သင်ၵုမ်းထိင်းဢမ်ႇလႆႈၵေႃႈ ပွႆႇဝၢင်းသေလႄႈ

သၽႃႇဝၶွင် မၼုသၵူၼ်းႁဝ်းၼၼ်ႉ တိုၼ်းသွၵ်ႈႁႃလွင်ႈ “ၵၢၼ်ၵုမ်းထိင်း” ၼၼ်ႉတႃႇသေယဝ်ႉ။ သင်ႁဝ်းၵုမ်းထိင်းၸၢတ်ႈပၢၼ်ၸဝ်ႈၵဝ်ႇလႆႈၼႆ တိုၼ်းတေလႆႈဝႃႈ ပဵၼ်လွင်ႈလီ ဢၼ်ၼိုင်ႈယဝ်ႉ။ ၵူၺ်းၵႃႈ ပေႃးထွမ်ႇတူၺ်းတႄႉ မိူၼ်တေငၢႆႈယူႇ ၵူၺ်းၵႃႈ ၼႂ်းၸၢတ်ႈပၢၼ်ၵူၼ်းၼႆႉ ၼွၵ်ႈလိူဝ်သေ လွင်ႈႁဵတ်းသၢင်ႈ၊ လွင်ႈလၢတ်ႈၸႃ၊ လွင်ႈဝူၼ်ႉ ၸိူဝ်းၼႆႉယဝ်ႉ ၵမ်ႈၼမ်ႁဝ်းတေဢွၼ်ၵၼ်ၵုမ်းထိင်းတၢင်ႇမဵဝ်း ဢမ်ႇလႆႈ တီႈဢၼ်ၵိူတ်ႇပဵၼ်မႃးၼႂ်းၸၢတ်ႈပၢၼ် ဢမ်ႇဝႃႈတေပဵၼ် လွင်ႈၽၢင်ႁၢင်ႈၾိင်ႈၾႃႉရႃႇသီႇ လွင်ႈလၢတ်ႈၸႃ ဢူၺ်းၵေႃႉ ဢမ်ႇၼၼ် လွင်ႈဢၼႃႇၵၢတ်ႈ ဢၼ်တေပဵၼ်မႃးၼႂ်းဝၼ်းမိူဝ်းၼႃႈ ၸဵမ်ၸိူဝ်းၼႆႉယဝ်ႉ။

လွင်ႈဢၼ်ၶတ်းၸႂ်ၵုမ်းထိင်းၼၼ်ႉ ၼွၵ်ႈလိူဝ်မၼ်းတေဢမ်ႇမီးၽွၼ်းလီသင်ယဝ်ႉ မၼ်းယင်းတေ ႁဵတ်းႁႂ်ႈႁဝ်းဝူၼ်ႉၼမ် ၶမ်ၸႂ်လႆႈထႅင်ႈလႄႈ ထိုင်တီႈႁဵတ်းႁႂ်ႈၵူၼ်းလၢႆလၢႆၵေႃႉမီးလွင်ႈတုၵ်ႉၸႂ် သုၵ်ႉၸႂ် ၸွမ်းၼႂ်းၸၢတ်ႈပၢၼ်လူၺ်ႈဢမ်ႇၸမ်ပဵၼ်ၼၼ်ႉယဝ်ႉ။

ၵူၺ်းၵႃႈပေႃးမႃးထတ်းသၢင်တူၺ်းၶိုၼ်းလၢႆလၢႆၽၢႆႇၼႆ သင်ဝႃႈဢမ်ႇမီးလွင်ႈၵုမ်းထိင်းသင်ၼႆ ၸွင်ႇတေ ၸွႆႈႁဵတ်းႁႂ်ႈၸၢတ်ႈပၢၼ် မီးတၢင်း သိူဝ်းတႄႉယူႇႁိုဝ်ၼႆ ပဵၼ်ၶေႃႈထၢမ်ဝႆႉယူႇ။

