သိုၵ်းထႆး ဢဝ်ႁူမ်ႇလူမ်ႈ ၸွမ်းလႅၼ်လိၼ် ထႆး-ယၢင်း ၼႅၼ်ႈၼႃ

မိူဝ်ႈၼႆႉ ဝၼ်းထီႉ 5 July 2022 သိုဝ်ႇၶၢဝ်ႇထႆး ဢွၵ်ႇၼႄဝႆႉဝႃႈ ဝၢႆးသေ ႁိူဝ်းမိၼ်တိုၵ်း သိုၵ်းမၢၼ်ႈ ပူၼ်ႉပႅၼ်မိၼ်ၶဝ်ႈၵႂႃႇ ၼႂ်းၸႄႈဝဵင်းၽူပ်ႉၽြႃႉ ၸႄႈတွၼ်ႈတၢၵ်ႇ  ဢၼ်ပဵၼ် ၼႃႈၾႃႉ ၾင်ႇတၢင်းမိူင်းထႆး သေ ႁဵတ်းႁႂ်ႈၵူၼ်းမိူင်း တူၵ်းၸႂ်ၵူဝ်ႁေယဝ်ႉ ၽၢႆႇသိုၵ်းထႆးၵေႃႈ ၽိူမ်ႉထႅမ်ႁႅင်းသိုၵ်း ဢဝ်ႁူမ်ႇလူမ်ႈ ၸွမ်းလႅၼ်လိၼ်ဝႆႉ ၼႅၼ်ႈၼႃ ဝႃႈၼႆ။

ၵဵဝ်ႇၵပ်းလွင်ႈ ႁိူဝ်းမိၼ်သိုၵ်းမၢၼ်ႈ ပူၼ်ႉပႅၼ်မိၼ်ၶဝ်ႈၵႂႃႇၼႃႈၾႃႉ ၾင်ႇတၢင်းမိူင်းထႆးၼႆႉ မိူဝ်ႈဝၼ်းထီႉ 4 July 2022 ၽွင်းလူင်ၽၢႆႇၼွၵ်ႈမိူင်း မိူင်းထႆး လႄႈ ဢူးဝုၼ်ႇၼမွင်ႇလုၼ်ႇ ၽွင်းလူင်ၽၢႆႇၼွၵ်ႈမိူင်း ၶွင်ႇသီႇသိုၵ်းမၢၼ်ႈ လႆႈဢုပ်ႇဢူဝ်းၵၼ်သေ ဢူးဝုၼ်ႇၼမွင်ႇလုၼ်ႇ လၢတ်ႈဝႃႈ ၽၢႆႇႁဝ်းၶႃႈ တေယိုၼ်ႈလိၵ်ႈ ပဵၼ်တၢင်းၵၢၼ်လႄႈ ယွမ်းၼွမ်းၽၢႆႇမိူင်းထႆးၶိုၼ်းယူႇ ဝႃႈၼႆ။

ၶွမ်ႇမတီႇလႅၼ်လိၼ် ၸႄႈဝဵင်း သွင်ၽၢႆႇ လႆႈၸႂ်ၵၼ်ဝႆႉဝႃႈ ပေႃးပဵၼ်ပၢင်တိုၵ်းၵၼ် ၽၢႆႇတၢင်းမိူင်းႁူမ်ႈတုမ် ၸွမ်းလႅၼ်လိၼ်လႄႈ သင်ဝႃႈမၢၵ်ႇ ပူၼ်ႉပႅၼ်တူၵ်းၶဝ်ႈၵႂႃႇ ၽၢႆႇတၢင်းမိူင်းထႆးပေႃးၼႆၸိုင် ၽၢႆႇမိူင်းထႆး တေဢဝ်မၢၵ်ႇၵႂၼ်း ပိုတ်းယိုဝ်း ပၼ်သၼ်ၺၢၼ်း (ဢၼ်ၶႅၵ်ႈ) သေ သင်ဝႃႈပၼ်သၼ်ၺၢၼ်းၼႄ (ဢၼ်ၶႅၵ်ႈ) ယဝ်ႉ တိုၵ်ႉသိုပ်ႇပူၼ်ႉပႅၼ်လႄႈ ႁဵတ်းႁႂ်ႈတုမ်ႉတိူဝ်ႉတေႃႇ ၵူၼ်းမိူင်းထႆးပေႃးၼႆၸိုင် ၽၢႆႇမိူင်းထႆး တေတုမ်ႉတွပ်ႇ ပိုတ်းယိုဝ်းၵႂႃႇၶိုၼ်း ဝႃႈၼႆ။

