သိုၵ်းမၢၼ်ႈမဢလတိူၵ်ႈတၼ် ၶႄႇၶိုၼ်းၸီႉပၼ်တၢင်းဢွၵ်ႇလွတ်ႈ

တင်ႈတႄႇမိူင်းမၢၼ်ႈပူၼ်ႉတႂ်ႈဢိင်းၵလဵတ်ႈသေလႆႈလွင်ႈလွတ်ႈလႅဝ်းမႃး မိူဝ်ႈ 1948 ယဝ်ႉ သိုၵ်းမၢၼ်ႈ တူၵ်းသုမ်းၼႃႈမႆႈလိူဝ်သုတ်းၼၼ်ႉ ပဵၼ်ပၢၼ်ဢၼ်မိၼ်းဢွင်ႇလၢႆႇ ဢွၼ်ႁူဝ်မႃးၼႆႉယဝ်ႉ၊ ၽႅၼ်ၵၢၼ်ဢၼ်ၸုမ်းၸၢဝ်းလုၵ်ႉၽိုၼ်ႉ တိုၵ်းတေႃးသိုၵ်းမၢၼ်ႈမႃးပၢၼ်သိုပ်ႇပၢၼ်ၼႆႉ ဢမ်ႇႁဵတ်းႁႂ်ႈသိုၵ်းမၢၼ်ႈ တိုၼ်ႇၽၢၼ်ႈၵူဝ်ႁေမႃးတႄႉတႄႉဝႃႈဝႃႈ ထိုင်မႃးၽႅၼ်တိုၵ်း 1027 ၼႆတႄႉ ႁဵတ်းႁႂ်ႈသိုၵ်းမၢၼ်ႈမဢလ (မိၼ်းဢွင်ႇလၢႆႇ) တိူၵ်ႈတၢႆ ဢဝ်သၢႆၸႂ်လွတ်ႈပေႃးၶႂ်ႈယၢပ်ႇယူႇ။

ယၢမ်းၼင်ႇၼၼ် ၸုမ်းသိုၵ်းမၢၼ်ႈၼႆႉ တေဝၢႆႇၼႃႈပိုင်ႈၸူးမိူင်းလႂ်ၵေႃႈ ပဵၼ်မိူင်းဢၼ်ၶွမ်ႈၶတ်းတေႃႇမၼ်းၵမ်ႈၼမ်လႄႈ ၵႃႈလႆႈဝိၼ်ႇဝၢႆႇၸူးမိူင်းၶႄႇလႅင် တႃႇႁႃလၢႆးၵႄႈလိတ်ႈတၢင်းဢွၵ်ႇလွတ်ႈမၼ်းယူႇ။ ၼႂ်းမိူင်းမၢၼ်ႈၼႆႉ သင်ဢဝ်ၸိုင်ႈမိူင်းတီႈဢၼ်မႃးလူင်းတိုၼ်းပၢႆးမၢၵ်ႈမီးၼမ်ဝႃႈၸိုင် မိူင်းၶႄႇပဵၼ်ဝႆႉထီႉၼိုင်ႈယူႇ ယွၼ်ႉၼၼ်သေတႃႇလွင်ႈႁူမ်ႇလူမ်ႈပၢႆးမၢၵ်ႈမီးမၼ်းၼၼ်ႉ မိူင်းၶႄႇၼႆႉတိုၼ်းဢမ်ႇၸၢင်ႈၶၢတ်ႇလႆႈ လွင်ႈႁူမ်ႈမိုဝ်းတင်းသိုၵ်းမၢၼ်ႈ  တေၸႂ်ယႂ်ႇႁႂ်ႈၸုမ်းယိပ်းၵွင်ႈၵၢင်ႇ ဢၼ်ၵွင်ႉၵၢႆႇတင်း NUG ၼၼ်ႉ ႁူမ်ႇလူမ်ႈပၼ်ထူင်ငိုၼ်းမၼ်းၼႆ ၶႄႇတိုၼ်းဢမ်ႇႁဵတ်း။

