သိုၵ်းထႆး−ၵူၼ်းၵႃႉယႃႈ ပိုတ်းယိုဝ်းၵၼ်တီႈလႅၼ်လိၼ် တီႉၺွပ်းလႆႈယႃႈတင်းၼမ်

မိူဝ်ႈဝႃးဝၼ်းထီႉ 7 November 2024 (လိူၼ်သိပ်းသွင်မႂ်ႇ 7 ၶမ်ႈ ပီႊတႆး 2118 ၼီႈ) သိုၵ်း ထႆးဢၼ်ဢွၵ်ႇလဵပ်ႈယၢမ်းၼၼ်ႉ လႆႈထူပ်းႁၼ်ၵူၼ်းဢၼ်လီထၢင်ႇထိူမ် တီႈၼႂ်းပိုၼ်ႉတီႈ ဝၢၼ်ႈႁူၺ်ႈၼမ်ႉရိမ်း ပွၵ်ႉ 7 ဢိူင်ႇဝဵင်းၽၢင်းၶမ်း ၸႄႈဝဵင်းမႄႈသၢႆ ၸႄႈတွၼ်ႈၵဵင်းႁၢႆး ႁိမ်းလႅၼ်လိၼ် တႆး−ထႆး ၼၼ်ႉသေ တေဢၢၼ်းၶဝ်ႈၵူတ်ႇ ထတ်း ၵူၺ်းၵူၼ်းၸိူဝ်းၼၼ်ႉ သမ်ႉပိုတ်းယိုဝ်းသႂ်ႇသိုၵ်းထႆးဢွၼ်တၢင်းလႄႈ သွင်ၽၢႆႇလႆႈမီးလွင်ႈပိုတ်းယိုဝ်းၵၼ် ႁိုင်မွၵ်ႈ 5 မိၼိတ်ႉၼႆႉ ဝႃႈၼႆ။

ဝၢႆးသေသဵင်ၵွင်ႈယဵၼ်ၵႂႃႇယဝ်ႉၼၼ်ႉ ၽၢႆႇတၢင်းၸဝ်ႈၼႃႈတီႈသိုၵ်းထႆး လႆႈၶဝ်ႈ ၵူတ်ႇထတ်း ၼႂ်းပိုၼ်ႉတီႈဢၼ်ပိုတ်းယိုဝ်းၵၼ်ၼၼ်ႉသေ ထူပ်းႁၼ်ထူင် ပိူဝ်ႉ 11 ထူင် ၼႂ်းမၼ်းတေမီးႁေႃႇဝႂ်ၼဵင်ႈ ဢၼ်သႂ်ႇယႃႈဢၢႆႉသ်ဝႆႉ 1 ထူင်လႂ် 15−19 ႁေႃႇ၊ 1 ႁေႃႇသမ်ႉမီးၼမ်ႉ ၼၵ်း 1 ၵီႇလူဝ်ႇၵရမ်ႇ ႁူမ်ႈၼမ်ႉၼၵ်းယႃႈဢၢႆႉသ် ဢၼ်တီႉၺွပ်းလႆႈတေမီးမွၵ်ႈ 172 ၵီႇလူဝ်ႇၵရမ်ႇ လႄႈ သိမ်းလႆႈပႃးၾူၼ်း 1 လုၵ်ႈ ၼႆယဝ်ႉ။

ဢွၼ်တၢင်းၼႆႉ ၽၢႆႇတၢင်းပလိၵ်ႈထႆးၵေႃႈ တီႉၺွပ်းလႆႈယႃႈဢၢႆႉသ် 447 ၵီႇလူဝ်ႇၵ ရမ်ႇ ဢၼ်သႂ်ႇဝႆႉၼႂ်းႁေႃႇဝႂ်ၼဵင်ႈမိူၼ်ၵၼ် လႄႈ တီႉၺွပ်းလႆႈၵူၼ်းဢၼ်ၵဵဝ်ႇၶွင်ႈ 4 ၵေႃႉ ဝႃႈၼႆ။

တႄႇဢဝ်ၼႂ်းလိူၼ် October 2024 တေႃႇထိုင် ဝၼ်းမိူဝ်ႈၼႆႉ ၸဝ်ႈၼႃႈတီႈသိုၵ်းထႆး တီႉၺွပ်းလႆႈယႃႈမဝ်းၵမ်ၸွမ်းလႅၼ်လိၼ်ၵႂႃႇယဝ်ႉ 51 ပွၵ်ႈ၊ တီႉၺွပ်းလႆႈ ၵူၼ်းၵဵဝ်ႇၶွင်ႈ 69 ၵေႃႉ၊ ယႃႈဢၢႆႉသ် 577 ၵီႇလူဝ်ႇၵရမ်ႇ၊ ယႃႈမ 12,952,062 မဵတ်ႉ၊ ယႃႈ ၾိၼ်ႇၽိူၵ်ႇ 140 ၵီႇလူဝ်ႇၵရမ်ႇသေ မီးလွင်ႈပိုတ်းယိုဝ်းၸွမ်းၵူၼ်းတေႃႉသူင်ႇယႃႈ 5 ပွၵ်ႈ သင်ၸိူဝ်ႉယႃႈမဝ်းၵမ်ၸိူဝ်းၼၼ်ႉ လွတ်ႈၶဝ်ႈၵႂႃႇထိုင်ၼႂ်းမိူင်းၼႆ တေတုမ်ႉ တိူဝ်ႉတေႃႇပၢႆးမၢၵ်ႈမီးၸိုင်ႈမိူင်းဢမ်ႇယွမ်း 2,659.8 လၢၼ်ႉဝၢတ်ႇ လႄႈ ပိုၼ်ႉတီႈ ဢၼ်ၵႆႉတီႉၺွပ်းလႆႈယႃႈမဝ်းၵမ်ၼၼ်ႉၵေႃႈ ပဵၼ်ၼႂ်းၸႄႈတွၼ်ႈၵဵင်းမႆႇ တင်း ၸႄႈတွၼ်ႈၵဵင်းႁၢႆး ဢၼ်မီးလႅၼ်လိၼ်တိတ်းၸပ်းၸွမ်းမိူင်းတႆးၼၼ်ႉ ၼႆယဝ်ႉ။

တႆးလွတ်ႈလႅဝ်း