တင်ႈတႄႇ မိူဝ်ႈဝၼ်းထီႉ 26 June 2022 သိုၵ်းမၢၼ်ႈတင်း KNU/KNLA ပဵၼ်ပၢင်တိုၵ်းၵၼ် ၼႂ်းၸႄႈဝဵင်းမျႃႉဝတီႇ မိူင်းယၢင်း ႁိမ်းလႅၼ်လိၼ် ယၢင်း-ထႆး သေ ၼႂ်းပၢင်တိုၵ်းၼၼ်ႉ ၽၢႆႇသိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း MIG 29 ႁူမ်ႈပႃးႁိူဝ်းမိၼ်တိုၵ်းထႅင်ႈ လၢႆလၢႆလမ်း ၵႂႃႇပွႆႇမၢၵ်ႇတိုၵ်းယိုဝ်းၸွႆႈၽၢႆႇသိုၵ်းၶဝ်လႄႈ ပၢင်တိုၵ်းလႆႈသိုပ်ႇပဵၼ် ႁၢဝ်ႈႁႅင်းမႃး သေဢမ်ႇၵႃး လိူဝ်ၼၼ်ႉ  ႁိူဝ်းမိၼ်တိုၵ်း ၽၢႆႇသိုၵ်းမၢၼ်ႈ လမ်းၼိုင်ႈ ပူၼ်ႉပႅၼ်မိၼ်ၶဝ်ႈၵႂႃႇ ၼႂ်းၸႄႈဝဵင်းၽူပ်ႉၽြႃႉ ၾင်ႇတၢင်းမိူင်းထႆးလႄႈ ၵူၼ်းဝၢၼ်ႈၾင်ႇထႆးၶဝ် ဢွၼ်ၵၼ် တူၵ်းၸႂ်ၵူဝ်ႁေ လႅၼ်ႈပၢႆႈ ပႅပ်ႉမူၵ်းႁင်းၽႂ်မၼ်း၊ ၵူၼ်းမိူင်းယၢင်း ၼပ်ႉႁူဝ်ႁဵင် လႆႈပၢႆႈၽေး ၵႂႃႇယူႇသွၼ်ႈသဝ်း ၾင်ႇတၢင်းမိူင်းထႆး ၼႆယဝ်ႉ။

မိူဝ်ႈဝၼ်းထီႉ 4 July 2022 ၼၼ်ႉၵေႃႈ သိုၵ်းမၢၼ်ႈ ဢဝ်ႁိူဝ်းမိၼ်တိုၵ်း 2 လမ်း ပွႆႇမၢၵ်ႇတိုၵ်းယိုဝ်းသႂ်ႇ တပ်ႉပၢင်သဝ်း သိုၵ်းရၶႅင်ႇ AA တီႈၼိုင်ႈ ဢၼ်မီးၼႂ်းၼႃႈလိၼ် တပ်ႉၸုမ်း (5) KNU/KNLA မိူင်းယၢင်း ဢၼ်မီးႁိမ်းလႅၼ်လိၼ် ယၢင်း-ထႆး သေ ႁိူဝ်းမိၼ်သိုၵ်းမၢၼ်ႈ ၶိုၼ်းပူၼ်ႉပႅၼ်မိၼ်ၶဝ်ႈၵႂႃႇ ၼႃႈၾႃႉၾင်ႇတၢင်းမိူင်းထႆး ၼႆယဝ်ႉ။

တႆးလွတ်ႈလႅဝ်း