ၼင်ႇၼၼ်လႄႈ ယၢမ်းသိုၵ်းမၢၼ်ႈမိၼ်းဢွင်ႇလၢႆႇတိူၵ်ႈတၼ်ယူႇၼႆႉ မိူင်းၶႄႇၸင်ႇပဵၼ်ၽၢႆႇဢၼ်ၸီႉပိုတ်ႇပၢၵ်ႈၼႄတၢင်းဢွၵ်ႇသိုၵ်းမၢၼ်ႈသေ ၶိုၼ်းၵွင်လင်တေႃႇ ၸုမ်းၸၢဝ်းပွတ်းႁွင်ႇၼၼ်ႉယဝ်ႉ၊ မိူင်းၶႄႇၼႆႉလိူဝ်သေမိပ်ႇငႅၼ်းႁႂ်ႈၵိုတ်းပၢင်တိုၵ်းတေႃႇသိုၵ်းမၢၼ်ႈၼႆယဝ်ႉ မၼ်းယင်းယၢမ်ႈပၼ်ၽၢင်ႉထိုင်ဝႃႈ သင်ပၢင်တိုၵ်းတုမ်ႉတိူဝ်ႉတေႃႇပၢႆးမၢၵ်ႈမီမၼ်းၸိုင် သိုၵ်းလွႆ သိုၵ်းၵဝ်ႈၵၢင်ႉ တေလႆႈဢဝ်ပုၼ်ႈၽွၼ်းၶိုၼ်းၼႆယဝ်ႉ ဝၢႆးၼၼ်ႉၽၢႆႇသိုၵ်းၵဝ်ၵၢင်ႉ ၸင်ႇပိုၼ်ၽၢဝ်ႇဢွၵ်ႇဝႃႈ တေဢမ်ႇသိုပ်ႇတိုၵ်းတိူင်းဝဵင်းလိူဝ်ႇလႄႈ ဝဵင်းလူင်တူၼ်ႈတီးၼႆလႄႈ ပၢႆလၢတ်ႈပႃးဝႃႈတပ်ႉသိုၵ်း MNDAA ၼႆႉ ဢမ်ႇမီးလွင်ႈၵွင်ႉၵၢႆႇၸွမ်း NUG ၼႆမႃး ၼင်ႇတႅၵ်ႇတႅၵ်ႇလႅင်းလႅင်းယဝ်ႉ။

မိၼ်းဢွင်ႇလၢႆႇ ၵႂႃႇမိူင်းၶႄႇပွၵ်ႈၼႆႉ

ႁူဝ်လိူၼ် November 2024 ဝူင်ႈထီႉၼိုင်ႈၼႆႉ ႁူဝ်ၼႃႈသိုၵ်းမၢၼ်ႈမိၼ်းဢွင်ႇလၢႆႇ ၵႂႃႇႁွတ်ႈထိုင်မိူင်းၶႄႇ ၸႄႈတွၼ်ႈယူႇၼၢၼ်ႇသေ ၶဝ်ႈႁူမ်ႈပၢင်ၵုမ်လူင် GMS ဢၼ်ၶႄႇဢွၼ်ႁူဝ်ၸတ်းႁဵတ်းလႄႈ မီးလၢႆလၢႆၸိုင်ႈမိူင်းၶိုၼ်ႈႁွတ်ႈၼၼ်ႉယဝ်ႉ ၶၢဝ်းတၢင်းမိၼ်းဢွင်ႇလၢႆႇၵႂႃႇမိူင်းၶႄႇပွၵ်ႈၼႆႉ မၼ်းလၢတ်ႈတီႈၶႄႇဝႃႈ သိုၵ်းဢူၺ်းလီသၢမ်ၸုမ်းၼႆႉ ပဵၼ်ၽၢႆႇယႃႉလိၵ်ႈၵိၼ်ၵႅၼ်ႇလွင်ႈငမ်းယဵၼ်သေ လေႃႇတိုၵ်းသိုၵ်းမၢၼ်ႈမႃးလူၺ်ႈၽႅၼ်ၵၢၼ် 1027 ၼၼ်ႉယဝ်ႉ။ သိုၵ်းမၢၼ်ႈၵူၺ်းပဵၼ်ၽၢႆႇႁပ်ႉတိုၵ်းၵႅတ်ႇၶႄတူဝ်ၵူၺ်းဝႃႈၼင်ႇၼႆ။ ယွၼ်ႉပၢင်တိုၵ်းၼႆႉသေလႄႈ ၸင်ႇမီးလွင်ႈတုမ်ႉတိူဝ်ႉတေႃႇၵၢၼ်ၵႃႉၶၢႆ ၸွမ်းလႅၼ်လိၼ်မိူင်းႁူမ်ႈတုမ်−မိူင်းၶႄႇ ယွၼ်ႉၼၼ်ၼင်ႇႁိုဝ်တေၵုမ်းထိင်းလႆႈငဝ်းလၢႆး ႁႂ်ႈပေႃးၼိမ်တဵင်ႈမႃးလႄႈ ၵၢၼ်ၵႃႉၶၢႆမိူၼ်ၵဝ်ႇမႃးၼၼ်ႉ သိုၵ်းမၢၼ်ႈတေႁူမ်ႈမိုဝ်းမိူင်းၶႄႇသေ ႁဵတ်းသၢင်ႈၵႂႃႇၼႆ မိၼ်းဢွင်ႇလၢႆႇလၢတ်ႈၵႂႃႇတီႈပၢင်ဢုပ်ႇဢူဝ်းတင်း Mr. Wang Ning ၽူႈၶဝ်ႈၸုမ်းၵေႃႇမတီႇငဝ်ႈငုၼ်း ပႃႇတီႇၶွမ်ႇမိဝ်ႊၼိတ်ႉ မိူင်းၶႄႇ ၼၼ်ႉယူႇယဝ်ႉ။

