သိုၵ်းထႆးတီႉၺွပ်းလႆႈယႃႈမဝ်းၵမ်တင်းၼမ်

မိူဝ်ႈဝၼ်းထီႉ 1 February 2023 (လိူၼ်သၢမ်မႂ်ႇ 12 ၶမ်ႈ ပီႊတႆး 2117 ၼီႈ) ၼၼ်ႉ သိုၵ်းထႆး ၸုမ်းၽႃမိူင်း လႆႈပိုတ်းယိုဝ်းၵၼ်တင်းၵူၼ်းၵႃႉယႃႈမဝ်းၵမ် ၼႂ်းထိူၼ်ႇတီႈ ၼိုင်ႈ ႁိမ်းဝၢၼ်ႈၼွင်ၶဵဝ် ဢိူင်ႇမိူင်းၼႃႉ ၸႄႈဝဵင်းၵဵင်းလၢဝ် ၸႄႈတွၼ်ႈၵဵင်းမႆႇသေ တီႉၺွပ်းလႆႈ ၵူၼ်းၵႃႉယႃႈမဝ်းၵမ် 2 ၵေႃႉ လႄႈ ယႃႈမ 5.7 လၢၼ်ႉမဵတ်ႉ ဢိၵ်ႇ ယႃႈလမ် 6.6 ၵီႇလူဝ်ႇၵရမ်ႇ ၼႆယဝ်ႉ။

မိူဝ်ႈၶမ်ႈၶိုၼ်းဝၼ်းထီႉ 1 February 2023 ၽွင်းသိုၵ်းထႆး ၸုမ်းၽႃမိူင်း လႆႈၸတ်းငႃးသိုၵ်း 2 ငႃးသေ ဢွၵ်ႇၵူတ်ႇထတ်းၸွမ်းထိူၼ်ႇ တီႈႁိမ်းဝၢၼ်ႈၼွင်ၶဵဝ်ၼၼ်ႉ လႆႈႁူပ်ႉၺႃးတင်းၵူၼ်းဢၼ်ထၢင်ႇထိူမ် 13 ၵေႃႉ ပႃးထူင်ပိူဝ်ႉၵူႈၵေႃႉသေ ၽွင်းၸဝ်ႈၼႃႈတီႈႁွင်ႉၵိုတ်းတႃႇၵူတ်ႇထတ်းၼၼ်ႉ ၽၢႆႇတၢင်းၵူၼ်းၵႃႉယႃႈမဝ်းၵမ် လႆႈဢဝ်ၵွင်ႈယိုဝ်းဢွၼ်တၢင်းလႄႈ လႆႈပိုတ်းယိုဝ်းၵၼ်ႁိုင်မွၵ်ႈ 10 မိၼိတ်ႉ ၼႆယဝ်ႉ။

ဝၢႆးသေသဵင်ႈၵွင်ႈယဵၼ်ၵႂႃႇယဝ်ႉၼၼ်ႉ ၸဝ်ႈၼႃႈတီႈတီႉၺွပ်းလႆႈ ၵူၼ်းၵႃႉယႃႈမဝ်းၵမ် 2 ၵေႃႉ၊ ပိူဝ်ႉ 19 ပိူဝ်ႉ ၼိုင်ႈပိူဝ်ႉလႂ် သႂ်ႇယႃႈမ မိၵ်ႈ 999 ဝႆႉ 300,000 မဵတ်ႉ ႁူမ်ႈတင်းသဵင်ႈ 5,700,000 မဵတ်ႉ လႄႈ ယႃႈလမ် 6.6 ၵီႇလူဝ်ႇၵရမ်ႇ ဢိၵ်ႇပႃး ၵႃးၼိုင်ႈလမ်း၊ လူတ်ႉၶိူင်ႈ 1 လမ်း၊ ၾူၼ်းမိုဝ်းထိုဝ် 3 ၶိူင်ႈ ၼႆယဝ်ႉ။

ၵူၼ်းၵႃႉယႃႈမဝ်းၵမ် လႄႈ ၶူဝ်းၶွင်ဢမ်ႇယိုတ်းသိမ်းလႆႈတင်းမူတ်းၼၼ်ႉ သိုၵ်းထႆး လႆႈဢဝ်သူင်ႇမွပ်ႈဢၢပ်ႈပၼ်တီႈႁူင်းပလိၵ်ႈ ဝၢၼ်ႈၼႃးဝၢႆ ၸႄႈဝဵင်းၵဵင်းလၢဝ် ၸႄႈတွၼ်ႈၵဵင်းမႆႇသေ တေဢဝ်တၢင်းၽိတ်းၵႂႃႇ ၸွမ်းၼင်ႇမၢႆမီႈၸိုင်ႈမိူင်းမီးၼၼ်ႉ ၼႆယဝ်ႉ။

တႆးလွတ်ႈလႅဝ်း