သိုၵ်းထႆး တီႉၺွပ်းလႆႈၵူၼ်းၵႃႉယႃႈ လႄႈ ယႃႈမတင်းၼမ်

မိူဝ်ႈၼႂ်းဝၼ်းထီႉ 6 October 2024 (လိူၼ်သိပ်းဢဵတ်းမႂ်ႇ 4 ၶမ်ႈ ပီႊတႆး 2118 ၼီႈ) ၼၼ်ႉ ၽၢႆႇတၢင်းၽူႈမီးပုၼ်ႈၽွၼ်းထႆးၶဝ် ဢွၼ်ၵၼ်ဢွၵ်ႇသပ်းၸႅင်ႈၶၢဝ်ႇ ၵဵဝ်ႇလူၺ်ႈလွင်ႈတီႉၺွပ်းလႆႈယႃႈမတင်းမူတ်း 1,600,000 မဵတ်ႉ ႁူမ်ႈပႃးၵူၼ်းတေႃႉ သူင်ႇ 2 ၵေႃႉ ၼႆယဝ်ႉ။

လွင်ႈၼႆႉၵေႃႈ လႆႈမီးမႃးဝၢႆးသေ မိူဝ်ႈၼႂ်းဝၼ်းထီႉ 5 October 2024 ၼၼ်ႉ ၽၢႆႇတၢင်း ၸဝ်ႈၼႃႈတီႈသိုၵ်းထႆးၶဝ် တီႉၺွပ်းလႆႈယႃႈမ တီႈၼႂ်းပိုၼ်ႉတီႈဝၢၼ်ႈထႃႉၶဝ်ႈပိူၵ်ႇ ဢိူင်ႇထႃႉၶဝ်ႈပိူၵ်ႇ ၸႄႈဝဵင်းမႄႈၸၼ်း ၸႄႈတွၼ်ႈၵဵင်းႁၢႆး 600,000 မဵတ်ႉ လႄႈ ၵူၼ်းတေႃႉသူင်ႇ 2 ၵေႃႉ ဝႃႈၼႆ။

ဝၢႆးသေၸဝ်ႈၼႃႈတီႈထႆးၶဝ် လႆႈၸႅတ်ႈထၢမ်သေ ၶိုၼ်းႁူႉဝႃႈ ၶႃသွင်ၵေႃႉ လႆႈတေႃႉ ယႃႈၵႂႃႇသိူင်ႇဝႆႉ ၼႂ်းပိုၼ်ႉတီႈ ၸႄႈဝဵင်းဝဵင်းသျဵင်းရုင်ႉ (ၵဵင်းႁုင်ႉ) ထႅင်ႈ 1,000,000 မဵတ်ႉ တႃႇပႂ်ႉႁႂ်ႈ ၵူၼ်းၵႂႃႇႁပ်ႉသေ သိုပ်ႇသူင်ႇၵႂႃႇတီႈၼႂ်းၸႄႈဝဵင်းၽူးသျၢင်း ၸႄႈတွၼ်ႈၽယဝ်း လႄႈ ၽၢႆႇတၢင်းၽူႈမီးပုၼ်ႈၽွၼ်းၶဝ် ၸင်ႇၶိုၼ်းၵႂႃႇၵူတ်ႇထတ်းတီႉၺွပ်းသေ ႁူမ်ႈယႃႈမ ဢၼ်တီႉၺွပ်းလႆႈတင်းမူတ်း 1,600,000 မဵတ်ႉ ၼႆယဝ်ႉ။

တႆးလွတ်ႈလႅဝ်း