ဝၼ်းလုၵ်ႈဢွၼ်ႇ ႁူင်းႁဵၼ်း ၸိူဝ်ႉၸၢတ်ႈ ငဝ်ႈၸိုင်ႈ လွႆတႆးလႅင်း

မိူဝ်ႈၼႆႉ ဝၼ်းထီႉ 11 January 2025 ( လိူၼ်ၵမ်မႂ်ႇ 13 ၶမ်ႈ ပီႊတႆး 2119 ၼီႈ )  ႁူင်းႁဵၼ်းၸိူဝ်ႉၸၢတ်ႈ ငဝ်ႈၸိုင်ႈၶွင်ႇသီႇဢဝ်ၶိုၼ်းၸိုင်ႈတႆး လွႆတႆးလႅင်း လႆႈၸတ်းႁဵတ်းဝၼ်းလုၵ်ႈဢွၼ်ႇ လုမ်ႈၾႃႉ ဢွင်ႈတီႈ ၼႂ်းႁူင်းႁေႃးမွၵ်ႇၵွၼ် မီးၽူႈယႂ်ႇၵူၼ်းလူင် ပေႃႈမႄႈလုၵ်ႈႁဵၼ်း ဢိၵ်ႇတင်း လုၵ်ႈႁဵၼ်းၶိုၼ်ႈႁွတ်ႈတင်းၼမ် ယူႇယဝ်ႉ။

ၸဝ်ႈသိုၵ်းလူင် ဢွင်ႇမျႃႉလႆႈမွၵ်ႇလၢတ်ႈၶေႃႈၵႂၢမ်းပိုတ်ႇပၢင်ၵႂႃႇ လွင်ႈဝႃႈ ဝၼ်းလုၵ်ႈဢွၼ်ႇ လုမ်ႈၾႃႉ ၼၼ်ႉ ပဵၼ်ဝၼ်းသူင်သိူဝ်း ဝၼ်းဢၼ်လုၵ်ႈဢွၼ်ႇလႆႈလဵပ်ႈႁဵၼ်းႁူႉဝၼ်းၼိုင်ႈ၊သိုပ်ႇလၢတ်ႈထႅင်ႈ ပဵၼ်လုၵ်ႈဢွၼ်ႇၼိုင်ႈၵေႃႉ ၼၼ်ႉမီးပုၼ်ႈၽွၼ်း ႁဵၼ်းလိၵ်ႈႁဵၼ်းလႆၢး၊ မေႃႁဵၼ်းႁူႉၵၢၼ်ႁႃလဵင်ႉတွင်ႉ၊ လုၵ်ႈဢွၼ်ႇ ယူႇႁူင်းႁဵၼ်းၵေႃႈ ပုၼ်ႈၽွၼ်းလုၵ်ႈႁဵၼ်းႁဵတ်းႁႂ်ႈတဵမ်ထူၼ်ႈ၊ ယူႇတီႈႁိူၼ်းၵေႃႈႁဵတ်းပုၼ်ႈၽွၼ်း ႁႂ်ႈတဵမ်ထူၼ်ႈ ဝႃႈၼႆ။

သိုပ်ႇသေၼၼ်ႉ ၶူးၸၢႆးၾူႈ ၽူႈၵွၼ်းႁူင်းႁဵၼ်းတၢင်းလတ်း လႆႈမွၵ်ႇလၢတ်ႈၶေႃႈၵႂၢမ်းၵႂႃႇဝႃႈ ၵူႈမိူင်းမိူင်းၼၼ်ႉပိူၼ်ႈဝႆႉၵႃႈၶၼ် လုၵ်ႈဢွၼ်ႇ၊ လုၵ်ႈဢွၼ်ႇၼၼ်ႉ ပဵၼ်ႁႅင်းမိူင်းမိူဝ်းၼႃႈ၊ ပဵၼ်ၼေႃႇတႅၼ်းၶိူဝ်းမိူဝ်းၼႃႈ လႄႈ မိူဝ်းၼႃႈတေပဵၼ်ၸိူင်ႉႁိုဝ်ၼၼ်ႉ ယူႇၼႂ်းမိုဝ်းလုၵ်ႈဢွၼ်ႇဝၼ်းမိူဝ်ႈၼႆႉယဝ်ႉ ဝႃႈၼႆ။

ထိုင်မႃး ယၢမ်း 11:00 မူင်း ၶူးဢိၵ်ႇလုၵ်ႈႁဵၼ်း လႆႈတႄႇဢွၼ်ၵၼ် လဵၼ်ႈၵဵမ်း လဵၼ်ႈတၢင်းလဵၼ်ႈ ၸႅၵ်ႇၶဝ်ႈမုၼ်းတၢင်းၵိၼ် တီႈၼႂ်းပၢင်ႇႁူင်းႁဵၼ်းၵႂႃႇယူႇယဝ်ႉ။

တႆးလွတ်ႈလႅဝ်း