ဝၼ်းလဵဝ်သိုၵ်းမၢၼ်ႈပွႆႇမၢၵ်ႇသႂ်ႇ 4 ဝဵင်း ၼႂ်းၸိုင်ႈတႆးပွတ်းႁွင်ႇ

မိူဝ်ႈဝႃးဝၼ်းထီႉ 27 October 2024 ပဵၼ်ပႃးဝၼ်းဢၼ် ပၢင်ၽႅၼ်ၵၢၼ်တိုၵ်း 1027 ၶွပ်ႈတဵမ် 1 ပီႊလႄႈ ၸုမ်းသိုၵ်းမၢၼ်ႈဢဝ်ႁိူဝ်းမိၼ် ပွႆႇမၢၵ်ႇသႂ်ႇတီႈဝဵင်းသႅၼ်ဝီ၊ ဝဵင်းၼမ်ႉၶမ်း၊ ဝဵင်းၼွင်ၶဵဝ်၊ ဝဵင်လၢဝ်ႇၵၢႆးသေ မီးၵူၼ်းမိူင်းလႆႈမၢတ်ႇၸဵပ်းတၢႆၸွမ်း ယူႇယဝ်ႉ။

မိူဝ်ႈယၢမ်းၵၢင်ၶမ်ႈ 21:50 မူင်းၼၼ်ႉ ၸုမ်းသိုၵ်းမၢၼ်ႈဢဝ်ႁိူဝ်းမိၼ်တိုၵ်းပွႆႇမၢၵ်ႇသႂ်ႇ တီႈဝဵင်းသႅၼ်ဝီ လႄႈ မၢၵ်ႇၵႂႃႇတူၵ်းသႂ်ႇတီႈၵျွင်းၶရိတ်ႉ ၊ လုမ်းၽၢႆႇဢုပ်ႉပိူင်ႇ ၵူႈလွင်ႈလွင်ႈ၊ ႁိူၼ်းယေးၵူၼ်းမိူင်း ၸိူဝ်းၼႆႉလူႉၵွႆၵႂႃႇတင်းၼမ်၊ လွင်ႈမၢတ်ႇၸဵပ်း ၵူၼ်းမိူင်းတႄႉ ဢမ်ႇမီးဝႃႈၼႆ။

မိူဝ်ႈယၢမ်းၵၢင်ၶိုၼ်းၼၼ်ႉၵူၺ်ၼင်ႇၵဝ်ႇ ၸုမ်းသိုၵ်းမၢၼ်ႈ ဢဝ်ႁိူဝ်းမိၼ်ပွႆႇမၢၵ်ႇတီႈ ဝဵင်းၼွင်ၶဵဝ် 10 လုၵ်ႈ လႄႈ ၵမ်ႉၼမ်တူၵ်းသႂ်ႇၼႂ်းပွၵ်ႉသပေႇယေႇသေ မီးၵူၼ်းမိူင်း လႆႈလူႉတၢႆ 2 ၵေႃႉ၊ လွင်ႈလူႉသုမ်းႁိူၼ်းယေးၵေႃႈ မီးတင်းၼမ်မိူၼ်ၵၼ်။

ၼႂ်းဝၼ်းၶွပ်ႈၶူပ်ႇ 1027 တဵမ် 1 ပီႊၼႆႉ ၸုမ်းသိုၵ်းမၢၼ်ႈဢဝ်ႁိူဝ်းမိၼ်ပွႆႇမၢၵ်ႇသႂ်ႇ တီႈဝဵင်းၼမ်ႉၶမ်း၊ ဝဵင်းလၢဝ်ႇၵၢႆး၊ ဝဵင်းသႅၼ်ဝီ၊ ဝဵင်းၼွင်ၶဵဝ် လႄႈ မီးၵူၼ်းမိူင်း လူႉတၢႆၵႂႃႇ 2 ၵေႃႉ မၢတ်ႇၸဵပ်း 4 ၵေႃႉသေ ဝဵင်းၸိူဝ်းၼႆႉသမ်ႉ မိူဝ်ႈလဵဝ်ပဵၼ်ၸုမ်းသိုၵ်း TNLA, MNDAA ဢုပ်ႉပိူင်ႇၽွင်းငမ်းဝႆႉ ၼႆယဝ်ႉ။

တႆးလွတ်ႈလႅဝ်း