မီးယူႇလၢႆလွၵ်းလၢႆး တီႈတေႁဵတ်းႁႂ်ႈၸၢတ်ႈပၢၼ်ႁဝ်းမီးတၢင်းသိူဝ်းလႆႈ၊ လွၵ်းလၢႆးဢၼ်ငၢႆႈလႄႈ လီတီႈ သုတ်းၼၼ်ႉၵေႃႈပဵၼ် “လွင်ႈပွႆႇဝၢင်း” ၼၼ်ႉယဝ်ႉ။ ယွၼ်ႉသင် ႁဝ်းတေလႆႈႁဵတ်းၸိူင်ႉၼၼ်လႄႈ တေလႆႈတႄႇၸိူဝ်ႉႁိုဝ်? ၵမ်းၼႆႉ ႁဝ်းမႃးတူၺ်းၸွမ်းၵၼ် လွင်ႈဢၼ်ထုၵ်ႇလီႁူႉ ၵဵဝ်ႇၵပ်းလွင်ႈတၢင်း ဢၼ်ဝႃႈ ယွၼ်ႉသင်ႁဝ်းတေလႆႈၵိုတ်းယိုတ်း လွင်ႈၶတ်းၸႂ်ၵုမ်းထိင်းၵူႈလွင်ႈၼႂ်းၸၢတ်ႈပၢၼ် လႄႈ လွင်ႈပွႆႇ ဝၢင်းပႅတ်ႈ ၼၼ်ႉယဝ်ႉ။

လွင်ႈၶတ်းၸႂ်ၵုမ်းထိင်းၼၼ်ႉ မၼ်းတေမီးၽွၼ်းတုမ်ႉယွၼ်ႈတေႃႇၸၢတ်ႈပၢၼ် ၸိူဝ်ႉႁိုဝ်?

1. လွင်ႈၸႂ်သုၵ်ႉယုင်ႈလႄႈ လွင်ႈမႆႈၸႂ်တေတိူဝ်းၼမ်မႃး။

ၵူၼ်းၵေႃႉဢၼ်ၶတ်းၸႂ်ၵုမ်းထိင်းၵူႈလွင်ႈလွင်ႈ ၼႂ်းၸၢတ်ႈပၢၼ်ၼၼ်ႉ တေၸၢင်ႈထူပ်းၺႃး လွင်ႈ လွင်ႈသုၵ်ႉယုင်ႈၶမ်ၸႂ်လႄႈ လွင်ႈမႆႈၸႂ်တေတိူဝ်းတွၼ်းၼမ်လိူဝ်သေ ၵူၼ်းၵေႃႉဢၼ်ဢမ်ႇၶတ်းၸႂ် ၵုမ်းထိင်းၵူႈလွင်ႈလွင်ႈၼႂ်းၸၢတ်ႈပၢၼ်လႄႈ ထိုင်တီႈတေၸၢင်ႈႁဵတ်းႁႂ်ႈ တၢင်းပဵၼ်လိူတ်ႈသုင်ၶိုၼ်ႈ ၼၼ်ႉယဝ်ႉ။

2. ဢမ်ႇမီးလွင်ႈပဵင်းပေႃးၸႂ် ၼႂ်းၸၢတ်ႈပၢၼ်။

လွင်ႈဢၼ်ႁဝ်းဝူၼ်ႉဝႃႈ တိုၼ်းတေလႆႈၵုမ်းထိင်းၼႆၼၼ်ႉ ပေႃးႁဝ်းသမ်ႉ ဢမ်ႇၵုမ်းထိင်းလႆႈၼႆၵေႃႈ မၼ်းတေၸၢင်ႈႁဵတ်းႁႂ်ႈလွင်ႈပဵင်းပေႃးၸႂ်ႁဝ်းၼၼ်ႉ လူတ်းယွမ်းလူင်း မိူၼ်ၼင်ႇ ၽူႈၶူၼ်ႉၶႂႃႉ ၶဝ်ထူပ်းႁၼ်ဝႃႈ ၵူၼ်းၵေႃႉဢၼ် မီးလွင်ႈ ၶႂ်ႈၵုမ်းထိင်းၵူႈလွင်ႈလွင်ႈၼႂ်းၸၢတ်ႈပၢၼ်သုင်ႁႅင်းၼၼ်ႉ တေမီးလွင်ႈဢမ်ႇၵျေႃႇၸႂ် တူဝ်ၶူမ်းၸႂ်ၶူမ်း လႄႈ သုၵ်ႉယုင်ႈၵပ်ႉဢူၵ်းၵပ်ႉၸႂ်ၼမ်လိူဝ်သေ ၵူၼ်းၸိူဝ်း ဢမ်ႇပေႃးၶႂ်ႈမီးလွင်ႈၵုမ်းထိင်းၵူႈလွင်ႈလွင်ႈၼႂ်းၸၢတ်ႈပၢၼ်ၼၼ်ႉယဝ်ႉ၊ ၵမ်းလိုၼ်းသုတ်းၵေႃႈ တေမီး ၽွၼ်းတုမ်ႉယွၼ်ႈ တေမီးလွင်ႈဢမ်ႇပဵင်းပေႃးၸႂ်ၼမ်မႃးၼၼ်ႉယဝ်ႉ။