ပၢင်ၵုမ်ထႅင်ႈ ၼႂ်းဝၼ်းထိ 06 November 2024 ၼၼ်ႉ ၸွမ်ၽွင်းလူင်မိူင်းၶႄႇ Mr. Li Qiang ၵေႃႈလၢတ်ႈဝႃႈ ၼင်ႇႁိုဝ်သိုၵ်းမၢၼ်ႈပေႃးတေၵုမ်းထိင်းလႆႈလၢၼ်ႇလႅၼ်လိၼ်မိူင်းႁူမ်ႈတုမ်−မိူင်းၶႄႇလၢႆလၢႆတီႈၼၼ်ႉ ၽၢႆႇတၢင်းမိူင်းၶႄႇတေၸွႆႈထႅမ်ပၼ်တဵမ်တီႈယူႇ၊ လိူဝ်သေၼၼ်ႉၼင်ႇႁိုဝ်သိုၵ်ႈမၢၼ်ႈတေၸတ်းႁဵတ်းလႆႈ ပၢင်လိူၵ်ႈတင်ႈၼၼ်ႉၵေႃႈ ၶႄႇတေၶဝ်ႈပႃးၸွႆႈထႅမ်မိူၼ်ၵၼ်ယူႇ ၼႆမႃးယဝ်ႉ။ တေလႆႈဝႃႈမိူင်းၶႄႇၼႆႉ ၸွႆႈထႅမ်ၽၢႆႇၸုမ်းမိၼ်းဢွင်ႇလၢႆႇဝႆႉတဵမ်တီႈ ၼႆယူႇ။

ၶၢဝ်းတၢင်းႁူဝ်ၼႃႈသိုၵ်းမၢၼ်ႈၵႂႃႇမိူင်းၶႄႇပွၵ်ႈၼႆႉ လိူဝ်သေလႆႈႁူပ်ႉဢုပ်ႇၸွမ်ၽွင်းလူင်မိူင်းၶႄႇယဝ်ႉ လႆႈႁူပ်ႉထူပ်းပႃး ၸွမ်ၽွင်းလူင်တၢင်ႇၸိုင်ႈမိူင်း မိူၼ်ၼင်ႇမိူင်းလၢဝ်း၊ ၵမ်ႇပူးၶျႃး လႄႈမိူင်းထႆးလူးၵွၼ်ႇ ၶၢဝ်ႇထႆး Bangkok Post တၢင်ႇၵႂႃႇဝႃႈ ၸွမ်ၽွင်းလူင်မိူင်းထႆး ၼၢင်းၽႄးထွင်းထၢၼ်ၶျိၼ်ႈၼဝတ်း ႁူပ်ႉဢုပ်ႇတင်းၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ သုၼ်ႇတူဝ်သေ မီးၶေႃႈဢုပ်ႇဢူဝ်းၵၼ် လွင်ႈၵၢၼ်မိူင်း၊ ၵၢၼ်သိုၵ်းၼႂ်းမိူင်းမၢၼ်ႈပႃးလႄႈ တႃႇၵေႃႇသၢင်ႈလွင်ႈၼိမ်သဝ်းၼႂ်းမိူင်းႁူမ်ႈတုမ်ၼၼ်ႉ ယူႇတီႈၸွမ်ၽွင်းလူင်မိူင်းထႆးသေ တေၸွႆႈထႅမ်ၵႂႃႇယူႇ ၼႆယဝ်ႉ။ လိူဝ်ၼၼ်ႉလႆႈႁူႉဝႃႈ ႁူဝ်ၼႃႈသိုၵ်းမၢၼ်ႈမိၼ်းဢွင်ႇလၢႆႇ ယွၼ်းႁႂ်ႈမိူင်းထႆး သူင်ႇပၼ်ၶေႃႈမုၼ်းလွင်ႈႁႅင်းၵၢၼ်မိူင်းႁူမ်ႈတုမ် ဢၼ်မီးၼႂ်းမိူင်းထႆးၼၼ်ပႃး ၼႆယဝ်ႉ။

