် သႅၼ်း NASAMS 2 သႅၼ်းၼႆႉ ပဵၼ်ၶွင်မိူင်းဢမေႇရိၵၢၼ်ႇ သႅၼ်းဢၼ် လုၵ်ႈၸုမ်း NATO ယွမ်းႁပ်ႉပႃး လွင်ႈမႅၼ်ႈတိူဝ်ႉတီႈယမ်လီၼႆယူႇ။ လိူဝ်သေၼၼ်ႉ ၾိၼ်ႇလႅၼ်ႇ ယင်းမီးပႃးၵွင်ႈလူင် ၵႃးၵၢပ်ႇလဵၵ်းတႃႇယိုဝ်းၼိူဝ်ၵၢင်ႁၢဝ်ပႃးၸွမ်း ၾိၼ်ႇလႅၼ်ႇ ယင်းလႆႈသိုဝ်ႉပႃးမၢၵ်ႇမိတ်ႉသႆးတႃႇႁႄႉၽေးတၢင်းၵၢင်ႁၢဝ် တီႈႁူင်းၵၢၼ် Israel Aerospace Industries ဢမ်ႇၼၼ် Rafael Advanced Systems ဝႃႈၼႆ။

ၾိၼ်ႇလႅၼ်ႇ ယင်းမီးပႃးတရူၼ်း Orbiter မီးမွၵ်ႈၵႃႈႁိုဝ်ၼႆၼၼ်ႉ ဢမ်ႇပိုတ်ႇၽုၺ်ႇၼႄလႆႈဝႃႈၼႆ၊ ၵူၺ်းတိုၵ်ႉတေသိုပ်ႇသိုဝ်ႉ တရူၼ်းထႅင်ႈ 1,000 – 2,000 လမ်း ႁူမ်ႈပႃးတရူၼ်း Parrot Anafi USA ထႅင်ႈလၢႆပၢၵ်ႇလမ်း ဝႃႈၼႆ။

တပ်ႉၵၢင်ႁၢဝ် မိူင်းၾိၼ်ႇလႅၼ်ႇသမ်ႉ မီးႁိူဝ်းမိၼ်တိုၵ်း McDonnell Douglas F/A-18 Hornet 61 လမ်း တႃႇမႃးတႅၼ်းတၢင်တီႈႁိူဝ်းမိၼ်ၵဝ်ႇၵဝ်ႇ သႅၼ်း Lockheed Martin F-35A Lightning II 64 လမ်း ႁိူဝ်းမိၼ်ၸုပ်ႈမႂ်ႇၼႆႉ တေမႃးထိုင်မိူင်းၾိၼ်ႇလႅၼ်ႇ ၼႂ်းပီႊ 2026 လႄႈမီးပႃးႁိူဝ်းမိၼ် တႃႇၽိုၵ်းမိၼ် ႁူမ်ႈပႃးရေႇတႃႇ (Rader) တႃႇႁပ်ႉႁူႉၵႆလႆႈ 500 ၵီႇလူဝ်ႇမီႇတိူဝ်ႇ ဝႃႈၼႆ။

တပ်ႉၼမ်ႉသမ်ႉ မီးႁိူဝ်း command – 4 လမ်း၊ ႁိူဝ်းတႃႇဝၢင်းမၢၵ်ႇတႅၵ်ႇၼႂ်းၼမ်ႉမီး 5 လမ်း၊ ႁိူဝ်းတႃႇယႃႉၵွႆပႅတ်ႈ မၢၵ်ႇဢၼ်ၽူႈၶဵၼ်ႁၢင်ႈၵၢင်ဝႆႉသမ်ႉမီး 3 လမ်း၊ ႁိူဝ်းတႃႇၵဵပ်းမၢၵ်ႇတႅၵ်ႇသမ်ႉ မီး 13 လမ်း၊ ႁိူဝ်းတႃႇတေႃႉသူင်ႇႁႅင်းၵူၼ်း ၶိုၼ်ႈၽင်ႇသမ်ႉမီး 1 လမ်း  လိူဝ်သေၼၼ်ႉ တပ်ႉၼမ်ႉယင်းႁႃသိုဝ်ႉပႃး ႁိူဝ်း corvette ထႅင်ႈ 3 လမ်း၊ ယၢမ်းလဵဝ်ႁိူဝ်းတၢင်း 3 လမ်းၼႆႉ တိုၵ်ႉၶူင်သၢင်ႈႁဵတ်းဢွၵ်ႇ ၼႂ်းမိူင်းၾိၼ်ႇလႅၼ်ႇ တေယဝ်ႉတူဝ်ႈ ၸႂ်ႉၵၢၼ်လႆႈၼႂ်းပီႊ 2029 ဝႃႈၼႆ။

တႆးလွတ်ႈလႅဝ်း