3. ဢမ်ႇၸမ်ပဵၼ်သေ တၢင်ႇတၢင်းၽိတ်းတူဝ်ၵဝ်ႇ။

ၸိူင်ႉႁိုဝ်ၵေႃႈလီ ႁဝ်းတွပ်ႇထဵင်ဢမ်ႇလႆႈဝႃႈ ႁဝ်းဢမ်ႇမီးတၢင်း တႃႇတေၵုမ်းထိင်း ၵူႈၸိူဝ်ႉၵူႈလွင်ႈ ၼႂ်းၸၢတ်ႈပၢၼ်လႆႈၼၼ်ႉယဝ်ႉ။ လွင်ႈဢၼ်ႁဝ်းၵုမ်းထိင်းဢမ်ႇလႆႈၼၼ်ႉ သင်ႁဝ်းဢဝ်ၽင်ဢူၵ်း ၽင်ၸႂ်သေ ဝႆႉလမ်ႇလွင်ႈပူၼ်ႉတီႈၵေႃႈ မၼ်းတေႁဵတ်းႁႂ်ႈၵိူတ်ႇပဵၼ်မႃး လွင်ႈသေႉၼႄးတူဝ်ၵဝ်ႇ လႄႈ တၢင်ႇတၢင်းၽိတ်းတူဝ်ၵဝ်ႇ လူၺ်ႈဢမ်ႇမီး လွင်ႈၸမ်ပဵၼ်သင်သေ သမ်ႉၶိုၼ်းပဵၼ်တီႈတေႇႁဵတ်းႁႂ်ႈ တူဝ်ၶိင်း လႄႈ ပၢႆးၸႂ်ဢူၼ်ႈဢွၼ်ႇ ၸၼ်ႉႁၢႆႉႁႅင်း၊ ဝူၼ်ႉၵႂင်ၵႂႃႇဢမ်ႇမီးလွင်ႈသုတ်းသဵင်ႈသေ ဝူၼ်ႉဝႃႈ ၸၢတ်ႈပၢၼ်ဢမ်ႇမီးတၢင်းသိူဝ်းၼမ်ၶိုၼ်ႈမႃးႁႅင်းလႄႈ ဢၼ်ႁၢႆႉႁႅင်းသုတ်းသမ်ႉပဵၼ် လွင်ႈဢၼ်ၵႂႃႇ သေႉၼႄး တၢင်ႇတၢင်းၽိတ်းပိူၼ်ႈပႃး ၼၼ်ႉယဝ်ႉ။

ၵွပ်ႈၼၼ် ႁဵတ်းသင်လႄႈ ႁဝ်းတေလႆႈမီးလွင်ႈပွႆႇဝၢင်း ….

1. ၸၢတ်ႈပၢၼ်မီးတၢင်းသိူဝ်း ၵတ်းယဵၼ်

ဢၼ်ပဵၼ်ၽူႈတႅမ်ႈလိၵ်ႈ Michael Alan Singer တႅမ်ႈသပ်းလႅင်းသႂ်ႇၼႂ်းပပ်ႉ The Surrender Experiment မၼ်းၸၢႆးဝႆႉဝႃႈ ၸၢတ်ႈပၢၼ်မၼ်းလီၶိုၼ်ႈမႃးလႆႈၸိူင်ႉႁိုဝ် မိူဝ်ႈမၼ်းၸၢႆးၵိုတ်းယိုတ်း လွင်ႈၶတ်းၸႂ် ၵုမ်းထိင်းၵူႈလွင်ႈလွင်ႈ ၼႂ်းၸၢတ်ႈပၢၼ် လႄႈမီးလွင်ႈမေႃပွႆႇဝၢင်းၼၼ်ႉ ယင်းမီးသၢႆတၢင်းပၢႆးဝူၼ်ႉဝႃႈ လွင်ႈၶတ်းၸႂ်ၵုမ်းထိင်းၵူႈလွင်ႈလွင်ႈၼၼ်ႉ မၼ်းတေႁဵတ်းႁႂ်ႈၵိူတ်ႇပဵၼ်မႃး လွင်ႈဝူၼ်ႉၼမ်ၶမ်ၸႂ် ၼၼ်ႉယဝ်ႉ။ ၵွပ်ႈၼၼ် လွင်ႈပွႆႇဝၢင်းၼၼ်ႉ မၼ်းတေ ၸၢင်ႈဢဝ်လွင်ႈၵတ်းယဵၼ်လႄႈ တၢင်းသိူဝ်းၶဝ်ႈမႃး ၼႂ်းၸၢတ်ႈပၢၼ်ႁဝ်းၼၼ်ႉယဝ်ႉ။