ၶၢဝ်းတၢင်းမိၼ်းဢွင်ႇလၢႆႇပွၵ်ႈၼႆႉ NUG လၢတ်ႈသင်

မိၼ်းဢွင်ႇလၢႆႇၵႂႃႇမိူင်းၶႄႇပွၵ်ႈၼႆႉ ၽၢႆႇသိုၵ်းမၢၼ်ႈၶဝ်ပိုၼ်ၽၢဝ်ႇဝႃႈ ပဵၼ်လွင်ႈတႃႇၵႂႃႇဢုပ်ႇဢူဝ်းလွင်ႈၵၢၼ်မၢၵ်ႈမီး လႄႈၵၢၼ်ၵႃႉၶၢႆၸွမ်းလႅၼ်လိၼ် ဝႃႈၼႆသေတႃႉ ၽၢႆႇၶွမ်ႈၶတ်းသိုၵ်းမၢၼ်ႈ NUG တႄႉလၢတ်ႈဝႃႈ ၶၢဝ်းတၢင်းသိုၵ်းမၢၼ်ႈ တေဢမ်ႇမီးၽွၼ်းလီသင်ၼႆယူႇ လိူဝ်ၼၼ်ႉယင်းလၢတ်ႈပႃးဝႃႈ လွင်ႈဢၼ်မိူင်းၶႄႇ မိပ်ႇငႅၼ်းတေႃႇၸုမ်းဢူၺ်းလီပွတ်းႁွင်ႇၼၼ်ႉၵေႃႈ မၼ်းဢမ်ႇမီးၽွၼ်းလီသင် ဝႃႈၼႆယူႇ။

လွင်ႈၼႆႉတႄႉ ယူႇတီႈၽွင်းလူင်ၽၢႆႇၼွၵ်ႈမိူင်း ၶွင်ၸုမ်းလူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ NUG တေႃႇၸိၼ်ႇမႃႇဢွင်ႇ လႆႈလၢတ်ႈၵႂႃႇ ၼႂ်းပၢင်သပ်းလႅင်းၸႅင်ႈၶၢဝ်ႇ NUG, KNU, KNPP, CNF ၼႂ်းဝၼ်းထီႉ 05 November 2024 ၼၼ်ႉယဝ်ႉ မၼ်းဝႃႈ “ယူႇတီႈတူဝ် မိၼ်းဢွင်ႇလၢႆႇ ႁူဝ်ၼႃႈသိုၵ်းမၢၼ်ႈယိုတ်းမိူင်း ၵႂႃႇမိူင်းၶႄႇၼၼ်ႉ ဢမ်ႇၸႂ်ႈတၢင်တူဝ်ၸၼ်ႉၸိုင်ႈမိူင်း ပဵၼ်တႃႇဢုပ်ႇဢူဝ်းပၢႆးမၢၵ်ႈမီး ၼႂ်းပိုၼ်ႉတီႈလႂ်မွၵ်ႈၼၼ်ႉၵူၺ်း လွင်ႈၶၢဝ်းတၢင်းပွၵ်ႈၼႆႉ ၽၢႆႇ NUG တိုၼ်းႁူႉဝႆႉဢွၼ်တၢင်းယဝ်ႉ။ လိူဝ်​​သေၼၼ်ႉ ဢၼ်ၽၢႆႇမိူင်းၶႄႇၶဝ်ပိၵ်ႉဢိုတ်းလၢၼ်ႇ ၸွမ်းလႅၼ်လိၼ် ၼႂ်းပိုၼ်ႉတီႈၸၢဝ်းၶိူဝ်းၼၼ်ႉ​​ၵေႃႈ လီထွမ်ႇသဵင်ၵၢင်ၸႂ်လွင်ႈယၢပ်ႇၵူၼ်းမိူင်း​​သေပိုတ်ႇပၼ်ၶိုၼ်းယူႇ။ လွင်ႈဢၼ်ၶႄႇမိပ်ႇငႅၼ်းတေႃႇ ၸုမ်းဢူၺ်းလီပွတ်းႁွင်ႇၼၼ်ႉ​​ၵေႃႈ ဢမ်ႇမီးၽွၼ်းလီသင် သဵၼ်ႈတၢင်းၵၢၼ်ၸုမ်းလုၵ်ႉၽိုၼ်ႉ​​ၵေႃႈ ​ဢမ်ႇၸၢင်ႈလႅၵ်ႈလၢႆႈၼႆယဝ်ႉ ၸွမ်းၼင်ႇၽႅၼ်ၵၢၼ်တိုၵ်း 1027 သေ လွင်ႈဢၼ်​​ၶေႇမိပ်ႇငႅၼ်းမႃးၼၼ်ႉ​​ၵေႃႈ ​​တေဢမ်ႇႁဵတ်းႁႂ်ႈ ​​ၶေႃႈယိူင်းဢၢၼ်းၸိူဝ်းၼၼ်ႉၶၢတ်ႇႁၢႆၼႆ ယူႇတီႈ NUG  တိုၵ်ႉယုမ်ႇၼင်ႇၼႆ” ၼႆယဝ်ႉ။

