ၸွမ်းၼင်ႇၾိင်ႈထုင်းၸၢဝ်းပုတ်ႉ ႁိတ်ႈႁွႆးမီးဝႆႉၼၼ်ႉသေ ငဝ်ႈၸိုင်ႈလွႆတႆးလႅင်း ႁူမ်ႈၵၼ်ၶိုၼ်ႈၵျွၢင်းလွင်းမွၵ်ႇ ၼႂ်းဝၼ်းဢွၵ်ႇဝႃႇ ဝၼ်းလိူၼ် 11 မူၼ်း တီႈဝတ်ႉလႅင်းႁၢၼ်တႆး။

မိူဝ်ႈၼႆႉ ဝၼ်းထီႉ 9 October 2022 (ဝၼ်းလိူၼ်သိပ်းဢဵတ်းမူၼ်း ပီႊတႆး 2116 ၼီႈ) ပဵၼ်ဝၼ်းဢၼ်လမ်ႇလွင်ႈ ပုၼ်ႈတႃႇသႃႇသၼႃႇပုတ်ႉထႁဝ်းဝၼ်းၼိုင်ႈလႄႈ ယူႇတီႈႁူဝ်ပဝ်ႈလူင် ၸွမ်သိုၵ်းလူင် ယွတ်ႈသိုၵ်း၊ မေးၼၢင်း ၼၢင်းလိူၼ်ၶမ်း ဢိၵ်ႇတၢင်း လုၵ်ႈလၢင်းတင်းသဵင်ႈ ႁူမ်ႈပႃး လုၵ်ႈၼွင်ႉတပေး မုၵ်ႉၸုမ်း ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) ဢွၼ်ႁူဝ်ၼမ်းၼႃႈ ႁဵတ်းပဵၼ်ၸဝ်ႈတႃႇၼ ပွႆးၾိင်ႈထုင်းဢွၵ်ႇဝႃႇသေ မီးၽူႈယႂ်ႇၵူၼ်းလူင် ၼႂ်းမုၵ်ႉၸုမ်းၶွင်ႇသီႇဢဝ်ၶိုၼ်းၸိုင်ႈတႆး ဢိၵ်ႇပႃး ပေႃႈမႄႈၵူၼ်းမိူင်းလႄႈ ၵေႃႉသိုၵ်းၵေႃႉႁၢၼ် ၶဝ်ႈႁူမ်းလူႇတၢၼ်း ယွၼ်းၽွၼ်းမင်ႇၵလႃႇ၊ ႁပ်ႉၶၢမ်ႇသိလ်သီႇလ၊ ထွမ်ႇပရိတ်ႈ မဵတ်ႉတႃႇ၊ ထွမ်ႇထမ်းတြႃးၸဝ်ႈၵႂႃႇ ဝႃႈၼႆ။

ဝၼ်းလိူၼ်သိပ်းဢဵတ်းမူၼ်းၼႆႉ ပဵၼ်ဝၼ်း ဢၽိထမ်ႇမႃႇ ဢၽိထမ်ႇမႃႇၼႆၼၼ်ႉ ၵွပ်ႈပုတ်ႉထၶမ်းၸဝ်ႈႁေႃးပၼ်ၶုၼ်ၽီၼၢင်းၽီၶဝ် တီႈၶူင်းၽီၼႂ်းဝႃႇသႃသၢမ်လိူၼ် ယဝ်ႉသေ လူင်းမႃးမိူင်းၵူၼ်းမိူဝ်ႈဝၼ်းဢွၵ်ႇဝႃႇသႃႇ (ၼႂ်းပိုၼ်းထမ်းပိတၵ လၢတ်ႈဝႆႉ) ၸိူင်ႉၼႆ။ ၸင်ႇဝႃႈ ဝၼ်းဢွၵ်ႇဝႃႇသႃ (ဝၼ်းလိူၼ်သိပ်းဢဵတ်းမူၼ်း/ မၢင်ပီဝႃႇထၢပ်ႈလႄႈ ပဵၼ်ဝၼ်းလိူၼ်သိပ်းသွင်မူၼ်း) ၼၼ်ႉ ၸၢဝ်းပုတ်ႉထႁဝ်း တင်းလုမ်ႈၾႃႉ ၼပ်ႉထိုဝ်ဢဝ်ပဵၼ်ဝၼ်းဢၽိထမ်ႇမႃ ၼႆမႃး တေႃႇထိုင်ဝၼ်းမိူဝ်ႈၼႆႉ။

ၼွၵ်ႈလိူဝ်သေၼၼ်ႉ ယင်းမီးထႅင်ႈ တၢင်းၵႃႈ ၾိင်ႈငႄႈၾိင်ႈထုင်း၊ ပၢင်မူၼ်ႈသိူဝ်း၊ ပၢင်ပွႆႇႁူင်းၾႆးမိၼ် လူႇတၢၼ်းတဵၼ်းႁပ်ႉပၢင်းၽြႃးလူင်းမိူင်းၵႂႃႇ မီးၵႅမ်ႁူဝ်ပဝ်ႈ (2) ၶွင်ႇသီႇဢဝ်ၶိုၼ်းတပ်ႉသိုၵ်းၸိုင်ႈတႆး (RCSS) ၸွမ်ႁၢၼ် ၶိူဝ်းငိုၼ်း ဢိၵ်ႇတၢင်း ၽူႈယႂ်ႇၵူၼ်းလူင်ၵူႈႁွင်ႈၵၢၼ် လႄႈပေႃႈမႄႈၵူၼ်းမိူင်းတီႈၸမ်တီႈၵႆႉ၊ ႁူမ်ႈပႃးၵေႃႉသိုၵ်းၵေႃႉႁၢၼ် ၶဝ်ႈႁူမ်ၵႂႃႇ ၼႆယဝ်ႉ။

ပိူဝ်ႈတႃႇပဵၼ်တီႈမၢႆတွင်း ဝၼ်းဢွၵ်ႇဝႃႇသႃၼႆသေ တီႈႁူင်းႁဵၼ်းၸိူဝ်ႉၸၢတ်ႈ ငဝ်ႈၸိုင်ႈလွႆတႆးလႅင်းၵေႃႈ မီးပၢင်ၶႄႉၶဵင်ႇပိတ်ႉမၢၵ်ႇၼင်ႇၵၼ် လႆႈၸတ်းႁဵတ်းၵႂႃႇ ၼႂ်းဝၼ်းထီႉ 8-9 October 2022 ယူႇယဝ်ႉ။

ပၢင်ၶိုၼ်ႈၵျွၢင်းလွင်းမွၵ်ႇ ၼႂ်းဝၼ်းဢွၵ်ႇဝႃႇသႃ လိူၼ်သိပ်းဢဵတ်းမူၼ်းပီႊၼႆႉ ယွၼ်ႉငဝ်းလၢႆးတၢင်းပဵၼ် COVID-19 ဢမ်ႇပေႃးႁၢႆႉႁႅင်းယဝ်ႉလႄႈ တေလႆႈဝႃႈၵိုၼ်းၶွၼ်ႈလိူဝ် ပီႊ 2020-2021 ပူၼ်ႉမႃးယူႇယဝ်ႉ။

တႆးလွတ်ႈလႅဝ်း