2. ပေႃးဢမ်ႇမုင်ႈမွင်းၵေႃႈ တေဢမ်ႇမီးလွင်ႈၽိတ်းပိူင်ႈ

မိူဝ်ႈပွႆႇဝၢင်းလႆႈ လွင်ႈဢၼ်ႁဝ်းမုင်ႈမွင်းဝႆႉသေလွင်ႈလွင်ႈ ဢၼ်ဢမ်ႇယူႇၼႂ်းလွင်ႈ ၵုမ်းထိင်းႁဝ်းၼၼ်ႉ ပေႃးၼႆၸိုင် မၼ်းၸၢင်ႈတေႁဵတ်းႁႂ်ႈ တေႃးသမေႃးႁ လႄႈ လွင်ႈဝူၼ်ႉၼမ် ၼႂ်းၸၢတ်ႈပၢၼ် လူတ်း ယွမ်းလူင်း လူၺ်ႈဢမ်ႇတၢပ်ႈၵႂႃႇဝူၼ်ႉၸွမ်း ၵူႈလွင်ႈလွင်ႈၼႂ်းၸၢတ်ႈပၢၼ် ဢၼ်ၼႆႉယဝ်ႉဝႃႈ မိူဝ်ႈဢမ်ႇ မုင်ႈမွင်းၵေႃႈ တေဢမ်ႇမီးလွင်ႈၽိတ်းပိူင်ႈ။

3. ႁၵ်ႉတူဝ်ၵဝ်ႇလႄႈ ၵူၼ်းႁိမ်းႁွမ်းလႆႈလီ။

လွင်ႈဢၼ်ႁဝ်းၶတ်းၸႂ် ၵုမ်းထိင်းၵူႈလွင်ႈလွင်ႈၼႂ်းၸၢတ်ႈပၢၼ်ၼၼ်ႉ မၼ်းတေႁဵတ်းႁႂ်ႈႁဝ်း ဢမ်ႇပဵင်း ပေႃးၸႂ်တူဝ်ၵဝ်ႇ၊ သေႉၼႄးတူဝ်ၵဝ်ႇလႄႈ ၵူၼ်းႁိမ်းႁွမ်းၼမ်ၶိုၼ်ႈမႃး လူၺ်ႈတီႈၵႂႃႇယိပ်းၵမ်ၵူႈၵေႃႉလႄႈ တူဝ်ၵဝ်ႇဝႃႈ တေလႆႈႁဵတ်းၸွမ်းၼင်ႇ တူဝ်ၵဝ်ႇမုင်ႈမွင်း ၼၼ်ႉယဝ်ႉ။ ၵူၺ်းသင်ႁဝ်းပၼ်ႁႂ်ႈၵူၼ်းတၢင်ႇၵေႃႉ ပဵၼ်ၼင်ႇၶဝ်ပဵၼ်လႄႈ ပွႆႇဝၢင်းပၼ်ၶႂၢင်ႉ ႁႂ်ႈပၢႆးဝူၼ်ႉလႄႈ တူဝ်ၵဝ်ႇ မီးလွင်ႈလွတ်ႈလႅဝ်း လူၺ်ႈဢမ်ႇ မုင်ႈမွင်း ဝူၼ်ႉၼမ်ႁႅင်းပူၼ်ႉတီႈၵႃႈၼႆႉၵူၺ်းၵေႃႈ တေႁဵတ်းႁႂ်ႈႁဝ်းမေႃ ႁၵ်ႉတူဝ်ၵဝ်ႇလႄႈ ၵူၼ်းႁိမ်းႁွမ်း ၼင်ႇတဵမ်ၸႂ်ၼၼ်ႉယဝ်ႉ။