ငဝ်းလၢႆးသိုၵ်းမၢၼ်ႈယၢမ်းလဵဝ်

ၸိူင်ႉႁိုဝ်ၵေႃႈလီ ဢဝ်ငဝ်းလၢႆးမိူဝ်ႈလဵဝ်ဝႃႈၸိုင် ၽၢႆႇသိုၵ်းမၢၼ်ႈတူၵ်းသုမ်းၼမ်ၽႅဝ်လႄႈ မၼ်းၸင်ႇၶဝ်ႈႁႃၸူးမိူင်းၶႄႇ သင်မိူင်းၶႄႇၵေႃႈၸွႆႈထႅမ်ပၼ်သိုၵ်းမၢၼ်ႈၼင်ႇမၼ်းလူဝ်ႇၼၼ်ႉၸိုင် ငဝ်းလၢႆးၵၢၼ်မိူင်းမိူင်းမၢၼ်ႈ ၸၢင်ႈတေလႅၵ်ႈလၢႆႈမႃးၶိုၼ်းထႅင်ႈလၢႆးၼိုင်ႈယူႇ ယၢမ်းလဵဝ်ပေႃးမႃးပၵ်းတႃတူၺ်းၸွမ်းလွင်ႈတူင်ႉၼိုင်သိုၵ်းမၢၼ်ႈၸိုင် မိူၼ်လႅၵ်ႈလၢႆႈမႃးတင်းၼမ်ယဝ်ႉ ၶဝ်မီးလွင်ႈႁၢင်ႈႁႅၼ်းၶွတ်ႈၽွတ်ႈတပ်ႉသိုၵ်းၶိုၼ်း ၵူၼ်းသိုၵ်းမႂ်ႇဢၼ်ၶဝ်ၵဵပ်းမႃးၸိူဝ်းၼၼ်ႉ ၶိုၼ်းသွၼ်ပၼ်ႁႂ်ႈမေႃပႃးၵၢၼ်ၸႂ်ႉၶိူင်ႈမိၼ်တရူၼ်း ၸိူဝ်းၼႆႉယူႇ ယွၼ်ႉၼၼ်ၾႆးပၢင်တိုၵ်းလူင်ၼႆႉ ပဵၼ်မႃးယိုတ်ႈၼၢၼ်းယဝ်ႉလႄႈ တႃႇႁႂ်ႈမွတ်ႇယဵၼ်ၵႂႃႇငၢႆႈငၢႆႈၼႂ်းၶၢဝ်းယၢမ်းပွတ်းပွတ်းၼၼ်ႉတႄႉ တေဢမ်ႇပဵၼ်လႆႈ လိူဝ်သေၶႅၼ်းလုၵ်ႉမႆႈႁႅင်းမႃးၵူၺ်းယဝ်ႉ။

