သင်ဢမေႇရိၵၢၼ်ႇလႄႈၵူဝ်းရီးယႃးၸၢၼ်း ႁူမ်ႈၽိုၵ်းၽွၼ်ႉၵၢၼ်သိုၵ်းၵၼ်ထႅင်ႈ ၵူဝ်းရီးယႃးႁွင်ႇဢၢၼ်းတုမ်ႉတွပ်ႇၶိုၼ်းဢမ်ႇႁၢင်ႉ

ၵူဝ်းရီးယႃးႁွင်ႇ လႆႈဢွၵ်ႇမႃးလၢတ်ႈထိုင် လွင်ႈဢၼ် ဢမေႇရိၵၢၼ်ႇ လႄႈ ၵူဝ်းရီးယႃးၸၢၼ်း တေၽိုၵ်းၽွၼ်ႉၵၢၼ်သိုၵ်းႁူမ်ႈၵၼ်ၼၼ်ႉ တိုၼ်းတေတုမ်ႉတွပ်ႇၸူးၶိုၼ်း ၼင်ႇဢၼ်ၶၢတ်ႈလၢမ်းဢမ်ႇလႆႈ ၼႆယူႇ။

မိူဝ်ႈဝၼ်းထီႉ 17 February 2023 (လိူၼ်သၢမ်လွင်ႈ 13 ၶမ်ႈ ပီႊတႆး 2117 ၼီႈ) ၵူဝ်းရီးယႃးႁွင်ႇ လႆႈဢွၵ်ႇမႃးလွၵ်ႇငိူတ်ႈ လွင်ႈဢမေႇရိၵၢၼ်ႇ လႄႈ ၵူဝ်းရီးယႃးၸၢၼ်း ႁၢင်ႈႁႅၼ်းၽိုၵ်းၽွၼ်ႉၵၢၼ်သိုၵ်းႁူမ်ႈၵၼ် ၼႂ်းသုၼ်ႇၼိုင်ႈၶွင် ၵၢၼ်ၵႅတ်ႇၶႄၽေးပူၼ်ႉပႅၼ် လူၺ်ႈၼိဝ်းၶလီးယႃး လႄႈ မၢၵ်ႇမိတ်ႉသႆး ၶွင်ၵူဝ်းရီးယႃးႁွင်ႇၼၼ်ႉ ၽၢႆႇတင်းၵူဝ်းရီးယႃးႁွင်ႇ တေတုမ်ႉတွပ်ႇၸူးၶိုၼ်း ႁၢဝ်ႈႁႅင်းလိူဝ်ပိူၼ်ႈ ၼႆယဝ်ႉ။

ယင်းၵၢဝ်ႇၼႄးပႃးဝႃႈ ဢမေႇရိၵၢၼ်ႇၼၼ်ႉ သၢင်ႈႁႂ်ႈငဝ်းလၢႆးၼႂ်းပွတ်းတွၼ်ႈၼၼ်ႉ မီးလွင်ႈသုၵ်ႉယုင်ႈလႄႈ ၸႂ်ႉၶွင်ႇသီႇၽၢႆႇႁူမ်ႇလူမ်ႈ ၸၢတ်ႈၸိုင်ႈလုမ်ႈၾႃႉ UNSC ပဵၼ်ၶိူင်ႈမိုဝ်း တႃႇတဵၵ်းဢီးၵူဝ်းရီးယႃးႁွင်ႇ၊ သင်ၸိူဝ်ႉဝႃႈ ဢမေႇရိၵၢၼ်ႇ လႄႈ ၵူဝ်းရီးယႃးၸၢၼ်း ယင်းတေဢၢၼ်း သၢင်ႈလွင်ႈသုၵ်ႉယုင်ႈၼႂ်းပိုၼ်ႉတီႈၼႆႉမႃး ႁႂ်ႈလႆႈၼႆၸိုင် ၵူဝ်းရီးယႃးႁွင်ႇၵေႃႈ တေႁဵတ်းၸိူင်ႉၼၼ်မိူၼ်ၵၼ် ဝႃႈၼႆ။

ၵၢၼ်ၽိုၵ်းၽွၼ်ႉၵၢၼ်သိုၵ်း ၼႂ်းၵႄႈၵၢင် ၵူဝ်းရီးယႃးၸၢၼ်း လႄႈ ဢမေႇရိၵၢၼ်ႇ ၼၼ်ႉ ပဵၼ်ၵၢၼ်ၽိုၵ်းၽွၼ်ႉသိုၵ်းလူၺ်ႈ ၵၢၼ်ဝၢင်းၽႅၼ်ယၼ်ႇသိုၵ်းၼိူဝ်ၽိူၼ် ၼႂ်းဝၼ်းထီႉ 22 February 2023 တၢင်းၼႃႈၼႆႉ၊ တႃႇယုၵ်ႉၼမ်ႉၵတ်ႉ လွင်ႈမၢၵ်ႇၼိဝ်းၶလီးယႃး လႄႈ ၵၢၼ်ၽိုၵ်းၽွၼ်ႉ ဢၼ်ၵႆႉႁဵတ်းတႃႇသေႇ ၼၼ်ႉၵေႃႈ တေမီးမႃးၼႂ်းလိူၼ်ၼႃႈၼႆႉ ၼႆယဝ်ႉ။

တႆးလွတ်ႈလႅဝ်း