မႃးႁူႉၸၵ်း 3 လွၵ်းလၢႆး လွင်ႈပွႆႇဝၢင်း ၼႂ်းၸၢတ်ႈပၢၼ်။

1. ၸႅၵ်ႇယႅၵ်ႈမဵဝ်းဢၼ်တူဝ်ၵဝ်ႇၵုမ်းထိင်းလႆႈလႄႈ ဢမ်ႇၵုမ်းထိင်းလႆႈ

ႁဝ်းတေဢမ်ႇမီးဝၼ်းပွႆႇဝၢင်းလႆႈ သင်ၸိူဝ်ႉႁဝ်းဢမ်ႇပႆႇႁူႉဝႃႈ ႁဝ်းလူဝ်ႇသင်လႄႈ ဢမ်ႇလူဝ်ႇသင် ၼႂ်းၸၢတ်ႈပၢၼ်ႁဝ်း၊ ၵမ်းၼႆႉၶိုၼ်းႁဵတ်းၶေႃႈထၢမ်ၼႂ်းၸႂ်ဝႃႈ ႁဝ်းလူဝ်ႇသင်တႄႉတႄႉလႄႈ ၶိုၼ်းဝူၼ်ႉ တူၺ်းၶိုၼ်း ၼႂ်းၸၢတ်ႈပၢၼ် မဵဝ်းဢၼ်ယူႇၼႂ်းလွင်ႈၵုမ်းထိင်းႁဝ်းလႄႈ ဢမ်ႇယူႇၼႂ်းလွင်ႈၵုမ်းထိင်း ၶွင်ႁဝ်းသေ ၶိုၼ်းဝူၼ်ႉတူၺ်း သင်ၵိူတ်ႇပဵၼ်မႃးငဝ်းလၢႆးတၢင်ႇၸိူဝ်း ဢမ်ႇပဵၼ်မႃး ၼင်ႇႁဝ်းမုင်ႈမွင်းလႄႈ ၶတ်းၸႂ်ႁဵတ်းႁႂ်ႈၸႂ်ၵတ်းယဵၼ်သေ ႁူႉဝႃႈမၼ်းဢမ်ႇယူႇၼႂ်း လွင်ႈၵုမ်းထိင်းႁဝ်းပေႃးၼႆၸိုင် ၵမ်းလိုၼ်း သုတ်းၵေႃႈ ဢမ်ႇဝႃႈတေပဵၼ်သင်မႃး ႁဝ်းၵေႃႈတိုၵ်ႉတေႁပ်ႉမိုဝ်းလႆႈလႄႈ ၶၢမ်ႈပူၼ်ႉမၼ်း ၵႂႃႇလႆႈ ၼၼ်ႉယဝ်ႉ။

2. ဢမ်ႇပဵင်းပေႃးၸႂ်သင်ၵေႃႈ ႁႂ်ႈတႅမ်ႈလူင်းသႂ်ႇၼႂ်းပပ်ႉ။

လွင်ႈပိုၼ်ႉပွႆႇပႅတ်ႈ လူမ်းတေႃးသ၊ လွင်ႈသုၵ်ႉယုင်ႈၶမ်ၸႂ်  လူၺ်ႈလွင်ႈတႅမ်ႈလူင်း ၼႂ်းပပ်ႉၼၼ်ႉ ပဵၼ်လွၵ်းလၢႆးၼိုင်ႈ ဢၼ်ၸွႆႈႁဵတ်းႁႂ်ႈ လွင်ႈသုၵ်ႉယုင်ႈလူတ်းယွမ်း လူင်းလႆႈလီ၊ မိူဝ်ႈႁဝ်းတႅမ်ႈလွင်ႈတၢင်း တၢင်ႇၸိူဝ်းလူင်းၼႂ်းပပ်ႉၼၼ်ႉ မၼ်းတေၸွႆႈႁဵတ်းႁႂ်ႈႁဝ်းဝူၼ်ႉလႆႈလၢႆလၢႆမဵဝ်း ၼႂ်းၸၼ်ႉထၢၼ်ႈဢၼ် လိုၵ်ႉလမ်ႇ လႄႈ တွၼ်ႈတႃႇၵူၼ်းၸိူဝ်းဢမ်ႇပႆႇမိုတ်ႈလွင်ႈပွႆႇဝၢင်း ၼၼ်ႉယဝ်ႉ။ လွင်ႈတႅမ်ႈမၢႆၼၼ်ႉ ပဵၼ်သဵၼ်ႈတၢင်းလီ တွၼ်ႈတႃႇယႃႇႁႂ်ႈပၢႆးဝူၼ်ႉ လွင်ႈသုၵ်ႉယုင်ႈၶမ်ၸႂ်ၼၼ်ႉ သိုပ်ႇၽႄႈလၢမ်းထိုင်တီႈ ႁဵတ်းႁႂ်ႈမီးပၼ်ႁႃ ၼၼ်ႉယဝ်ႉ။