သိုၵ်းမၢၼ်ႈၼႆႉ တူၺ်းၸမ်လူမ်ႉၵူၼ်ႇယဝ်ႉၼႆသေတႃႉ ပေႃးတင်းမီးမိူင်းယႂ်ႇလူင်သေမိူင်းမိူင်းယူႇလင်မၼ်းၼႆ ဢဵၼ်ႁႅင်းၼမ်ႉၵတ်ႉၸုမ်းလုၵ်ႉၽိုၼ်ႉ ဢမ်ႇဝႃႈတေၶႅင်တၢၼ်ႇႁိုဝ်ၵေႃႈ တေပႆႇၸၢင်ႈထိုင်တီႈလႆႈ ၵမ်းလိုၼ်းၼႆႉၶၢတ်ႈလၢမ်းတူၺ်း လႅပ်ႈတေဢမ်ႇလွတ်ႈၵၢၼ်ဢုပ်ႇၵၼ်ၼိူဝ်ၽိူၼ်ၶိုၼ်းၵူၺ်း ယၢမ်းလဵဝ်သိုၵ်းမၢၼ်ႈၵေႃႈဝႃႈ ၸုမ်းဢူၺ်းလီၶဝ်ပဵၼ်ၸုမ်းယႃႉလွင်ႈငမ်းယဵၼ်၊ ပဵၼ်ၸုမ်းၵေႃႇၵၢၼ်ႁၢႆႉၼႆသေ တႃႇမၼ်းတေၵိုတ်းၵၢၼ်တိုၵ်းတေႃးၼၼ်ႉ ပႆႇႁၼ်သဵၼ်တၢင်း ၵႃႈပႆႇလႆႈၶိုၼ်းပိုၼ်ႉတီႈလမ်ႈလွင်ႈမၼ်း ဢၼ်သုမ်းၵႂႃႇၼၼ်ႉတႄႉ ငဝ်းလၢႆးတိုၵ်ႉတေသိုပ်ႇႁၢင်ႈႁၢႆႉၵႂႃႇထႅင်ႈႁိုင်ယူႇ။

ဝၢႆးသိုၵ်းမၢၼ်ႈၵႂႃႇမိူင်းၶႄႇမႃး

ဝၢႆးႁူဝ်ၼႃႈသိုၵ်းမၢၼ်ႈ ၵႂႃႇမိူင်းၶႄႇသေပွၵ်ႈမႃးၶိုၼ်းယဝ်ႉၼၼ်ႉ မိူဝ်ႈၼႂ်းဝၼ်းထီႉ 11 November 2024 ယူႇတီႈၽူႈၶၢၼ်ပၢၵ်ႇၸုမ်းသိုၵ်းမၢၼ်ႈ ၸွမ်ႁၢၼ်ၸေႃႇမိၼ်းထုၼ်း တွပ်ႇတီႈသိုဝ်ႇၶၢဝ်ႇၵႂႃႇဝႃႈ လွင်ႈဢၼ်ၽူႈၼမ်း ၸွမ်ၸိၵ်းသိုၵ်း မိၼ်းဢွင်ႇလၢႆႇ ၵႂႃႇမိူင်းၶႄႇပွၵ်ႈၼႆႉ ပဵၼ်လွင်ႈဢၼ်ဢွင်ႇမၢၼ်မႃးယူႇ တႃႇႁဵတ်းသၢင်ႈၵၢၼ်ပၢႆးမၢၵ်ႈမီး ၵူၼ်းမိူင်းႁူမ်ႈတုမ် ႁႂ်ႈၶိုၼ်ႈယႂ်ႇတိူဝ်းတွၼ်းမႃး ၼႆလႄႈလၢတ်ႈပႃးဝႃႈ သင်မီးၸုမ်း/ၵူၼ်း ဢၼ်ယူႇၼႂ်းၼႃႈလိၼ်ၶႄႇသေ သၢၼ်ၶတ်းသိုၵ်းမၢၼ်ႈၼၼ်ႉ ၶႄႇတေဢမ်ႇယွမ်းႁပ်ႉလႆႈ၊ လႄႈသင်မီးၸုမ်း/ၵူၼ်း ဢၼ်ယူႇၼႂ်းၼႃႈလိၼ်သိုၵ်းမၢၼ်ႈသေ သၢၼ်ၶတ်းတေႃႇၶႄႇၼၼ်ႉၵေႃႈ သိုၵ်းမၢၼ်ႈတေဢမ်ႇယွမ်းႁပ်ႉမိူၼ်ၵၼ် ၼႆယူႇ။

