သိုၵ်းမၢၼ်ႈပွႆႇမၢၵ်ႇသႂ်ႇၵူၼ်းမိူင်းသီႇသႅင်ႇ တၢႆ 2 ၵေႃႉ

ၸုမ်းသိုၵ်းပဢူဝ်း PNLA ပိုၼ်ၽၢဝ်ႇၵႂႃႇဝႃႈ မိူဝ်ႈဝၼ်းထီႉ 11 January 2025 (လိူၼ်ၵမ်မႂ်ႇ 13 ၶမ်ႈ ပီႊတႆး 2119 ၼီႈ) ယၢမ်းဝၢႆးဝၼ်း မွၵ်ႈ 15:00 မူင်း ၸုမ်းသိုၵ်းမၢၼ်ႈ ဢဝ်ႁိူဝ်းမိၼ်ပွႆႇမၢၵ်ႇသႂ်ႇ တီႈဝၢၼ်ႈၽီသုတ်ႉ ဢိူင်ႇတွင်ႇသေႉ ၸႄႈဝဵင်းသီႇသႅင်ႇ ၸိုင်ႈတႆးပွတ်းၸၢၼ်း လႄႈ မီးၼၢင်းယိင်းလႆႈတၢႆ 2 ၵေႃႉ မၢတ်ႇၸဵပ်း 1 ၵေႃႉ ၼႆယဝ်ႉ။

ၸွမ်းၼင်ႇ ၶုၼ်ႇရဵင်းယၢၼ်ႇ ၽူႈၶၢၼ်ပၢၵ်ႇတပ်ႉသိုၵ်းပဢူဝ်း PNLA လၢတ်ႈတီႈသိုဝ်ႇၶၢဝ်ႇဝႃႈ ၸုမ်းသိုၵ်းမၢၼ်ႈဢဝ်ႁိူဝ်းမိၼ် ပၼ်ႇၵႂႃႇပၼ်ႇမႃး ၸွမ်းဝၢၼ်ႈ 5 ပွၵ်ႈ လႄႈ သမ်ႉပွႆႇမၢၵ်ႇတူၵ်း 4 လုၵ်ႈသေ မၢၵ်ႇလႆႈတႅၵ်ႇ 3 လုၵ်ႈ၊ တႃႇလုၵ်ႈ 1 တႄႉ ဢမ်ႇတႅၵ်ႇ၊ မၢၵ်ႇဢၼ်တူၵ်းတႅၵ်ႇၼၼ်ႉသမ်ႉ ၵႂႃႇတိူဝ်ႉၸပ်းၺႃးၼၢင်းယိင်း ၸိူဝ်းတိုၵ်ႉလုၵ်ႉတီႈသူၼ်ႁႆႈသေ ပွၵ်ႈၶိုၼ်းႁိူၼ်း ဝႃႈၼႆ။

တီႈဝၢၼ်ႈၽီသုတ်ႉၼႆႉ ဢမ်ႇမီးပၢင်တိုၵ်းသင် လႄႈ ၸုမ်းသိုၵ်းမၢၼ်ႈတင်ႈၸႂ် ပွႆႇမၢၵ်ႇသႂ်ႇဢွင်ႈတီႈၵူၼ်းမိူင်း ယူႇသဝ်းၵူၺ်းၼႆယဝ်ႉ၊ ၼႂ်းပိုၼ်ႉတီႈ ၸႄႈဝဵင်းသီႇသႅင်ႇၼၼ်ႉ ၸုမ်းသိုၵ်းမၢၼ်ႈ တင်း ၸုမ်းသိုၵ်းပဢူဝ်း PNLA တိုၵ်ႉမီးလွင်ႈၶဵင်ႈၶႅင်ၵၢၼ်သိုၵ်းၵၼ်ဝႆႉယူႇ ဝႃႈၼႆ။

တႆးလွတ်ႈလႅဝ်း