3. ႁႂ်ႈၵူၼ်းႁိမ်းႁွမ်းလႄႈ ၵူၼ်းဢၼ်ႁဝ်းႁၵ်ႉ ယူႇႁိမ်းၶၢင်ႈႁဝ်း။

ႁဝ်းဢမ်ႇလႆႈမီးယူႇၵေႃႉလဵဝ်ႁင်းၵူၺ်း တီႈဢေႇသုတ်း ႁဝ်းမီးတႆးၵေႃႉ၊ ပေႃႈမႄႈပီႈၼွင်ႉ ၸိူဝ်းၶဝ်ႈၸႂ်ပၢႆး ဝူၼ်ႉႁဝ်း ဢၼ်ၶႂ်ႈၵုမ်းထိင်းၵူႈလွင်ႈလွင်ႈ ၼႂ်းၸၢတ်ႈပၢၼ်ၼၼ်ႉၽွင်ႈယူႇ။ ၵွပ်ႈၼၼ် ႁဝ်းၸၢမ်းပိုတ်ႇၸႂ် ဢုပ်ႇလၢတ်ႈ ၵူၼ်းတီႈႁဝ်းဝႆႉၸႂ်ဝႃႈ ၶႂ်ႈမီးလွင်ႈလႅၵ်ႈလၢႆႈ ၶႂ်ႈမီးလွင်ႈပွႆႇဝၢင်းၼမ်ၶိုၼ်ႈလႄႈ ႁႂ်ႈႁဝ်းပေႃးပဵၼ် Support System ၸွမ်းၵၼ် ၼႂ်းသဵၼ်ႈတၢင်းလွင်ႈလႅၵ်ႈလၢႆႈၶွင်ႁဝ်း ၼၼ်ႉယဝ်ႉ။

လွင်ႈပွႆႇဝၢင်းၼၼ်ႉ ဢမ်ႇၸႂ်ႈဝႃႈ ၵူၼ်းၵူႈၵေႃႉတေႁဵတ်းငၢႆႈငၢႆႈ ဢၼ်လွင်ႈယႂ်ႇသမ်ႉ ၵူၼ်းဢၼ်လႆႈ ႁပ်ႉပုၼ်ႈၽွၼ်း ၵုမ်းထိင်းလၢႆလၢႆလွင်ႈၼႂ်းၸၢတ်ႈပၢၼ် ဢမ်ႇဝႃႈ ပဵၼ်လွင်ႈၵၢၼ်ငၢၼ်း လွင်ႈၼႃႈႁိူၼ်း လႄႈ လွင်ႈတၢင်းႁၵ်ႉၸိူဝ်းၼႆႉ ၵမ်းလိုၼ်းသုတ်းၵေႃႈ ႁဝ်းတေလႆႈယွမ်းႁပ်ႉလွင်ႈတႄႉမၼ်းဝႃႈ ႁဝ်းဢမ်ႇ ၸၢင်ႈၵုမ်းထိင်းၵူႈလွင်ႈၼႂ်းၸၢတ်ႈပၢၼ်လႆႈလႄႈ ယႃႇပေလိုမ်းဝႃႈ လွင်ႈဢမ်ႇမၼ်ႈၵိုမ်းၼၼ်ႉၵေႃႈ ပဵၼ်ပွတ်းဢွၼ်ႇတွၼ်ႈၼိုင်ႈၼႂ်းၸၢတ်ႈပၢၼ်ႁဝ်း မိူၼ်ၵၼ်။

ပိၼ်ႇတႅမ်ႈ − ၸၢႆးဢႅၼ်

တႆးလွတ်ႈလႅဝ်း

ဢၢင်ႈဢိင် − https://missiontothemoon.co/inspiration-lettinggo/