တင်ႈတႄႇသိုၵ်းမၢၼ်ႈသုမ်းသိုၵ်းၼႂ်းၸိုင်ႈတႆး ပွတ်းႁွင်ႇၼၼ်ႉ ၵႆႉမီးလွင်ႈၸႂ်ႉတိုဝ်းႁိူဝ်းမိၼ်သေပွႆႇသႂ်ႇဝၢၼ်ႈ/ဝဵင်း ၼႂ်းၼႃႈလိၼ်ဢၼ်ၸုမ်းဢူၺ်းလီၶဝ်တိုၵ်းပေႉၼၼ်ႉသေ လင်မိၼ်းဢွင်ႇလၢႆႇၵႂႃႇမိူင်းၶႄႇမႃးၵမ်းၼႆႉ သိုၵ်းမၢၼ်ႈယိုင်ႈၶႅၼ်းတိူဝ်းၸႂ်ႉႁိူဝ်းမိၼ်သေ ပွႆႇမၢၵ်ႇမႃးလိူဝ်ၵဝ်ႇ မိူၼ်ၼင်ႇ မိူဝ်ႈၼႂ်းဝၼ်းထီႉ 11−12 November 2024 ႁိူဝ်းမိၼ်ၶွင်သိုၵ်းမၢၼ်ႈ ပွႆႇမၢၵ်ႇသႂ်ႇ တီႈမိူင်းၵုတ်ႈ လႄႈၼွင်ၶဵဝ် (ၼိုင်ႈဝၼ်းၼိုင်ႈတီႈ) တင်းသွင်တီႈ မီးၵူၼ်းမိူင်းမၢတ်ႇၸဵပ်းလူႉတၢႆဢမ်ႇတႅမ်ႇၵႂႃႇ 30 ပၢႆ ၼႆယူႇ။

လွင်ႈသိုၵ်းမၢၼ်ႈ တင်ႈၸႂ်ဢဝ်ႁိူဝ်းမိၼ်ပွႆႇသႂ်ႇ ၼႂ်းပိုၼ်ႉတီႈဢၼ်မီးၵူၼ်းမိူင်းယူႇသဝ်းလႄႈ ႁဵတ်းႁႂ်ႈတုမ်ႉတိူဝ်ႉတေႃႇတီႈယူႇတၼ်းသဝ်းလႄႈ ႁိူၼ်းယေးၵူၼ်းမိူင်း၊ ၵူၼ်းမိူင်းႁဝ်းလဵၵ်ႉယႂ်ႇၵူႈပၢၼ်ၵူႈသႅၼ်း လႆႈလူမ်ႉတၢႆမၢတ်ႇၸဵပ်းၸွမ်းၼၼ်ႉ ၽၢႆႇမိူင်းၶႄႇၶဝ်ဢမ်ႇလၢတ်ႈသင်ၸွမ်း။ တေႃႇထိုင်ဝၼ်းမိူဝ်ႈၼႆႉ သိုၵ်းမၢၼ်ႈၶဝ်ယင်းတိုၵ်ႉသိုပ်ႇၸႂ်ႉတိုဝ်းလွၵ်းလၢႆးႁုၵ်ႉႁၢႆႉယူႇဢမ်ႇထၢတ်ႇ ႁဵတ်းႁႂ်ႈၵူၼ်းမိူင်းဢၼ်ဢမ်ႇမီးတၢင်းၽိတ်းသင်ၼၼ်ႉ လႆႈၶၢၼ်ၸႂ်ၸွမ်းၼင်ႇမၢၵ်ႇမူႉၶမ်ၵႄႈႁိပ်ႇလႄႈ ၼင်ႇၵႂၢမ်းတႆးမီးဝႆႉဝႃႈ “ၵႂၢႆးတေႃးၵၼ်ယႃႇယႃႇ မႃးၼႃႇႁူဝ်တေးၼႃး” ၼႆၼၼ်ႉယဝ်ႉ။

လွမ်ႉမိူင်း ၵေးသီး

*** ပွင်ႈၵႂၢမ်းႁူဝ်ၼႆႉ ပဵၼ်ပၢႆးဝူၼ်ႉလႄႈတၢင်းႁၼ်ထိုင်သုၼ်ႇတူဝ်ၽူႈတႅမ်ႈလိၵ်ႈၵူၺ်း ဢမ်ႇၸႂ်ႈၶေႃႈၶၢၼ်ပၢၵ်ႇတႆးလွတ်ႈလႅဝ်း